ന്യൂഡല്‍ഹി: പോപ്പുലര്‍ ഫ്രണ്ട് ഓഫ് ഇന്ത്യയുടെ മുന്‍ അധ്യക്ഷന്‍ അബുബക്കറിന്‍റെ ജാമ്യാപേക്ഷ വീണ്ടും തള്ളി സുപ്രീം കോടതി. ഈ ഘട്ടത്തില്‍ ജയില്‍മോചിതനാകേണ്ട യാതൊരു ആവശ്യവുമില്ലെന്നാണ് കോടതിയുടെ വിലയിരുത്തൽ. വൈദ്യപരിശോധന ഫലം പരിശോധിച്ച ശേഷമാണ് സുപ്രീം കോടതി രണ്ടംഗ ബെഞ്ച് കോഴിക്കോട് കൊടുവള്ളി സ്വദേശിയായ അബുബക്കറിന് ജാമ്യം നിഷേധിച്ചത്. ജസ്‌റ്റിസുമാരായ എം എം സുന്ദരേഷ്, രാജേഷ് ബിന്ദാല്‍ എന്നിവരടങ്ങിയ ബെഞ്ചാണ് അബുബക്കറിന്‍റെ ജാമ്യഹര്‍ജി പരിഗണിച്ചത്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
2022 ലാണ് ദേശീയ അന്വേഷണ ഏജന്‍സി അബുബക്കറിനെ അറസ്‌റ്റ് ചെയ്‌തത്. ഭീകര വിരുദ്ധ നിയമമായ യുഎപിഎ പ്രകാരമായിരുന്ന അറസ്‌റ്റ്. അറസ്‌റ്റിന് പിന്നാലെ അപൂര്‍വ അര്‍ബുദ രോഗമായ ഗ്യാസ്‌ട്രോ ഈസോഫേഷ്യല്‍ ജംങ്ഷന്‍ അഡിനോകാര്‍സിനോമ ബാധിതനാണ് താനെന്ന് ചൂണ്ടിക്കാട്ടി നിരവധി തവണ അബുബക്കർ കോടതിയെ സമീപിച്ചിരുന്നു. സമാനമായ ചില ഭീകരവാദ കേസുകളില്‍ ആരോഗ്യ സ്ഥിതി പരിഗണിച്ച് ജാമ്യം നല്‍കിയിട്ടുള്ള സന്ദർഭങ്ങൾ അബുബക്കറിന്‍റെ അഭിഭാഷകന്‍ കോടതിയുടെ ശ്രദ്ധയില്‍ പെടുത്തി. എന്നാൽ കോടതി ഇവ തള്ളുകയായിരുന്നു.
തന്‍റെ കക്ഷിയെ വീട്ടുതടങ്കലില്‍ പാര്‍പ്പിക്കാനുള്ള സാധ്യതകളും അഭിഭാഷകന്‍ കോടതിയോട് ആരാഞ്ഞു. എന്നാല്‍ കേന്ദ്രസര്‍ക്കാരിന്‍റെ അഭിഭാഷകന്‍ ഇതിനെയെല്ലാം ഖണ്ഡിച്ചു. എതിര്‍വാദങ്ങളും കേട്ടശേഷം കോടതി ജാമ്യം നിഷേധിക്കുകയായിരുന്നു. ഹര്ജിക്കാരന് വേണമെങ്കില്‍ വിചാരണക്കോടതിയെ സമീപിക്കാമെന്നും കോടതി വ്യക്തമാക്കിയിട്ടുണ്ട്. 2024 മെയ് മാസം ഡല്‍ഹി ഹൈക്കോടതി അബുബക്കറിന് ജാമ്യം നിഷേധിച്ചിരുന്നു. ഹൈക്കോടതി ഉത്തരവിനെതിരെയാണ് ഹര്ജിക്കാരന് സുപ്രീം കോടതിയെ സമീപിച്ചത്.
കഴിഞ്ഞ നവംബറിലാണ് പരമോന്നത കോടതി അബുബക്കറിനെ വൈദ്യ പരിശോധനയ്ക്ക് വിധേയമാക്കണമെന്ന് എയിംസിനോട് നിര്‍ദ്ദേശിച്ചത്. അടിയന്തര വൈദ്യ സഹായം ആവശ്യമുണ്ടെങ്കില്‍ അക്കാര്യം കോടതിയെ ബോധിപ്പിക്കാനും കോടതി ആശുപത്രി അധികൃതരോട് നിര്‍ദ്ദേശിച്ചിരുന്നു.
അതേസമയം എന്‍ഐഎയ്ക്ക് വേണ്ടി ഹാജരായ അഭിഭാഷകന്‍ തുഷാര്‍ മെഹ്‌ത്ത ആരോഗ്യപ്രശ്‌നങ്ങളുടെ പേരില്‍ ജാമ്യം നല്‍കുന്നതിനെ എതിര്‍ത്തു. നിരവധി തവണ അദ്ദേഹത്തെ എയിംസില്‍ പ്രവേശിപ്പിച്ചതാണ്. എന്നാല്‍ ആശുപത്രിവാസം ആവശ്യമുണ്ടെന്ന് ഒരിക്കല്‍ പോലും വിദഗ്‌ധര്‍ കണ്ടെത്തിയിട്ടില്ലെന്നും അദ്ദേഹം ചൂണ്ടിക്കാട്ടി.
2022-ൽ പോപ്പുലർ ഫ്രണ്ടിനെ നിരോധിച്ചതിന്‍റെ ഭാഗമായാണ് അബൂബക്കർ അറസ്‌റ്റിലായത്. വിവിധ സംസ്ഥാനങ്ങളിൽ ഭീകരവാദ പ്രവർത്തനങ്ങൾ നടത്താൻ പിഎഫ്ഐ അംഗങ്ങൾ ഗൂഢാലോചന നടത്തുകയും, രാജ്യത്തിനകത്തു നിന്നും പുറത്തുനിന്നും ഫണ്ട് ശേഖരിച്ചെന്നുമാണ് കേസ്. ഇന്ത്യന്‍ ഭരണഘടനയ്ക്ക് പകരം രാജ്യത്ത് ഇസ്‌ലാമിക നിയമപ്രകാരമുള്ള ഖിലാഫത്ത് ഭരണം സ്ഥാപിക്കാനായി സര്‍ക്കാരിനെ അട്ടിമറിക്കാന്‍ ലക്ഷ്യമിട്ട് ആയുധ പരിശീലനവും അബുബക്കറിന്‍റെ നേതൃത്വത്തില്‍ നടത്തിയിരുന്നെന്ന് കുറ്റപത്രത്തിലുണ്ട്.
Also Read: പോപ്പുലർ ഫ്രണ്ടിന്‍റെ 56 കോടിയുടെ സ്വത്ത് കണ്ടുകെട്ടി ഇഡി; കൂടുതലും കേരളത്തിൽ
