ഡല്‍ഹി: മുൻ പ്രധാനമന്ത്രി എന്നതിലുപരി രാജ്യത്തിൻ്റെ സമ്പദ്‌വ്യവസ്ഥയെ ആഗോള തലത്തിലെത്തിച്ച പ്രമുഖ സാമ്പത്തിക വിദഗ്‌ധനാണ് മൻമോഹൻ സിങ്. മുഴുവൻ സമയ രാഷ്‌ട്രീയ പ്രവർത്തകൻ എന്നതിനേക്കാൾ സാമ്പത്തിക വിദഗ്‌ധനായാണ്‌ മൻമോഹനെ വിലയിരുത്തേണ്ടത്‌. ഇന്ത്യയുടെ വിദേശനാണ്യ ശേഖരം വളരെ ശോഷിച്ചിരുന്ന സമയത്താണ് റിസർവ് ബാങ്ക് ഗവർണറായിരുന്ന ഡോ. മൻമോഹൻ സിങ്ങിനെ പ്രധാനമന്ത്രി നരസിംഹറാവു 1991-ൽ ധനകാര്യമന്ത്രിയാകുന്നത്. ആഗോള എണ്ണവില കുതിച്ചുയരുകയും അന്താരാഷ്‌ട്ര നാണയനിധിയിൽ (ഐഎംഎഫ്) നിന്ന് വായ്‌പയ്‌ക്കായി കരുതൽ സ്വർണം പോലും പണയം വെക്കാൻ നിർബന്ധിതരാകുകയും ചെയ്‌തപ്പോൾ, അന്നത്തെ ധനകാര്യമന്ത്രി എല്ലാവരെയും അക്ഷരാര്‍ഥത്തില്‍ ഞെട്ടിച്ചു.
കമ്പനികളോട് ലൈസൻസില്ലാതെതന്നെ ഉത്പാദനം നടത്താനാവശ്യപ്പെടുകയായിരുന്നു. കയറ്റുമതി സബ്‌സിഡി നിർത്തി, രൂപയുടെ മൂല്യം താഴ്ത്തിയാണ് തീരുമാനമെടുത്തത്. ഇത് പരസ്‌പരം മത്സരിക്കുന്ന തരത്തിലേക്ക് വ്യവസായമേഖലയെ ഉണർത്തുകയായിരുന്നു. ലോകം മുഴുവനും ഈ നയം ഉച്ചത്തിലും വ്യക്തമായും കേൾക്കട്ടെ. ഇന്ത്യ ഇപ്പോൾ ഉണർന്നിരിക്കുന്നു. നമ്മൾ ജയിക്കും, മറികടക്കും' തൻ്റെ കന്നി ബജറ്റ് പ്രസംഗത്തിൽ മൻമോഹൻ സിങ് പറഞ്ഞ വാക്കുകളാണിവ. അത്‌ വെറുതേയായില്ല. വിമർശനങ്ങളെ തള്ളി ഇന്ത്യ ലോക നിലവാര സൂചികയിലേക്കുയര്‍ന്നു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാം
കോൺഗ്രസിൻ്റെ നേതൃത്വത്തിൽ യുപിഎ 2004-ൽ അധികാരത്തിലെത്തിയപ്പോൾ സോണിയാ ഗാന്ധിയുടെ വിദേശപൗരത്വം ബിജെപി ഉയർത്തിയതും ഓപ്പറേഷൻ ബ്ലൂസ്‌റ്റാറിലൂടെ അകന്ന സിഖുകാരുടെ വിശ്വാസം വീണ്ടെടുക്കാനുള്ള കോൺഗ്രസിൻ്റെ തീരുമാനവും മൻമോഹൻസിങ്ങിനെ പ്രധാനമന്ത്രി പദത്തിലെത്തിച്ചു. തുടർച്ചയായി 10 വർഷം. അഴിമതി ആരോപണങ്ങളടക്കം മന്ത്രിസഭയ്ക്കെതിരേ ഉയർന്നെങ്കിലും ആരും മൻമോഹനെ അതിന് കുറ്റപ്പെടുത്തിയില്ല.
