ആദ്യ വന്ദേഭാരത് സ്ലീപ്പര്‍ പരീക്ഷണ ഓട്ടത്തിന് തയാര്‍; മന്ത്രിയുടെ പോസ്റ്റിന് കയ്യടി, വിമര്‍ശിച്ചും നെറ്റിസണ്‍സ്

ഇന്‍റഗ്രല്‍ കോച്ച് ഫാക്‌ടറിയില്‍ നിര്‍മിച്ച സ്ലീപ്പര്‍ വന്ദേഭാരത് ട്രെയിന്‍ റെയില്‍വേ മന്ത്രാലയത്തിന് കൈമാറി.

ചെന്നൈ: വന്ദേഭാരത് സ്ലീപ്പര്‍ ട്രെയിന്‍ ഉടന്‍ യാഥാര്‍ഥ്യത്തിലേക്ക്. ഇതിനായി രൂപകല്‍പന ചെയ്‌ത ആദ്യ ട്രെയിന്‍ ചെന്നൈയിലെ ഇന്‍റഗ്രല്‍ കോച്ച് ഫാക്‌ടറിയില്‍ നിന്ന് പരീക്ഷണ ഓട്ടത്തിനായി കൈമാറിയെന്ന് റെയില്‍വേ മന്ത്രാലയം അറിയിച്ചു. വാണിജ്യാടിസ്ഥാനത്തില്‍ ഓടിത്തുടങ്ങും മുമ്പ് നിരവധി തവണ പരീക്ഷണ ഓട്ടമുണ്ടാകുമെന്നും അധികൃതര്‍ വ്യക്തമാക്കി.

പരീക്ഷണ ഓട്ടത്തില്‍ നിരവധി ഘടകങ്ങള്‍ പരിശോധിക്കും. യാത്രക്കാരുമായും പരീക്ഷണ ഓട്ടം നടത്തുമെന്നും അധികൃതര്‍ വ്യക്തമാക്കി. പുത്തന്‍ ട്രെയിനിന്‍റെ വിശേഷങ്ങള്‍ പങ്കുവച്ച് കേന്ദ്ര റെയില്‍വേ മന്ത്രി അശ്വിനി വൈഷ്‌ണവ് സാമൂഹ്യമാധ്യമമായ എക്‌സിലും ഫേസ്ബുക്കിലും കുറിപ്പുകളും ട്രെയിനിന്‍റെ ചിത്രങ്ങളും പങ്കുവച്ചിട്ടുണ്ട്.

ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക

ട്രെയിന്‍ അത്യാധുനിക സംവിധാനങ്ങള്‍ ഉള്ളതാണെന്നും മന്ത്രി വ്യക്തമാക്കി. സുഖകരമായ ഒരു യാത്ര ഉറപ്പ് നല്‍കും. വളരെ വൃത്തിയുള്ള കോച്ചുകളാണ് തയാറാക്കിയിട്ടുള്ളത്. അതേസമയം കേന്ദ്രമന്ത്രിയുടെ പോസ്റ്റിനെ അനുകൂലിച്ചും വിമര്‍ശിച്ചും നിരവധി പേര്‍ രംഗത്ത് എത്തിയിട്ടുണ്ട്. വന്ദേഭാരത് പൂര്‍ണ പരാജയമാണെന്നാണ് ചിലരുടെ പക്ഷം. രൂപകല്‍പന തെല്ലും അനുയോജ്യമല്ലെന്നുമാണ് ഇവരുടെ വാദം.

തേജസും ശതാബ്‌ദിയും രാജധാനിയുമൊക്കെ ഇതിനേക്കാള്‍ മികച്ചതാണെന്ന അഭിപ്രായവും ഇവര്‍ക്കുണ്ട്. വായുസഞ്ചാരം തടസപ്പെടുത്തും വിധമാണ് ജനാലകളുടെ നിര്‍മാണം. ഇത് യാത്രക്കാർക്ക് ശ്വാസം മുട്ടലുണ്ടാക്കും. വന്ദേഭാരതിന്‍റെ വേഗത വര്‍ദ്ധിപ്പിക്കണമെന്ന ആവശ്യവും ഇവര്‍ മുന്നോട്ട് വയ്ക്കുന്നു.

2020-21ല്‍ 84.48 കിലോമീറ്റര്‍ വേഗതയുണ്ടായിരുന്ന ട്രെയിനിന്‍റെ ഇപ്പോഴത്തെ വേഗത 76.25 കിലോമീറ്ററായി കുറച്ചെന്നാണ് വിമർശിക്കുന്നവരുടെ പരാതി. 160 കിലോമീറ്റര്‍ വേഗതയുണ്ടാകും വിധമാണ് ട്രെയിന്‍ രൂപകല്‍പന ചെയ്‌തിട്ടുള്ളത്. എന്നാല്‍ രാജ്യത്ത് പലയിടങ്ങളിലും പലകാരണങ്ങള്‍ കൊണ്ടും ഈ വേഗതയിലേക്ക് എത്തിച്ചേരാനാകുന്നില്ലെന്നും കുറ്റപ്പെടുത്തലുകളുണ്ട്.

