ന്യൂഡല്‍ഹി: കോണ്‍ഗ്രസ് എംപി രാഹുല്‍ ഗാന്ധി തന്‍റെ 54ാം പിറന്നാളിനോട് അനുബന്ധിച്ച് ബുധനാഴ്‌ചയാണ് (ജൂണ്‍ 19) വൈറ്റ് ടീ ഷര്‍ട്ട് കാമ്പയ്‌ന്‍ അഥവ വെള്ള ടീഷര്‍ട്ട് പ്രചാരണത്തിന് തുടക്കമിട്ടത്. വെള്ള നിറം സുതാര്യതയെയും ഐക്യത്തെയും ലാളിത്യത്തെയുമാണ് തുറന്ന് കാട്ടുന്നതെന്ന് രാഹുല്‍ ചൂണ്ടിക്കാട്ടി. നീറ്റ്-നെറ്റ് വിവാദത്തോട് അനുബന്ധിച്ചാണ് തന്നെ പിന്തുണയ്ക്കുന്നവര്‍ വെള്ള ടീ ഷര്‍ട്ട് ധരിക്കാന്‍ അദ്ദേഹം ആഹ്വാനം ചെയ്‌തത്.
രാഹുല്‍ സാധാരണയായി വെള്ള ടീ ഷര്‍ട്ടിലാണ് പ്രത്യക്ഷപ്പെടാറുള്ളത്. ഇത്തരം മൂല്യങ്ങള്‍ നിങ്ങളുടെ ജീവിതത്തില്‍ എത്രമാത്രം ഉപയുക്തമായി എന്നത് ഒരു വീഡിയോയില്‍ നിങ്ങള്‍ എന്നോട് പറയൂ. നിങ്ങള്‍ക്ക് ഞാനൊരു വെള്ള ടീ ഷര്‍ട്ട് സമ്മാനിക്കാം എന്നും ജന്മദിന സന്ദേശത്തിന് നന്ദി പറഞ്ഞു കൊണ്ട് എക്‌സില്‍ പോസ്റ്റ് ചെയ്‌ത വീഡിയോയില്‍ രാഹുല്‍ പറയുന്നു. 'വൈറ്റ് ടീ ഷര്‍ട്ട് ആര്‍മി' എന്ന ഹാഷ് ടാഗില്‍ വീഡിയോ പോസ്റ്റ് ചെയ്യണമെന്നാണ് രാഹുലിന്‍റെ നിര്‍ദേശം. ആര്‍ജി എന്ന ഒപ്പോട് കൂടിയാകും ടീ ഷര്‍ട്ട് നല്‍കുക.
- വെള്ള ടീ ഷര്‍ട്ട് പ്രചാരണത്തിന്‍റെ ഉദ്ദേശ്യ ലക്ഷ്യങ്ങള്‍
ഈ പ്രചാരണത്തിന് പിന്നില്‍ ബൃഹത്തായ ലക്ഷ്യങ്ങളാണ് രാഹുലിനുള്ളത്. യുവാക്കളെ തൊഴിലില്ലായ്‌മയ്ക്കും വിലക്കയറ്റത്തിനും ചോദ്യപേപ്പര്‍ ചോര്‍ച്ചയ്ക്കുമെതിരെ അണിനിരത്തുക എന്നതാണ് അവയില്‍ പ്രധാനം. രാഹുലിന്‍റെ രണ്ട് ഭാരത് ജോഡോ യാത്രയിലൂടെ കോണ്‍ഗ്രസിന് 2024ലെ ലോക്‌സഭ തെരഞ്ഞെടുപ്പില്‍ മികച്ച പ്രകടനം കാഴ്‌ചവയ്ക്കാനായി. ഇതിന്‍റെ തുടര്‍ച്ചയായാണ് രാഹുലിന്‍റെ ഇപ്പോഴത്തെ വെള്ള ടീഷര്‍ട്ട് പ്രചാരണത്തെയും വിലയിരുത്തുന്നത്. ബിജെപിയുടെ കാവി പ്രചാരണത്തെ അവസാനിപ്പിക്കാനുള്ള പ്രചാരണമായും ഇതിനെ വിലയിരുത്തുന്നു.
