തിരുവനന്തപുരം: കലോത്സവ വേദികളിൽ കാണികളെ പിടിച്ചിരുത്തുന്ന കലാപ്രകടനങ്ങളിൽ ഒന്നാണ് അറബനമുട്ട്. താളത്തിലുള്ള ചലനങ്ങളും കൊട്ടുമെല്ലാം ദഫ്‌മുട്ടുപോലെത്തന്നെ കാണികളെ ആവേശത്തിലാഴ്‌ത്താറുണ്ട്. കലോത്സവ വേദിയിൽ കാണികളെ കയ്യിലെടുക്കാന്‍ തന്‍റെ കുട്ടികളുമായി ഇത്തവണയും എത്തിയിരിക്കുകയാണ് അറബനമുട്ടു പരിശീലകന്‍ കൂടിയായ ഫോക്‌ലോർ അക്കാദമി വൈസ്‌ ചെയർമാന്‍ ഡോ. കോയ കാപ്പാട്.
2022 ലാണ് ഇദ്ദേഹം ഫോക്‌ലോർ അക്കാദമി വൈസ്‌ ചെയർമാന്‍ പദവിയിലെത്തുന്നത്. മലബാറിലെ 5 ജില്ലകളിൽ ദഫ്‌മുട്ട് പരിശീലന രംഗത്തും സജീവ സാന്നിധ്യം ആണ് ഡോ. കോയ കാപ്പാട്. ഇദ്ദേഹത്തിന്‍റെ നേതൃത്വത്തിൽ പരിശീലനം നേടിയ 50 ഓളം ശിഷ്യൻമാരാണ് ഇത്തവണ സംസ്ഥാന കലോത്സവത്തിൽ മാറ്റുരക്കുന്നത്. കഴിഞ്ഞ രണ്ട് തവണ സംസ്ഥാന കലോത്സവത്തിൽ മികച്ച പ്രകടനം നടത്തിയ സംഘം ഇത്തവണയും സജീവമായി തന്നെ മത്സരരംഗത്തുണ്ട്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
ദഫ്‌മുട്ട് പോലെ അവതരണത്തിൽ പ്രേക്ഷക മികവ് പുലർത്തുന്ന ഒരു നാടൻ കലാ മത്സരമാണ് കലോത്സവവേദികളിൽ അറബനമുട്ട്. ഏട്ട് ഇഞ്ചു വ്യാസത്തിൽ പ്ലാവിൽ തടിയിൽ ആട്ടിൻ തോലും പിണഞ്ഞ് കയറുകുട്ടി പിണഞ്ഞുണ്ടാക്കിയതാണ് ദഫ് മുട്ട്. എന്നാൽ 12 ഇഞ്ച് വ്യാസത്തിലാണ് അറബന മുട്ട് നിർമ്മിക്കുന്നത്. സൂഫി പ്രകീർത്തനങ്ങളാണ് പ്രധാനമായും ഇതിൽ ആലപിക്കാറുള്ളത്. താളം, അവതരണം, വേഷങ്ങൾ എന്നിവയിൽ ആണ് പ്രധാനമായും മാർക്ക് വീഴുക.
Also Read:ചരിത്രത്തിൽ ആദ്യമായി കലോത്സവ വേദിയിൽ ഇരുള നൃത്തം; അഭിമാനമായി കലാകാരികള്‍
