കോഴിക്കോട്: തേങ്ങ വില സർവ്വകാല റെക്കോഡിൽ. പച്ചതേങ്ങ പൊതിച്ചതിന് കിലോയ്‌ക്ക് 51 രൂപയാണ് ഇന്നത്തെ വില. വില ഇനിയും വർധിക്കുമെന്നും തേങ്ങ കിട്ടാനില്ലെന്നും കുറ്റ്യാടി കോക്കനെറ്റ് ഉടമ ഹാഷിം പറഞ്ഞു.
''വില ഇനിയും മുന്നോട്ട് പോകും. തേങ്ങയ്‌ക്ക് വില ഇടിഞ്ഞതോടെ വർഷങ്ങളായി തെങ്ങിനെ പരിപാലിക്കുന്നില്ല. കേര നാട്ടിൽ തെങ്ങ് ഒന്നിനും കൊള്ളാത്ത അവസ്ഥയിലാകുകയാണ്. അതുകൊണ്ട് തന്നെ തേങ്ങയുടെ ലഭ്യതയും കുറഞ്ഞു.'' ആയിരം തേങ്ങ കിട്ടുന്ന പറമ്പുകളിൽ അത് നാലിലൊന്നായി കുറഞ്ഞു. തേങ്ങയിടാനും ആളെ കിട്ടാത്ത അവസ്ഥ. കേര കർഷകർ അനുഭവിച്ചത് ചില്ലറ സങ്കടമൊന്നുമല്ലെന്നും' അദ്ദേഹം പറഞ്ഞു.
5 വർഷത്തിലേറെയായി കിലോയ്‌ക്ക് 23 രൂപ മുതൽ 26 വരെയായിരുന്നു പച്ചതേങ്ങ വില. കഴിഞ്ഞ ഓണത്തിന് മുമ്പ് അത് 39ൽ എത്തി. അത് കഴിഞ്ഞ വില 47ലെത്തി. എന്നാല്‍ അതിന് പിന്നാലെ വില 40ലേക്ക് താഴ്ന്നു. തേങ്ങ കിട്ടാനില്ലാത്ത അവസ്ഥ വന്നതോടെ ഇപ്പോൾ വില സർവ്വകാല റെക്കോഡിലേക്ക് കുതിച്ചു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
കൊപ്രയ്‌ക്കും ഉണ്ടയ്‌ക്കും (ഉണ്ട കൊപ്ര) കൊട്ടത്തേങ്ങയ്‌ക്കും വില വർധിച്ചിട്ടുണ്ട്. കൊപ്ര ക്വിന്‍റലിന് 15,000 മുതൽ 18,000 വരെയാണ് വില. ഉണ്ട ക്വിന്‍റലിന് 17000 ആണ് വില. കൊട്ടത്തേങ്ങ ഒന്നിന് 12 മുതൽ 22 രൂപ വരെ വിലയുണ്ട്.
കേരളത്തിൽ നിന്നുള്ള തേങ്ങ അധികവും തമിഴ്‌നാട്ടിലേക്കാണ് കയറ്റി അയക്കുന്നത്. പ്രധാനമായും തേങ്ങ പൗഡറാണ് അവർ നിർമ്മിക്കുന്നത്. എന്തായാലും തേങ്ങ വിലയിലെ കുതിച്ച് ചാട്ടം ചങ്കിടിപ്പോടെയാണ് കേര കർഷകർ നോക്കി കാണുന്നത്.
Also Read: ഇഞ്ചി വിലയിൽ വീണ്ടും വർധന; ഇന്നത്തെ പച്ചക്കറി നിരക്കറിയാം വിശദമായി
