ന്യൂഡൽഹി: തെഹക്‌വാഡ ആക്രമണക്കേസിലെ പ്രതികൾക്ക് ജീവപര്യന്തം. സുരക്ഷാ സേനയെ നക്‌സൽ കേഡർമാർ ആക്രമിച്ചതുമായി ബന്ധപ്പെട്ട 2014 ലെ തെഹക്‌വാഡ ആക്രമണക്കേസിലെ നാല് പ്രതികൾക്ക് ദേശീയ അന്വേഷണ ഏജൻസി (എന്‍ഐഎ) കോടതി ജീവപര്യന്തം തടവിന് വിധിച്ചു. ഛത്തീസ്‌ഗഡിലെ ബസ്‌തർ, സുക്‌മ ജില്ലകളിൽ നിന്നുള്ള മഹാദേവ് നാഗ്, കവാസി ജോഗ, ദയാറാം ബാഗേൽ, മണിറാം മദിയ എന്നിവരാണ് ജീവപര്യന്തം തടവിന് വിധിക്കപ്പെട്ട നക്‌സൽ അംഗങ്ങൾ.
നിരോധിത ഭീകര സംഘടനയുടെ നേതാക്കളുടെ മേൽനോട്ടത്തിലും നിർദേശത്തിലുമാണ് ഇവർ പ്രവർത്തിച്ചിരുന്നത്. ഛത്തീസ്‌ഗഡിലെ സുക്‌മ ജില്ലയിലെ തോങ്പാൽ പൊലീസ് സ്റ്റേഷൻ പരിധിയിൽ 100 സായുധ നക്‌സലുകൾ നടത്തിയ ആക്രമണത്തിൽ പതിനൊന്ന് സെൻട്രൽ റിസർവ് പൊലീസ് സേനാംഗങ്ങളും നാല് സംസ്ഥാന പൊലീസുകാരും ഒരു സാധാരണക്കാരനും കൊല്ലപ്പെട്ടിരുന്നു . 2014 മാർച്ചിൽ സംസ്ഥാന പൊലീസിന്‍റെയും സിആർപിഎഫ് ഉദ്യോഗസ്ഥരുടെയും റോഡ് ഓപ്പണിങ് പാർട്ടിയിലാണ്‌ നക്‌സലുകൾ ആക്രമണം നടത്തിയത്‌.
ആക്രമണത്തിനായി പ്രാദേശിക ഗ്രാമീണരെയും സംഘങ്ങളെയും പ്രതികൾ അണിനിരത്തിയിരുന്നതായി അന്വേഷണത്തിൽ വ്യക്തമായിരുന്നു. നിരോധിത സംഘടനയിലെ മറ്റ് അംഗങ്ങളുമായി ചേർന്ന് ആക്രമണത്തിന് നേതൃത്വം നൽകിയ പ്രതികള്‍ ഐഇഡികൾ പൊട്ടിത്തെറിക്കുകയും സുരക്ഷാ ഉദ്യോഗസ്ഥർക്ക് നേരെ വെടിയുതിർക്കുകയും ചെയ്‌തിരുന്നു. അക്രമികൾ സുരക്ഷാ ഉദ്യോഗസ്ഥരെ കൊലപ്പെടുത്തുകയും അവരുടെ ആയുധങ്ങൾ കൊള്ളയടിക്കുകയും ചെയ്‌തതായും എൻഐഎ കോടതി കണ്ടെത്തിയിരുന്നു.
ഇന്ത്യൻ ശിക്ഷാ നിയമം, ആയുധ നിയമം, സ്ഫോടകവസ്‌തുക്കൾ നിയമം, നിയമവിരുദ്ധ പ്രവർത്തനങ്ങൾ എന്നിവയുടെ പ്രസക്തമായ വകുപ്പുകൾ പ്രകാരം ടോങ്പാൽ പൊലീസ് സ്റ്റേഷനിലാണ് ആദ്യം കേസ് രജിസ്റ്റർ ചെയ്‌തത്. 2014 മാർച്ച് 28 ന് കേസ് വീണ്ടും രജിസ്റ്റർ ചെയ്‌തതിന് ശേഷം എൻഐഎ അന്വേഷണം ഏറ്റെടുക്കുകയും 2015 ഓഗസ്റ്റ് 18 ന് 11 പേരെ പ്രതി ചേര്‍ത്ത് കുറ്റപത്രം സമർപ്പിക്കുകയും ചെയ്‌തിരുന്നു.
