ന്യൂഡല്‍ഹി : മൂന്നാം മോദി സര്‍ക്കാരിന്‍റെ ആദ്യ ബജറ്റ് അവതരണത്തിൽ വ്യവസായ മേഖലയിൽ പ്രഖ്യാപനങ്ങളുമായി കേന്ദ്ര ധനമന്ത്രി നിര്‍മല സീതാരാമന്‍. രാജ്യത്ത് നൂറോളം നഗരങ്ങളിൽ അടിസ്ഥാന സൗകര്യങ്ങളോടെ നിക്ഷേപത്തിന് തയ്യാറുള്ള "പ്ലഗ് ആൻഡ് പ്ലേ" വ്യവസായ പാർക്കുകൾ അനുവദിക്കും. പാർക്കുകളുടെ വികസനം സർക്കാർ സുഗമമാക്കും. ദേശീയ വ്യവസായ ഇടനാഴി വികസന പദ്ധതി വഴി 12 വ്യവസായ പാർക്കുകൾ കൂടി അനുവദിച്ചു.
മുദ്ര വായ്‌പ പരിധി 20 ലക്ഷം രൂപയായി ഉയർത്തി. 'തരുൺ' വിഭാഗത്തിന് കീഴിലുള്ള മുദ്ര വായ്‌പകൾ കൃത്യമായി തിരിച്ചടച്ച സംരംഭകർക്കാണ് വായ്‌പ പരിധി 20 ലക്ഷം രൂപയായി ഉയർത്തിയത്. നിലവിലെ മുദ്ര വായ്‌പ പരിധി 10 ലക്ഷം രൂപയാണ്. ആഭ്യന്തര ധാതുക്കളുടെ ഉത്‌പാദനത്തിനും പുനരുപയോഗത്തിനും അവയുടെ സമ്പാദനത്തിനുമായി ക്രിട്ടിക്കൽ മിനറൽ മിഷൻ രൂപീകരിക്കും. ഇന്ത്യൻ സ്റ്റാർട്ട്-അപ്പ് ഇക്കോ സിസ്റ്റത്തെ ശക്തിപ്പെടുത്തുന്നതിനും സംരംഭകത്വം വർധിപ്പിക്കുന്നതിനുമായി എല്ലാ നിക്ഷേപകരുടെയും ഏഞ്ചൽ ടാക്‌സ് നിർത്തലാക്കി.
സൂക്ഷ്‌മ, ചെറുകിട, ഇടത്തരം സംരംഭങ്ങളുടെ (എംഎസ്‌എംഇ) സ്‌ട്രസ് കാലയളവിൽ വായ്‌പയുടെ തുടർച്ച സുഗമമാക്കുന്നതിന് പുതിയ സംവിധാനം അനുവദിച്ചു. കൂടാതെ ഇത്തരം 50 മൾട്ടി പ്രൊഡക്‌ട് ഫുഡ് പ്രോസസിങ് യൂണിറ്റുകൾക്ക് സാമ്പത്തിക സഹായം പ്രഖ്യാപിച്ചു. എംഎസ്‌എംഇ സംരംഭകരുടെയും പരമ്പരാഗത കരകൗശല തൊഴിലാളികളുടെയും ഉത്‌പന്നങ്ങൾ അന്താരാഷ്‌ട്ര വിപണിയിൽ എത്തിക്കാൻ പൊതു സ്വകാര്യ പങ്കാളിത്തത്തിൽ ഇ കൊമേഴ്‌സ്‌ എക്‌സ്‌പോർട്ട് ഹബ്ബുകൾ സ്ഥാപിക്കും.
തേർഡ് പാർട്ടി ഇല്ലാതെ മെഷിനുകൾ വാങ്ങുന്നതിന് എംഎസ്‌എംഇ സംരംഭകർക്ക് ലോണുകൾ നൽകുന്നതിനായി ക്രെഡിറ്റ് ഗ്യാരണ്ടി സ്‌കീം അവതരിപ്പിക്കും. സെൽഫ് ഫിനാൻസിങ് ഗ്യാരണ്ടി സ്‌കീം വഴി ഓരോ അപേക്ഷകനും 100 കോടി രൂപ വരെ ഗ്യാരണ്ടി പരിരക്ഷ നൽകും.
