ന്യൂഡൽഹി : മുൻ അഗ്നിവീറുകള്ക്ക് സിഐഎസ്എഫ് സെക്യൂരിറ്റി വിങ്ങില്‍ 10 ശതമാനം സംവരണം ഏർപ്പെടുത്തി കേന്ദ്ര ആഭ്യന്തര മന്ത്രാലയം. പുതിയ മാർഗനിർദേശങ്ങൾ പ്രകാരം മുൻ അഗ്നിവീർ കമ്മ്യൂണിറ്റിയിൽ നിന്നുള്ള ഉദ്യോഗാർഥികൾക്ക് ഉയർന്ന പ്രായപരിധിയിൽ ഇളവ് ലഭിക്കും.
'അഗ്നിവീറുകളുടെ ആദ്യ ബാച്ചിലെ ഉദ്യോഗാർഥികൾക്ക് ഉയർന്ന പ്രായപരിധിയില്‍ അഞ്ച് വർഷം വരെ ഇളവ് നൽകും. പത്ത് ശതമാനം ഒഴിവുകൾ മുൻ അഗ്നിവീറുകള്‍ക്കായി സംവരണം ചെയ്യും.'- മന്ത്രാലയം പ്രസ്‌താവനയില്‍ അറിയിച്ചു. തുടർന്നുള്ള ബാച്ചുകളിലും മൂന്ന് വർഷത്തെ പ്രായപരിധി നീട്ടും. മുൻ അഗ്നിവീറുകളെ ഫിസിക്കൽ എഫിഷ്യൻസി ടെസ്‌റ്റിൽ നിന്ന് ഒഴിവാക്കുമെന്നും മന്ത്രാലയം അറിയിച്ചിട്ടുണ്ട്.
ജമ്മു കശ്‌മീരിലെ രജൗരി ജില്ലയിൽ നിയന്ത്രണ രേഖയ്ക്ക് സമീപം കുഴിബോംബ് സ്‌ഫോടനത്തിൽ കൊല്ലപ്പെട്ട അഗ്നിവീർ അജയ് സിങ്ങിൻ്റെ മരണത്തെത്തുടർന്ന്, കോൺഗ്രസും മറ്റ് പ്രതിപക്ഷ പാർട്ടികളും അഗ്നിവീർ പദ്ധതിയെക്കുറിച്ച് ഉന്നയിച്ച ആശങ്കകൾക്കിടയിലാണ് ഈ പ്രഖ്യാപനം.
പ്രായപരിധിയിലും ശാരീരികക്ഷമത പരീക്ഷയിലും ഇളവുകൾ നൽകാനുള്ള വ്യവസ്ഥയുണ്ടെന്ന് സെൻട്രൽ ഇൻഡസ്ട്രിയൽ സെക്യൂരിറ്റി ഫോഴ്‌സ് ഡയറക്‌ടർ ജനറൽ നീന സിങ് പറഞ്ഞു. ഈ വ്യവസ്ഥകളുടെ പ്രയോജനം അഗ്നിവീരന്മാർക്ക് ലഭിക്കുന്നുണ്ടെന്ന് സിഐഎസ്എഫ് ഉറപ്പാക്കുമെന്നും, അഗ്നിവീർ റിക്രൂട്ട്മെൻ്റിനൊപ്പം സിഐഎസ്എഫിനും ഇതിന്‍റെ ഫലം ലഭിക്കുമെന്നും നീന വ്യക്തമാക്കി.
'മുൻ അഗ്നിവീരരെ റിക്രൂട്ട് ചെയ്യുന്നതിനുള്ള എല്ലാ ക്രമീകരണങ്ങളും സിഐഎസ്എഫ് ചെയ്‌തിട്ടുണ്ട്. കോൺസ്‌റ്റബിൾ തസ്‌തികകളിൽ പത്ത് ശതമാനം അവർക്കായി സംവരണം ചെയ്‌തിട്ടുണ്ട്. മുൻ അഗ്നിവീറുകള്ക്ക് ഫിസിക്കൽ എഫിഷ്യൻസി ടെസ്‌റ്റിൽ ഇളവ് നൽകും. പ്രായപരിധിയിലും ഇളവുണ്ട്,' - നീന സിങ് പ്രസ്‌താവനയിൽ പറഞ്ഞു.
'മുൻ അഗ്നിവീരന്മാർ അവരുടെ ജീവിതത്തിൻ്റെ നാല് വർഷം സേവനത്തിനായി സമർപ്പിച്ചു, അവർക്ക് പരിശീലനം, അച്ചടക്കം, ചെറിയ പരിശീലനം എന്നിവ നൽകിയ ശേഷം ബിഎസ്എഫ് അവരെ അതിർത്തികളിൽ വിന്യസിക്കും. അവരെ റിക്രൂട്ട് ചെയ്യുന്നതിനായി ഞങ്ങൾ ആകാംക്ഷയോടെ കാത്തിരിക്കുകയാണ്. അവർക്ക് റിക്രൂട്ട്‌മെൻ്റിൽ 10 ശതമാനം സംവരണവും പ്രായത്തിൽ ഇളവുകളും ലഭിക്കും. ആദ്യ ബാച്ചിന് അഞ്ച് വർഷവും തുടർന്നുള്ള ബാച്ചുകൾക്ക് മൂന്ന് വർഷവുമാണ് പ്രായ ഇളവ്' എന്ന് ബിഎസ്എഫ് ഡിജി നിതിൻ അഗർവാൾ പറഞ്ഞു.