ഇക്കാലയളവിലും മഹാത്മാഗാന്ധി തൊഴിലുറപ്പുപദ്ധതി, ഭക്ഷ്യസുരക്ഷാ പദ്ധതി, വിവരാവകാശനിയമം തുടങ്ങി ഒട്ടേറെ ക്ഷേമപരിപാടികൾ മൻമോഹൻ സിങ് മന്ത്രിസഭ ആവിഷ്‌കരിച്ചു. രാജ്യസഭാംഗമായിരിക്കെ ധനമന്ത്രിയായും പ്രധാനമന്ത്രിയായും രാഷ്‌ട്രനിർമാണത്തിന് ഡോ. മൻമോഹൻ സിങ് നൽകിയ സംഭാവനകൾ അദ്ദേഹത്തിൻ്റെ സാമ്പത്തിക വിവേകത്തിനും വൈദഗ്ധ്യത്തിനും അപ്പുറമാണ്.
ഇന്ത്യാ ചൈനാ അതിർത്തി തർക്കങ്ങളില്‍ കൊടുമ്പിരികൊണ്ട കാലത്ത് ഊഷ്‌മളമായ വിദേശ ബന്ധമാണ് ഇന്ത്യക്കും ചൈനക്കുമിടയില്‍ മൻമോഹൻ സര്‍ക്കാര്‍ സൂക്ഷിച്ചത്. തര്‍ക്കം ഒത്തുതീർപ്പിലെത്തിക്കാൻ അദ്ദേഹത്തിൻ്റെ ഭരണകാലത്ത് പലവട്ടം ശ്രമങ്ങൾ നടന്നു. 2006 ൽ ചൈനീസ് പ്രസിഡൻ്റ് ഹു ജിൻ്റാവോ ഇന്ത്യ സന്ദർശിക്കുകയും, പിന്നീട് 2008 ജനുവരിയിൽ മൻമോഹൻ സിങ് ചൈന സന്ദർശിക്കുകയും ചെയ്‌തിരുന്നു.
ചർച്ചകളുടേയും സന്ദർശനങ്ങളുടേയും ഫലമെന്നോണം 44 ഓളം വർഷങ്ങളായി അടച്ചിട്ടിരുന്ന നാഥുല പാത വീണ്ടും വ്യാപാര ആവശ്യങ്ങൾക്കായി തുറന്നു. അങ്ങനെ 2010 ഓടെ ചൈന ഇന്ത്യയുടെ രണ്ടാമത്തെ വലിയ വ്യാപാര പങ്കാളിയായി മാറുകയായിരുന്നു. ഇന്ന് ശത്രു രാജ്യമായി നില കൊള്ളുന്ന ചൈനക്കും ഇന്ത്യക്കുമിടയില്‍ ഇങ്ങനെയൊരു ചരിത്രം കൂടിയുണ്ട്.
സിഖ്‌മതസ്ഥനായ ആദ്യ പ്രധാനമന്ത്രിയും, ഹൈന്ദവ സമുദായത്തിൽ നിന്നല്ലാത്ത പ്രധാനമന്ത്രിയാവുന്ന ആദ്യത്തെ വ്യക്തിയും കൂടെയാണ് മൻമോഹൻ സിങ്. ഇടതുപക്ഷ കക്ഷികളുടെ പിന്തുണയോടെയായിരുന്നു ഇദ്ദേഹത്തിൻ്റെ സർക്കാർ നിലവിൽ വന്നത്. പഞ്ചാബ്‌ സർവ്വകലാശാല, കേംബ്രിഡ്‌ജ് സർവകലാശാല, ഓക്‌ഫോഡ് സർവകലാശാല എന്നിവിടങ്ങളിൽ പഠിച്ചാണ്‌ ഡോ. സിങ് സാമ്പത്തിക ശാസ്‌ത്രത്തിൽ അവഗാഹം നേടിയത്‌.
റിസർവ് ബാങ്ക് ഗവർണർ എന്നനിലയിൽ ദേശീയതലത്തിലും അന്താരാഷ്‌ട്ര നാണയനിധി(ഐ.എം.എഫ്.) അംഗമെന്നനിലയിൽ അന്താരാഷ്‌ട്ര തലത്തിലും ശ്രദ്ധനേടിയ ശേഷമാണ്‌ രാഷ്‌ട്രീയത്തിലെത്തുന്നത്‌. ജവഹർലാൽ നെഹ്റുവിനു ശേഷം അഞ്ചു വർഷം അധികാരം പൂർത്തിയാക്കിയ ശേഷം പ്രധാനമന്ത്രി പദത്തിൽ വീണ്ടുമെത്തുന്ന പ്രധാനമന്ത്രിയായി കൂടിയാണ് സിംഗ്.