കഴിഞ്ഞ കൊല്ലം തന്നെ ഇത്തരമൊരു പ്രചാരണ പരിപാടിയെക്കുറിച്ച് രാഹുല്‍ ആലോചിച്ചിരുന്നുവെന്നാണ് സൂചന. എന്നാല്‍ തെരഞ്ഞെടുപ്പ് ഫലം വന്ന ശേഷമാണ് ഇതിനുള്ള ശരിയായ സമയമെന്ന് പിന്നീട് അദ്ദേഹത്തിന് മനസിലാക്കി. ഇതിനൊപ്പം നീറ്റ്/നെറ്റ് പ്രതിഷേധം കൂടി ഉടലെടുത്തതോടെ പ്രചാരണം ആരംഭിക്കാനുള്ള ശരിയായ സമയം വന്നണഞ്ഞതായ് റായ്‌ബറേലി എംപിക്ക് മനസിലായി.
ചോദ്യ പേപ്പര്‍ ചോര്‍ച്ചയില്‍ രാഹുല്‍ ഗാന്ധി കടുത്ത വിമര്‍ശനങ്ങളാണ് പ്രധാനമന്ത്രി നരേന്ദ്ര മോദിക്കെതിരെ ഉയര്‍ത്തിയത്. യുക്രെയ്‌ന്‍ -റഷ്യ യുദ്ധത്തെ അവസാനിപ്പിക്കുമെന്ന് പറയുന്ന മോദിക്ക് പക്ഷേ രാജ്യത്തെ ചോദ്യപേപ്പര്‍ ചോര്‍ച്ച ഇല്ലാതാക്കാനാകുന്നില്ല.
ബിജെപിയുടെ മാതൃസംഘടന വിദ്യാഭ്യാസ സംവിധാനത്തെ കയ്യടക്കിയതോടെയാണ് ചോദ്യപേപ്പര്‍ ചോര്‍ച്ച തുടര്‍ക്കഥയായതെന്നും രാഹുല്‍ ആരോപിച്ചു. ഇത് തുടരുമെന്നും അദ്ദേഹം കൂട്ടിച്ചേര്‍ത്തു. മോദിജി ഇതിന് വേണ്ട സൗകര്യങ്ങള്‍ ഒരുക്കി നല്‍കുന്നു. ഇത് ഒരു ദേശവിരുദ്ധ പ്രവൃത്തിയാണ്.
സര്‍വകലാശാല വൈസ്‌ ചാന്‍സലര്‍മാരെ നിയമിക്കുന്നത് യോഗ്യതയുടെ അടിസ്ഥാനത്തിലല്ല. മറിച്ച് ചില സംഘടനകളുമായുള്ള ബന്ധത്തിന്‍റെ അടിസ്ഥാനത്തിലാണെന്നും രാഹുല്‍ ചൂണ്ടിക്കാട്ടി. ബിജെപി നമ്മുടെ വിദ്യാഭ്യാസ സമ്പ്രദായത്തെ മൊത്തം നശിപ്പിച്ചു. നോട്ട് നിരോധനത്തിലൂടെ മോദി സര്‍ക്കാര്‍ നമ്മുടെ സമ്പദ്ഘടനയോട് ചെയ്‌തത് തന്നെയാണ് ഇപ്പോള്‍ വിദ്യാഭ്യാസ മേഖലയോടും ചെയ്യുന്നത്. വിദ്യാഭ്യാസത്തിന്‍റെ സ്വതന്ത്ര ലക്ഷ്യങ്ങള്‍ ഇല്ലാതാക്കിയതാണ് ഇതിന്‍റെയെല്ലാം മൂലകാരണം. കുറ്റവാളികളെ അറസ്റ്റ് ചെയ്‌ത് ശിക്ഷിക്കണമെന്നും രാഹുല്‍ ആവശ്യപ്പെട്ടു.
