എറണാകുളം: ‘ഗർർർ’ സിനിമയുടെ ലൊക്കേഷൻ വീഡിയോ സോഷ്യൽ മീഡിയയില്‍ പങ്കുവച്ച് നടൻ കുഞ്ചാക്കോ ബോബൻ. ചിത്രത്തിൽ തനിക്കൊപ്പം അഭിനയിക്കുന്ന സിംഹത്തെ ഗ്രാഫിക്സ് ഉപയോഗിച്ച് സൃഷ്‌ടിച്ച് എടുത്തതാണെന്ന് വിചാരിച്ചവർക്ക് തെറ്റുപറ്റി. വീഡിയോക്കൊപ്പം 'ഒറിജിനൽ സിംഹത്തിന്‍റെ മാന്ത് കിട്ടിയത് എനിക്കല്ലേ' എന്ന കുറിപ്പും അദ്ദേഹം പങ്കിട്ടു. ജൂൺ 14ന് ഗർർർ റിലീസ് ചെയ്യാനിരിക്കെ പ്രമോഷൻ എന്ന നിലയിലാണ് സിംഹവുമായുള്ള ലൊക്കേഷൻ വീഡിയോ കുഞ്ചാക്കോ ബോബന്‍ സമൂഹ മാധ്യമങ്ങളില്‍ പോസ്റ്റ് ചെയ്‌തത്.
'സിംഹം ഗ്രാഫിക്സ് ആണത്രേ ഗ്രാഫിക്സ്'. അതും മാന്ത് കിട്ടിയ എന്നോട്. ഗർർർ ജൂൺ 14ന് ലോകമെമ്പാടുമുള്ള തിയേറ്ററുകളിൽ റിലീസ് ചെയ്യും'. എന്ന ക്യാപ്ഷനോടെയാണ് ചാക്കോച്ചന്‍ ഇന്‍സ്‌റ്റാഗ്രാമില്‍ വീഡിയോ പോസ്റ്റ് ചെയ്‌തത്. വീഡിയോയില്‍ സുരാജും ചാക്കോച്ചനും തമ്മിലുള്ള സിനിമയിലെ ഹാസ്യ സംഭാഷണങ്ങളും കേള്‍ക്കാം.
മൃഗശാലയിലെ സിംഹക്കൂട്ടിലേക്ക് മദ്യപിച്ച് കയറിച്ചെല്ലുന്ന യുവാവ് ആയാണ് കുഞ്ചാക്കോ ബോബൻ ഈ ചിത്രത്തില്‍ വേഷമിടുന്നത്. എസ്രയ്ക്ക് ശേഷം ജെയ് കെ സംവിധാനം ചെയ്യുന്ന ചിത്രമാണ് ഗർർർ. ചിത്രത്തില്‍ പ്രധാന കഥാപാത്രമാണ് സിംഹം. മോജോ എന്നാണ് സിംഹത്തിന്‍റെ പേര്. ഹോളിവുഡ്, ബോളിവുഡ് ചിത്രങ്ങളിൽ വേഷമിട്ടിട്ടുള്ള മോജോ 'ദര്‍ശന്‍' എന്ന പേരിലാണ് ഗര്‍ര്‍ര്‍-ലെത്തുന്നത്.
ഷാജി നടേശന്‍, തമിഴ് നടന്‍ ആര്യ എന്നിവര്‍ ചേര്‍ന്നാണ് 'ഗർർർ' നിര്‍മ്മിച്ചിരിക്കുന്നത്. ഗര്‍ര്‍ര്‍ന്‍റെ സഹനിര്‍മ്മാണം നിര്‍വഹിച്ചിരിക്കുന്നത് സിനിഹോളിക്‌സാണ്. സംവിധായകന്‍ ജെയ് കെയും പ്രവീണ്‍ എസും ചേര്‍ന്നാണ് ചിത്രത്തിന്‍റെ തിരക്കഥ ഒരുക്കിയിരിക്കുന്നത്. പ്രശസ്‌ത സംവിധായകനായ രതീഷ്‌ ബാലകൃഷ്‌ണൻ പൊതുവാളാണ് ചിത്രത്തിന്‍റെ പ്രൊഡക്ഷന്‍ ഡിസൈനര്‍ എന്നതും ഗര്‍ര്‍ര്‍ന്‍റെ പ്രത്യേകതയാണ്.
ഛായാഗ്രഹണം: ജയേഷ് നായർ, എക്‌സിക്യൂട്ടീവ് പ്രൊഡ്യൂസർ: മിഥുൻ എബ്രഹാം, എഡിറ്റർ: വിവേക് ഹർഷൻ, പശ്ചാത്തല സംഗീതം: ഡോൺ വിൻസെന്‍റ്, സംഗീതം: ഡോൺ വിൻസെൻ്റ്, കൈലാസ് മേനോൻ, ടോണി ടാർസ്, ഗാനരചന: മനു മഞ്ജിത്, കലാസംവിധാനം: രഖിൽ, പ്രൊഡക്ഷൻ കൺട്രോളർ: ഷബീര്‍ മലവട്ടത്ത്, സിങ്ക് സൗണ്ട് & സൗണ്ട് ഡിസൈൻ: ശ്രീജിത്ത് ശ്രീനിവാസൻ, VFX: എഗ് വൈറ്റ് വിഎഫ്എക്‌സ്‌, മേക്കപ്പ്: ഹസൻ വണ്ടൂർ, വസ്‌ത്രാലങ്കാരം: സമീറ സനീഷ്, അഡിഷണൽ ഡയലോഗുകൾ: RJ മുരുകൻ, ക്രിയേറ്റീവ് ഡയറക്‌ടർ: ആൽവിൻ ഹെൻറി, ചീഫ് അസോസിയേറ്റ് ഡയറക്‌ടർ: മിറാഷ് ഖാൻ, വരികൾ: വൈശാഖ് സുഗുണൻ, ഡിസൈൻ: ഇല്യുമിനാര്‍ട്ടിസ്‌റ്റ്, ഡിജിറ്റൽ മാർക്കറ്റിങ്: അനൂപ് സുന്ദരൻ, പിആര്‍ഒ: ആതിര ദിൽജിത്ത്.
Also Read: 'ഹമാരേ ബാരാ' സിനിമ വിവാദം; സ്‌റ്റേ നീക്കി, റിലീസിന് അനുമതി നൽകി ബോംബെ ഹൈക്കോടതി
