ന്യൂഡൽഹി: എക്‌സൈസ് തീരുവ ചുമത്തുന്നതുമായി ബന്ധപ്പെട്ട 20 വർഷം പഴക്കമുള്ള പ്രശ്‌നം പരിഹരിച്ച് സുപ്രീം കോടതി. ശുദ്ധമായ വെളിച്ചെണ്ണയെ ഭക്ഷ്യ എണ്ണ ആയാണോ സൗന്ദര്യ വർദ്ധക വസ്‌തുക്കളുടെ കീഴിൽ വരുന്ന ഹെയർ ഓയില്‍ ആയാണോ തരംതിരിക്കേണ്ടത് എന്ന സങ്കീര്‍ണമായ ചോദ്യമാണ് കോടതിയുടെ മൂന്നംഗ ബെഞ്ച് പരിഹരിച്ചത്.
2019 നവംബറില്‍ ഇതേ ചോദ്യത്തിന് അന്നത്തെ ചീഫ് ജസ്റ്റിസ് രഞ്ജന്‍ ഗൊഗോയിലും ജസ്റ്റിസ് ആർ ഭാനുമതിയും അടങ്ങിയ ബെഞ്ച് ഭിന്ന വിധിയാണ് പുറപ്പെടുവിച്ചത്. ചെറിയ പാക്കറ്റുകളിലെ വെളിച്ചെണ്ണയെ ഭക്ഷ്യ എണ്ണയായി തരംതിരിക്കാമെന്ന് ഗൊഗോയ്‌ അഭിപ്രായപ്പെട്ടപ്പോൾ, ചെറിയ കുപ്പികളില്‍ പായ്ക്ക് ചെയ്യുന്ന വെളിച്ചെണ്ണയെ ഹെയർ ഓയിൽ ആയി തരംതിരിക്കണമെന്നാണ് ജസ്റ്റിസ് ഭാനുമതി അഭിപ്രായപ്പെട്ടത്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
എന്നാല്‍ ഇക്കാര്യത്തില്‍ ഇപ്പോള്‍ വ്യക്തത വരുത്തിയിരിക്കുകയാണ് സുപ്രീം കോടതി. എണ്ണയെ ബ്രാൻഡ് ചെയ്യുന്നത് ആശ്രയിച്ചായിരിക്കും തരംതിരിക്കാൻ സാധിക്കുകയെന്ന് സിജെഐ സഞ്ജീവ് ഖന്ന, ജസ്റ്റിസുമാരായ സഞ്ജയ് കുമാർ, ആർ മഹാദേവൻ എന്നിവരടങ്ങിയ ബെഞ്ച് വിധി പ്രഖ്യാപിച്ചു. ഭക്ഷ്യ സുരക്ഷാ ചട്ടങ്ങൾക്ക് കീഴിലുള്ള മാനദണ്ഡങ്ങൾ പാലിച്ച് ബ്രാന്‍ഡ് ചെയ്യുന്ന എണ്ണയെ ഭക്ഷ്യയോഗ്യമായ എണ്ണയായി തരംതിരിക്കാം, ഹെയർ ഓയിൽ എന്ന് തരംതിരിക്കുന്ന എണ്ണ ഡ്രഗ്‌സ് ആൻഡ് കോസ്‌മെറ്റിക്‌സ് നിയമത്തിന് കീഴിലുള്ള മാനദണ്ഡം പാലിക്കണമെന്നും ബെഞ്ച് വ്യക്തമാക്കി.
വെളിച്ചെണ്ണയെ ഹെയർ ഓയിൽ എന്ന് തരംതിരിക്കണമെന്ന റവന്യൂ വകുപ്പിന്‍റെ വാദം ജസ്റ്റിസ് കുമാർ തള്ളി. 'ഭക്ഷ്യ എണ്ണ' എന്ന പേരിൽ ചെറിയ അളവിൽ വിൽക്കുന്ന വെളിച്ചെണ്ണയേ ഭക്ഷ്യ എണ്ണയായി മാത്രമേ തരംതിരിക്കാന്‍ കഴിയൂ എന്ന് ജസ്റ്റിസ് പറഞ്ഞു.
500 മില്ലി ലിറ്ററില്‍ താഴെയുള്ള വെളിച്ചെണ്ണ പാക്കറ്റുകള്‍ക്ക് 18 ശതമാനം നികുതി ചുമത്തണം എന്നായിരുന്നു റവന്യൂ വകുപ്പിന്‍റെ ആവശ്യം. എന്നാല്‍ കോടതി വിധിയോടെ ഇത് അഞ്ച് ശതമാനം മാത്രമാകും. നിലവിൽ, ചരക്ക് സേവന നികുതി വ്യവസ്ഥയ്ക്ക് കീഴിൽ, ഭക്ഷ്യ എണ്ണയ്ക്ക് 5% നികുതിയുണ്ട്, അതേസമയം ഹെയർ ഓയിലിന് 18% ആണ്.
'ഇത്തരം ഭക്ഷ്യയോഗ്യമായ വെളിച്ചെണ്ണ ചെറിയ കുപ്പികളില്‍ വിൽക്കുന്നത് എന്നതു കൊണ്ട് തന്നെ, അത് 'ഹെയർ ഓയിൽ' ആയി ഉപയോഗിക്കുന്നതിന് അനുയോജ്യമായ പാക്കേജിങ് അല്ല എന്ന് വ്യക്തമാണ്.
സാമ്പത്തികമായോ ആരോഗ്യപരമായ കാരണങ്ങളാലോ മറ്റ് കാരണങ്ങള്‍ കൊണ്ടോ ഒരാള്‍ പാചക എണ്ണ ചെറിയ അളവിൽ വാങ്ങിയേക്കാം. അത്തരം എണ്ണയുടെ പാക്കേജിങ്ങിന്‍റെ പേരില്‍ അവയെ ഹെയര്‍ ഓയിലായി തരംതിരിക്കാനാവില്ല. അത് ഹെയര്‍ ഓയിലാണെന്ന ലേബലോ മറ്റെന്തെങ്കിലും സൂചന ഉണ്ടെങ്കില്‍ മാത്രമേ വര്‍ഗീകരണം സാധ്യമാകൂ.'- ബെഞ്ച് വ്യക്തമാക്കി. 1985 ലെ സെൻട്രൽ എക്‌സൈസ് താരിഫ് ആക്ടിൻ്റെ ഒന്നാം ഷെഡ്യൂൾ പ്രകാരം വെളിച്ചെണ്ണയെ ഭക്ഷ്യ എണ്ണയായി വ്യക്തമായി തരംതിരിച്ചിട്ടുണ്ടെന്നും കോടതി കൂട്ടിച്ചേര്‍ത്തു.
Also Read: കാർഷിക മാലിന്യങ്ങള്‍ കത്തിച്ചാല്‍ ഇനി കനത്ത പിഴ; നടപടി കര്‍ശനമാക്കാന്‍ ഒരുങ്ങി കേന്ദ്ര സർക്കാർ
