ഇക്കുറി മലയാകൾക്കൊപ്പം ക്രിസ്‌മസ് പൊടിപൂരമാക്കാൻ കച്ചമുറുക്കി ഇട്ടിയാനും കുടുംബവും. ആഷിഖ് അബു സംവിധാനം ചെയ്യുന്ന 'റൈഫിള്‍ ക്ലബ്' ഡിസംബർ 19ന് തിയേറ്ററുകളിലെത്തും. സിനിമയുടേതായി ഇതുവരെ പുറത്തിറങ്ങിയ ക്യാരക്‌ടർ പോസ്‌റ്ററുകളെല്ലാം സോഷ്യല്‍ മീഡിയയുടെ ശ്രദ്ധ നേടിയിരുന്നു.
ഇപ്പോഴിതാ സിനിമയുടെ റിലീസ് അനൗണ്‍സ്‌മെന്‍റ് പോസ്‌റ്റര്‍ പുറത്തുവിട്ടിരിക്കുകയാണ്. വേറിട്ട രീതിയിലുള്ളതാണ് 'റൈഫിള്‍ ക്ലബി'ന്‍റെ റിലീസ് അനൗണ്‍സ്‌മെന്‍റ് പോസ്‌റ്റര്‍. സംവിധായകന്‍ ആഷിഖ് അബുവും പോസ്‌റ്റര്‍ സോഷ്യല്‍ മീഡിയയില്‍ പങ്കുവച്ചിട്ടുണ്ട്.
സിനിമയുടെ ആദ്യ ട്രാക്കും അടുത്തിടെ പുറത്തിറങ്ങിയിരുന്നു. 'ഗന്ധർവ്വ ഗാനം' എന്ന ഗാനവും സോഷ്യല്‍ മീഡിയയുടെ ശ്രദ്ധ ആകര്‍ഷിച്ചിരുന്നു. നേരത്തെ പുറത്തിറങ്ങിയ ചിത്രത്തിലെ സുപ്രധാന വേഷത്തിലെത്തുന്ന വാണി വിശ്വനാഥിന്‍റെ ഇട്ടിയാനം ക്യാരക്‌ടര്‍ പോസ്‌റ്ററും പ്രേക്ഷകശ്രദ്ധ നേടിയിരുന്നു.
കൂടാതെ സുരേഷ് കൃഷ്‌ണ അവതരിപ്പിക്കുന്ന ഡോ. ലാസർ, സുരഭി ലക്ഷ്‌മിയുടെ സൂസൻ, ദിലീഷ് പോത്തന്‍റെ സെക്രട്ടറി അവറാൻ, വിഷ്‌ണു അഗസ്ത്യയുടെ ഗോഡ്ജോ, വിനീത് കുമാറിന്‍റെ റൊമാന്‍റിക് സ്‌റ്റാർ, ഉണ്ണിമായയുടെ സൂസൻ എന്നീ കഥാപാത്രങ്ങളുടെ ക്യാരക്‌ടര്‍ പോസ്‌റ്ററുകളും ശ്രദ്ധ നേടിയിരുന്നു.
പ്രശസ്‌ത ബോളിവുഡ് സംവിധായകനും അഭിനേതാവുമായ അനുരാഗ് കശ്യപും സിനിമയില്‍ സുപ്രധാന വേഷത്തില്‍ എത്തുന്നുണ്ട്. ദയാനന്ദ് ബാരെ എന്ന കഥാപാത്രത്തെയാണ് ചിത്രത്തില്‍ അനുരാഗ് കശ്യപ് അവതരിപ്പിക്കുന്നത്. മലയാളത്തില്‍ അനുരാഗ് കശ്യപിന്‍റെ അരങ്ങേറ്റം കൂടിയാണ് 'റൈഫിള്‍ ക്ലബ്'.
ദർശന രാജേന്ദ്രൻ, സുരഭി ലക്ഷ്‌മി, വിജയരാഘവൻ, സുരേഷ് കൃഷ്‌ണ, ഹനുമാന്‍കൈന്‍ഡ്, റാഫി, വിനീത് കുമാർ, സെന്ന ഹെഗ്‌ഡെ, വിഷ്‌ണു അഗസ്ത്യ, പ്രശാന്ത് മുരളി, ഉണ്ണിമായ പ്രസാദ്,നടേഷ് ഹെഗ്‌ഡെ, വൈശാഖ് ശങ്കർ, പൊന്നമ്മ ബാബു, രാമു, നിയാസ് മുസലിയാർ, റംസാൻ മുഹമ്മദ്, നവനി ദേവാനന്ദ്, പരിമള്‍ ഷായ്‌സ്‌, സജീവ് കുമാർ, ചിലമ്പൻ, കിരൺ പീതാംബരൻ, ഉണ്ണി മുട്ടത്ത്, ബിബിൻ പെരുമ്പിള്ളി, ഇന്ത്യൻ എന്നിവരടക്കമുള്ള വൻ താരനിരയാണ് ചിത്രത്തിൽ അണിനിരക്കുന്നത്.
ദിലീഷ് നായർ, ശ്യാം പുഷ്‌കരൻ, ഷറഫു, സുഹാസ് എന്നിവർ ചേർന്നാണ് സിനിമയുടെ തിരക്കഥയും സംഭാഷണവും ഒരുക്കിയിരിക്കുന്നത്. 'മായാനദി'ക്ക് ശേഷം ആഷിക്ക് അബു, ശ്യാം പുഷ്‌കരൻ, ദിലീഷ് നായർ എന്നിവര്‍ ഒന്നിക്കുന്നു എന്ന പ്രത്യേകതയും റൈഫിൾ ക്ലബ്ബിനുണ്ട്.
ഒപിഎം സിനിമാസിന്‍റെ ബാനറിൽ ആഷിഖ് അബു, വിശാൽ വിൻസന്‍റ് ടോണി, വിൻസന്‍റ് വടക്കൻ എന്നിവർ ചേർന്നാണ് സിനിമയുടെ നിർമ്മാണം. ആഷിക്ക് അബു തന്നെയാണ് സിനിമയുടെ ഛായാഗ്രഹണവും നിര്‍വ്വഹിക്കുന്നത്. ഉടന്‍ തന്നെ ചിത്രം റിലീസിനെത്തുമെന്നാണ് സൂചന.
മേക്കപ്പ് - റോണക്‌സ്‌ സേവ്യർ, വസ്ത്രാലങ്കാരം - മഷർ ഹംസ, എഡിറ്റർ - വി സാജൻ, സ്‌റ്റണ്ട് - സുപ്രീം സുന്ദർ, സംഗീതം - റെക്‌സ്‌ വിജയൻ, പ്രൊഡക്ഷന്‍ കണ്‍ട്രോളര്‍ - കിഷോര്‍ പുറക്കാട്ടിരി, പ്രൊഡക്ഷൻ ഡിസൈനർ - അജയൻ ചാലിശ്ശേരി, സ്‌റ്റില്‍സ് - റോഷന്‍, അര്‍ജുന്‍ കല്ലിങ്കല്‍, പിആര്‍ഒ - ആതിര ദില്‍ജിത്ത് എന്നിവരാണ് ചിത്രത്തിലെ മറ്റ് അണിയറപ്രവര്‍ത്തകര്‍.
