ചണ്ഡീഗഢ് (പഞ്ചാബ്): ആഗ്രഹങ്ങൾ മനസിലൊതുക്കാനുള്ളതല്ല. അത് നടത്തി കാണിക്കാനുള്ളതാണ്. തന്‍റെ 11 വർഷത്തെ ആഗ്രഹങ്ങൾക്ക് ചിറക് വിരിയിച്ചിരിക്കുകയാണ് 71 കാരനായ രേഷം സിങ്. പഞ്ചാബ് റോഡ്‌വേയ്‌സിലെ തന്‍റെ ദീർഘകാല സേവനത്തിന് നന്ദി സൂചകമായി റോഡ്‌വേയ്‌സ് ബസിൻ്റെ ശിൽപം നിർമിച്ച് തന്‍റെ വീടിന്‍റെ മുകളിൽ സ്ഥാപിയ്ക്കുക (Retired employee of Punjab roadways installs government bus on house roof) എന്ന മോഹമാണ് അദ്ദേഹം യാഥാർത്ഥ്യമാക്കിയത്.
പഞ്ചാബ് റോഡ്‌വേയ്‌സിൽ ടെക്‌നിക്കൽ ഡിപ്പാർട്ട്‌മെന്‍റിലെ മുൻ ജീവനക്കാരനാണ് രേഷം സിങ്. നീണ്ട 45 വർഷത്തെ സേവനങ്ങൾക്ക് ശേഷം 2013ലാണ് അദ്ദേഹം വിരമിച്ചത്. കപൂർത്തലയിലെ കാങ് സാഹ്ബു സ്വദേശിയാണ് രേഷം. പഞ്ചാബ് റോഡ്‌വേയ്‌സ് കാരണമാണ് തന്‍റെ ജീവിതം പച്ച പിടിച്ചതെന്നും ഇതിന് നന്ദി സൂചകമായാണ് താൻ വീടിൻ്റെ മേൽക്കൂരയിൽ ബസിന്‍റെ ശിൽപം സ്ഥാപിച്ചതെന്നും അദ്ദേഹം പറഞ്ഞു.
നീലയും വെള്ളയും നിറങ്ങളിൽ ചായം പൂശിയ ബസിന്‍റെ ശിൽപത്തിൽ വിൻഡ് ഷീൽഡിന് മുകളിൽ പിആർടിസി എന്നെഴുതിയിട്ടുണ്ട്. ബസിന്‍റെ പിറകിലായി 'ഷാൻ-എ-പെപ്‌സു' എന്നും എഴുതിയിട്ടുണ്ട്. പെപ്‌സു റോഡ് ട്രാൻസ്‌പോർട്ട് കോർപ്പറേഷൻ എന്നാണ് പഞ്ചാബിലെ സർക്കാർ ബസ് സർവീസിനെ പറയുന്നത്.
തന്‍റെ സ്വപ്‌നം നിറവേറ്റുന്നതിനിടയിൽ അനേകം പ്രതിസന്ധികൾ നേരിട്ടതായി രേഷം സിങ് പറഞ്ഞു. 2018ൽ നിർമാണ പ്രവൃത്തികൾ ആരംഭിച്ചിരുന്നു. എന്നാൽ കൊവിഡ് ബാധിച്ചതോടെ ആരോഗ്യം മോശമാവുകയും ആഴ്‌ചകളോളം ചികിത്സയിലാവുകയും ചെയ്‌ത അദ്ദേഹം തന്‍റെ സ്വപ്‌നങ്ങൾ നിലംപതിക്കുമോ എന്ന ചിന്തയിലായി. തന്‍റെ വർഷങ്ങളുടെ മോഹമായ ബസ് നിർമാണം പൂർത്തിയാക്കാനായി ആരോഗ്യം വീണ്ടു കിട്ടണമെന്ന് അദ്ദേഹം ദൈവത്തോട് പ്രാർത്ഥിച്ചു.
ശാരീരികവും മാനസികവുമായ എല്ലാ പ്രതിസന്ധികളെയും തരണം ചെയ്‌ത് ഒടുവിൽ സ്വപ്‌നം സാക്ഷാത്‌കരിച്ചതായി അദ്ദേഹം പറഞ്ഞു. നിർമാണത്തിനായി ഏകദേശം 3 ലക്ഷം രൂപ ചെലവായിട്ടുണ്ട്. സ്റ്റിയറിങ് മുതൽ എൽഇഡി വരെയുള്ള എല്ലാ ചെറിയ കാര്യങ്ങളും താൻ ബസിൽ സ്ഥാപിച്ചിട്ടുണ്ടെന്ന് രേഷം സിങ് പറഞ്ഞു.
Also read: ആമക്കല്ലിൽ ഇനി ആമ ശിൽപവും: ഉയർന്നു പൊങ്ങുന്നത് 15 അടി ഉയരമുള്ള ശിൽപം