'വന്ദേഭാരതിന് അനുയോജ്യമായ റെയില്‍വേ ട്രാക്കുകളല്ല നിലവിലുള്ളത്. നമ്മുടെ ഇപ്പോഴത്തെ ട്രാക്കുകളിലൂടെ 130 കിലോമീറ്ററിലധികം വേഗതയില്‍ ട്രെയിനുകള്‍ക്ക് ഓടാനാകില്ല. ഡല്‍ഹി ആഗ്ര പാത മാത്രമാണ് ഇതിനൊരു അപവാദം. ട്രാക്കുകള്‍ വന്ദേഭാരതിന് അനുയോജ്യമാകും വിധം പുനക്രമീകരിക്കണം' എന്നും പ്രതികൂലിക്കുന്നവർക്ക് അഭിപ്രായമുണ്ട്.

ചില ട്രെയിനുകള്‍ ശരാശരി 104 കിലോമീറ്റര്‍ വേഗതയില്‍ സഞ്ചരിക്കുന്നുണ്ട്. ന്യൂഡല്‍ഹി-പ്രയാഗ്‌രാജ് തീവണ്ടി 634 കിലോമീറ്റര്‍ ദൂരം കേവലം ആറ് മണിക്കൂര്‍ എട്ട് മിനിറ്റ് കൊണ്ട് ഓടിയെത്തുന്നുണ്ട്. അതായത് ശരാശരി 104 കിലോമീറ്ററിലേറെ വേഗത്തില്‍ ഇത് സഞ്ചരിക്കുന്നു. ഇതേ വേഗത ഝാന്‍സി ന്യൂഡല്‍ഹി പാതയിലും പരീക്ഷിക്കാവുന്നതാണ്. കോട്ട-ഡല്‍ഹി പാതയിലും ഇതിന് സാധ്യതയുണ്ട്.

മുംബൈ-ഡല്‍ഹി പാതയിലും ഹൗറ ഡല്‍ഹി പാതയിലും ട്രെയിനുകളുടെ വേഗത 160 കിലോമീറ്ററാക്കാനുള്ള നടപടികള്‍ പുരോഗമിക്കുന്നുണ്ട്. പുത്തന്‍ കോച്ചുകള്‍ എത്തുന്നതോടെ ശരാശരി വേഗത 130 കിലോമീറ്ററാകും. ട്രെയിനുകളുടെ വേഗത കൂടിയെങ്കിലും മിക്കയിടത്തും ട്രെയിന്‍ ടൈംടേബിളുകളില്‍ മാറ്റം വരുത്തിയിട്ടില്ലെന്നും ഇത് മൂലം സമയക്രമം പാലിക്കാന്‍ പലയിടത്തും ട്രെയിനുകള്‍ പിടിച്ചിടുന്ന സ്ഥിതി ഉണ്ടെന്നും ഇവര്‍ ചൂണ്ടിക്കാട്ടുന്നുണ്ട്.

യാത്രക്കാരുടെ ബാഹുല്യമേറെയുള്ള മുംബൈ-പൂനെ പാതയില്‍ യാത്രയില്‍ വിപ്ലവങ്ങള്‍ സൃഷ്‌ടിക്കാനായിട്ടുണ്ടെന്നും ചിലര്‍ ചൂണ്ടിക്കാട്ടുന്നുണ്ട്. ഇത് മുംബൈ-നാസിക് പാതയിലും പരീക്ഷിക്കാവുന്നതാണെന്നും ഇവര്‍ അഭിപ്രായപ്പെടുന്നു. റോഡ് വഴി പോകുമ്പോള്‍ അതിവേഗ പാതകളില്‍ നൂറ് കിലോമീറ്ററിലേറെ വേഗത്തില്‍ നമുക്ക് സഞ്ചരിക്കാനാകുമെന്നും ഇവര്‍ പറയുന്നു.

ഈ ട്രെയിനുകളൊക്കെ എന്ന് നൂറ് കിലോമീറ്ററിലേറെ വേഗത്തില്‍ സഞ്ചരിക്കുമെന്നും ഇവര്‍ ചോദിക്കുന്നു. കൂടുതല്‍ യാത്രക്കാര്‍ക്ക് ഉപയോഗിക്കാനാകും വിധം ഡബിള്‍ ഡക്കര്‍ ട്രെയിനുകള്‍ കൊണ്ടു വരണമെന്നും വിമര്‍ശകര്‍ പറയുന്നു.