തിയേറ്റര്‍ റിലീസിന് ശേഷം പ്രേക്ഷകര്‍ വളരെ ആകാംക്ഷയോടെ കാത്തിരിക്കുകയാണ് 'ഇന്ത്യന്‍ 2'വിന്‍റെ ഒടിടി റിലീസിനായി. ഒടുവില്‍ ഉലക നായകന്‍ കമല്‍ ഹാസന്‍റെ 'ഇന്ത്യന്‍ 2' ഒടിടിയില്‍ സ്ട്രീമിങ് ആരംഭിച്ചിരിക്കുകയാണ്. ഓഗസ്‌റ്റ് 9ന് അര്‍ദ്ധ രാത്രിയോടെയാണ് ചിത്രം നെറ്റ്‌ഫ്ലിക്‌സില്‍ സ്ട്രീമിങ് തുടങ്ങിയത്.
'ഇന്ത്യന്‍ 2'യുടെ ഒടിടി റിലീസ് അറിയിച്ച് കൊണ്ടുള്ള പ്രൊമോ വീഡിയോ സോഷ്യല്‍ മീഡിയയുടെ ശ്രദ്ധ ആകര്‍ഷിക്കുകയാണ്. കമല്‍ ഹസന്‍ അവതരിപ്പിക്കുന്ന ഒരു രസകരമായ വീഡിയോയാണ് നെറ്റ്‌ഫ്ലിക്‌സ് പുറത്തുവിട്ടിരിക്കുന്നത്. മനോഹരമായൊരു അടിക്കുറിപ്പും നെറ്റ്‌ഫ്ലിക്‌സ് പങ്കുവച്ചിട്ടുണ്ട്.
"എന്തുകൊണ്ടാണ് അദ്ദേഹത്തെ 'ഉലഗ നായകൻ' എന്ന് വിളിക്കുന്നതെന്ന് എപ്പോഴെങ്കിലും ചിന്തിച്ചിട്ടുണ്ടോ? അതിന് കാരണം തമിഴ്, തെലുഗു, മലയാളം, കന്നഡ എന്നീ ഭാഷകളില്‍ 'ഇന്ത്യൻ 2' ഇപ്പോള്‍ റിലീസിനെത്തിയിരിക്കുകയാണ്. ഹിന്ദി പതിപ്പും ഉടന്‍ നെറ്റ്‌ഫ്ലിക്‌സില്‍ റിലീസ് ചെയ്യും." - നെറ്റ്‌ഫ്ലിക്‌സിന്‍റെ ഔദ്യോഗിക ഇന്‍സ്‌റ്റഗ്രാമില്‍ കുറിച്ചത് ഇപ്രകാരമാണ്.
അതേസമയം ഇന്ത്യൻ 2 തിയേറ്ററിൽ റിലീസ് ചെയ്‌ത് ഒരു മാസത്തിനുള്ളിലാണ് ഒടിടിയിലേക്ക് എത്തിയിരിക്കുന്നത്. ജൂലൈ 12നാണ് ചിത്രം ലോകമെമ്പാടുമുള്ള തിയേറ്ററുകളില്‍ റിലീസിനെത്തിയത്. 1996ൽ പുറത്തിറങ്ങിയ ശങ്കര്‍ സംവിധാനം ചെയ്‌ത സിനിമയുടെ തുടർച്ചയാണ് 'ഇന്ത്യന്‍ 2'.
സേനാപതിയായുള്ള കമല്‍ ഹാസന്‍റെ യാത്ര 'ഇന്ത്യന്‍ 2'ലും തുടരുന്നു. കമല്‍ ഹസനെ കൂടാതെ സിദ്ധാർത്ഥ്, രാകുൽ പ്രീത് സിങ്‌, പ്രിയ ഭവാനി ശങ്കർ, ബോബി സിംഹ, എസ് ജെ സൂര്യ, വിവേക് എന്നിവരും ചിത്രത്തില്‍ സുപ്രധാന വേഷങ്ങളില്‍ അഭിനയിക്കുന്നുണ്ട്.