എസ്എസ്ബിയിൽ എക്‌സ് - അഗ്നിവീർമാർക്ക് ഒരു ക്വാട്ട നിശ്ചയിച്ചിട്ടുണ്ട്. അതിനനുസരിച്ച് ഞങ്ങൾ റിക്രൂട്ട്‌മെൻ്റ് ചട്ടങ്ങളിൽ ഭേദഗതി വരുത്തിയിട്ടുണ്ട് എന്ന് ഡിജി സശാസ്ത്ര സീമ ബാലും (എസ്എസ്ബി) ദൽജിത് സിധ് ചൗധരിയും അറിയിച്ചു. ആദ്യ ബാച്ചിന് പ്രായപരിധിയിൽ അഞ്ച് വർഷത്തെ ഇളവ് നൽകും. കൂടാതെ, അവർക്ക് ഫിസിക്കൽ എഫിഷ്യൻസി ടെസ്‌റ്റ് ഉണ്ടാകില്ല എന്നും അവർ കൂട്ടിച്ചേർത്തു.
'ആർപിഎഫിലെ ഏത് റിക്രൂട്ട്‌മെൻ്റിനും, മുൻ അഗ്നിവീറുകള്ക്ക് പത്ത് ശതമാനം സംവരണം ഉണ്ടായിരിക്കും. മാത്രമല്ല അവർക്ക് പ്രായത്തിലും ഇളവ് ലഭിക്കും. ആദ്യ ബാച്ചിന് അഞ്ച് വർഷത്തെ ഇളവാണ് ലഭിക്കുക, അതിനുശേഷം മൂന്ന് വർഷമായിരിക്കും. ഇവർക്കായി ഫിസിക്കൽ എഫിഷ്യൻസി ടെസ്‌റ്റും ഉണ്ടാകില്ല. ആർപിഎഫിലെ മുൻ അഗ്നിവീറുകളെ ഞങ്ങൾ സ്വാഗതം ചെയ്യുന്നു' ഡിജി ആർപിഎഫ് മനോജ് യാദവ പറഞ്ഞു.
'സിആർപിഎഫിൽ എക്‌സ് അഗ്‌നിവേർമാരെ റിക്രൂട്ട് ചെയ്യുന്നതിനുള്ള എല്ലാ ക്രമീകരണങ്ങളും ഞങ്ങൾ ചെയ്‌തിട്ടുണ്ട്. ഇതനുസരിച്ച് റിക്രൂട്ട്‌മെൻ്റ് ചട്ടങ്ങളിൽ ഭേദഗതി വരുത്തിയിട്ടുണ്ട്. മുൻ അഗ്നിവീരന്മാർക്ക് പത്ത് ശതമാനം സംവരണം ഏർപ്പെടുത്തിയിട്ടുണ്ട്. പ്രായത്തിലും ഇളവ് ലഭിക്കും. ആദ്യ ബാച്ചിന് അഞ്ച് വർഷം ഇളവ് ലഭിക്കും, അതിനുശേഷം മൂന്ന് വർഷമായിരിക്കും. ഇവർക്കായി ഫിസിക്കൽ എഫിഷ്യൻസി ടെസ്‌റ്റും ഉണ്ടാകില്ല' - സിആർപിഎഫ് ഡിജി അനീഷ് ദയാൽ സിങ് വ്യക്തമാക്കി.
ആർമിയിൽ പരിശീലനം നേടിയവരും ഇതിനകം മൂന്ന് സർവീസുകളിൽ സേവനമനുഷ്‌ഠിച്ചവരുമായതിനാൽ എക്‌സ് - അഗ്നിവീർമാരെ റിക്രൂട്ട് ചെയ്യുന്നതിനുള്ള സേനയ്ക്ക് ഇത് സ്വാഗതാർഹമായ നടപടിയാണ്. ആദ്യ ദിവസം മുതൽ അവർ അർപ്പണബോധവും അച്ചടക്കവും കൊണ്ടുവരുമെന്നും ഡിജി അനീഷ് ദയാൽ സിങ് കൂട്ടിച്ചേർത്തു.
അതേസമയം കഴിഞ്ഞയാഴ്‌ച, പ്രതിപക്ഷ നേതാവ് രാഹുൽ ഗാന്ധി അഗ്നിവീർ പദ്ധതിയിൽ കേന്ദ്ര സർക്കാരിനെ കടന്നാക്രമിക്കുകയും സൈന്യത്തെ ദുർബലപ്പെടുത്താൻ ഇന്ത്യാ സംഘം ഒരിക്കലും അനുവദിക്കില്ലെന്ന് പറയുകയും ചെയ്‌തു. അഗ്നിവീർ അജയ് കുമാറിൻ്റെ കുടുംബത്തിന് സർക്കാരിൽ നിന്ന് ഇതുവരെ ഒരു നഷ്‌ടപരിഹാരവും ലഭിച്ചിട്ടില്ലെന്നും അദ്ദേഹം അറിയിച്ചു.
Also Read: വ്യോമസേനയില്‍ ചേരാം; 'അഗ്നിവീർ' അപേക്ഷ ക്ഷണിച്ചു
