29-ാമത് രാജ്യാന്തര ചലച്ചിത്ര മേളയ്‌ക്ക് തിരിതെളിയാന്‍ ഇനി ദിവസങ്ങള്‍ മാത്രം ബാക്കി. തലസ്ഥാന നഗരിയില്‍ ഡിസംബർ 13 മുതൽ 20 വരെയാണ് ചലച്ചിത്ര മേള അരങ്ങേറുക. നിരവധി മികച്ച ചിത്രങ്ങളാണ് ഇക്കുറി മേളയില്‍ മാറ്റുരയ്‌ക്കുക.
അർമേനിയയിൽ നിന്നുള്ള ഏഴ് ചിത്രങ്ങളാണ് ഇത്തവ കൺട്രി ഫോക്കസ് വിഭാഗത്തിൽ പ്രദർശിപ്പിക്കുക. 100 വർഷം പിന്നിടുന്ന അർമേനിയൻ സിനിമയോടുള്ള ആദര സൂചകമായാണിത്.
'അമേരിക്കറ്റ്സി', 'ഗേറ്റ് ടു ഹെവൻ', 'ലാബ്റിന്ത്', 'ലോസ്‌റ്റ്‌ ഇൻ അർമേനിയ', 'പരാജ്നോവ്', 'ഷുഡ് ദി വിൻഡ് ഡ്രോപ്പ്', 'ദി ലൈറ്റ് ഹൗസ്' എന്നീ സിനിമകളാണ് ഈ വിഭാഗത്തില്‍ മേളയിൽ പ്രദർശിപ്പിക്കുക. യുദ്ധത്തിൻ്റെയും കുടി ഇറക്കലിൻ്റെയും പശ്ചാത്തലത്തിൽ കഥ പറയുന്ന ഈ സിനിമകൾ പ്രതിരോധം, സാംസ്‌കാരിക വൈവിധ്യം, സ്വത്വം, അതിജീവനം എന്നീ മനുഷ്യന്‍റെ അടിസ്ഥാനപരമായ ജീവിതത്തിന്‍റെ നേർക്കാഴ്‌ച്ചകളാണ് വരച്ചുകാട്ടുന്നത്.
സ്വവർഗാനുരാഗ കുറ്റത്തെ തുടര്‍ന്ന് 1940കളുടെ അവസാനത്തില്‍ ജയിലിൽ അടയ്ക്കപ്പെട്ട വിഖ്യാത ചലച്ചിത്ര സംവിധായകൻ സെർജി പരാജ്‌നോവിന്‍റെ ജീവിതത്തെ ആസ്‌പദമാക്കി ഒരുക്കിയ 'പരാജ്നോവ്' എന്ന ചിത്രം മേളയിലെ മുഖ്യ ആകർഷണമാകും.
വർഷങ്ങൾക്ക് മുൻപ് ചെയ്‌തുപോയ തെറ്റിനെ ഓർത്ത് പശ്ചാത്തപിക്കുന്ന മിലിട്ടറി മാധ്യമ ഉദ്യോഗസ്ഥനായ റോബർട്ട് എന്ന വ്യക്‌തിയുടെ കഥയാണ് ജിവാൻ അവേതിസ്യാൻ സംവിധാനം ചെയ്‌ത 'ഗേറ്റ് റ്റു ഹെവൻ' പറയുന്നത്.
അർമേനിയയിലെ തിരക്കുപിടിച്ച ജീവിതത്തിനിടെ ലഭിച്ച ഇടവേളയിൽ തുർക്കിയിലേക്കുള്ള നായകൻ്റെ യാത്രയെ നർമ്മത്തിലൂടെ ആവിഷ്‌കരിച്ചിരിക്കുകയാണ് സെർജ് അവേഡിക്കിയൻ്റെ 'ലോസ്‌റ്റ്‌ ഇൻ അർമേനിയ'.
കാലാതീതതയുടെ ചുഴികളില്‍ അകപ്പെട്ട് സിനിമയിലെ കഥാപാത്രങ്ങൾ സ്വയം നഷ്‌ടപ്പെട്ട് പോകുന്നതും തുടർന്ന് അവരുടെ സങ്കല്‍പ്പ ലോകത്ത് നിന്നും മാറി സഞ്ചരിച്ച് യാഥാർത്ഥ്യ ലോകത്തെ കണ്ടെത്തുന്നതുമാണ് മിഖായേൽ ഡോവ്ലാത്യൻ്റെ 'ലാബ്റിന്തി'.
അസർബൈജാനും അർമേനിയയും അതിർത്തി തർക്കത്തിന്‍റെ അടിസ്ഥാനത്തിൽ കെട്ടിപ്പടുത്ത കലുഷിതമായ ലോകത്തിന്‍റെയും മനുഷ്യ ഹത്യയുടെയും കഥ പറയുകയാണ്
മരിയ സാഖ്യ സംവിധാനം ചെയ്‌ത 'ദി ലൈറ്റ് ഹൗസ്'. തന്‍റെ വ്യക്‌തിത്വത്തെയും പൂര്‍വ്വികരെയും അന്വേഷിച്ചിറങ്ങുന്ന ചാര്‍ലി എന്ന യുവാവിന്‍റെ കഥ പറയുന്ന ചിത്രമാണ് മിഖായേൽ എഖുരീജാൻ സംവിധാനം ചെയ്യുന്ന 'അമേരികേറ്റ്സി'.
വളരെ പ്രത്യേകത ഉള്ളതും വൈവിധ്യമാർന്നതുമായ പശ്ചിമേഷ്യൻ സംസ്‌കാരത്തിന്‍റെ നേർക്കാഴ്‌ച്ചകളും മനുഷ്യായുസ്സിന്‍റെ ചെറുത്തുനിൽപ്പും അതിജീവനവുമാണ് അർമേനിയൽ സിനിമകളിൽ പലപ്പോഴും ആശയങ്ങൾ ആകാറുള്ളത്. ഇത്തരം സിനിമകൾ ചലച്ചിത്രാസ്വാദകർക്ക് പുതിയ അനുഭവമാകും സമ്മാനിക്കുക.
Also : 29ാമത് ഐ.എഫ്.എഫ്.കെ: ആദ്യദിനം 5000 കടന്ന് ഡെലിഗേറ്റ് രജിസ്‌ട്രേഷന്‍
