ന്യൂഡല്‍ഹി: ലോക്‌സഭ പ്രതിപക്ഷ നേതാവെന്ന നിലയിലുള്ള രാഹുല്‍ ഗാന്ധിയുടെ ആദ്യ ലോക്‌സഭ പ്രസംഗത്തിന് പിന്നാലെ ഇന്ന് പ്രധാനമന്ത്രി നരേന്ദ്രമോദി ഇന്ന് ലോക്‌സഭയെ അഭിസംബോധന ചെയ്യും. രാഷ്‌ട്രപതിയുടെ നയപ്രഖ്യാപന പ്രസംഗത്തില്‍ നന്ദി പ്രമേയ ചര്‍ച്ചയ്ക്ക് മോദി മറുപടി നല്‍കും. പാര്‍ലമെന്‍റിലെ പ്രസംഗത്തിന് മുമ്പ് ദേശീയ ജനാധിപത്യ സഖ്യത്തിന്‍റെ പാര്‍ലമെന്‍ററി കക്ഷി യോഗത്തില്‍ അദ്ദേഹം പങ്കെടുത്തു.
മൂന്നാം വട്ടവും പ്രധാനമന്ത്രിയായി ചുമതലയേറ്റ ശേഷം ആദ്യമായാണ് മോദി തന്‍റെ എംപിമാരെ അഭിസംബോധന ചെയ്യുന്നത്. ആരോഗ്യ കുടുംബക്ഷേമ സ്റ്റാന്‍ഡിങ്ങ് സമിതിയുടെ റിപ്പോര്‍ട്ടിലെ 143, 154 റിപ്പോര്‍ട്ടുകളിലെ നിരീക്ഷണങ്ങളുടെയും ശുപാര്‍ശകളുടെയും നടപ്പാക്കലിന്‍റെ സ്ഥിതി സംബന്ധിച്ച് ആരോഗ്യമന്ത്രി ജെ പി നദ്ദ പ്രസ്‌താവന നടത്തും. വകുപ്പിന് വേണ്ട ഗ്രാന്‍റുകളുടെ ആവശ്യവും അദ്ദേഹം അവതരിപ്പിക്കും.
ജെ പി നദ്ദ, സഹമന്ത്രിമാരായ ജാതവ് പ്രതാപ്റാവു ഗണപത്റാവു, ജിതിന്‍ പ്രസാദ, കേന്ദ്രമന്ത്രിമാരായ രാംദാസ് അത്തവാല, രാം നാഥ് താക്കൂര്‍, നിത്യാനന്ദ റായ്, സത്യപാല്‍ സിങ് ബാഗേല്‍, ശോഭ കരന്ദ്‌ലാജെ, ബി എല്‍ വര്‍മ്മ, എല്‍ മുരുഗന്‍, അജയ് തമാത്ത, കമലേഷ് പാസ്വന്‍, രവനീത് സിങ് തുടങ്ങിയവര്‍ പേപ്പറുകള്‍ ലോക്‌സഭയുടെ മേശപ്പുറത്ത് വയ്ക്കും.
ലോക്‌സഭ നടപടി സംബന്ധിച്ച പുതിയ ചട്ടങ്ങളുടെ ഇംഗ്ലീഷ്, ഹിന്ദി പതിപ്പുകള്‍ സെക്രട്ടറി ജനറല്‍ സഭയുടെ മേശപ്പുറത്ത് വയ്ക്കും. കഴിഞ്ഞ ദിവസം രാഹുല്‍ ലോക്‌സഭയില്‍ നടത്തിയ പരാമര്‍ശങ്ങള്‍ വലിയ രാഷ്‌ട്രീയ കൊടുങ്കാറ്റാണ് സൃഷ്‌ടിച്ചത്. ഈ പശ്ചാത്തലത്തിലാണ് ഇന്നത്തെ നടപടികള്‍ പുരോഗമിക്കുന്നത്.
