ഹൈദരാബാദ് : സെക്കന്തരാബാദ് കൻ്റോൺമെൻ്റ് എംഎൽഎ ജി ലാസ്യ നന്ദിത വാഹനാപകടത്തില്‍ മരിച്ചു. ഇന്ന് (23-02-2024) പുലർച്ചെ 5.30 ഓടെയായിരുന്നു അപകടം. കാർ പടഞ്ചെരു ഒആർആർ എന്ന സ്ഥലത്തുവച്ച് നിയന്ത്രണംവിട്ട് ഡിവൈഡറിൽ ഇടിച്ചുകയറുകയായിരുന്നുവെന്ന് പൊലീസ് അറിയിച്ചു. ഗുരുതരമായി പരിക്കേറ്റ ലാസ്യയെ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. ഇവരുടെ പി എ ആകാശിനും ഡ്രൈവർക്കും ഗുരുതരമായി പരിക്കേറ്റു.
10 ദിവസം മുൻപുണ്ടായ വാഹനാപകടത്തില്‍ എംഎൽഎ ലാസ്യ നന്ദിതയ്ക്ക് ചെറുതായി പരിക്കേറ്റിരുന്നു. നൽഗൊണ്ടയിൽ ബിആർഎസ് പൊതുയോഗത്തിൽ പങ്കെടുത്ത് മടങ്ങുമ്പോൾ നർക്കട്ട്പള്ളിക്ക് സമീപം ചെർളപള്ളിയിൽ വച്ച് ഇവർ സഞ്ചരിച്ചിരുന്ന കാർ ഓട്ടോയിൽ ഇടിക്കുകയായിരുന്നു.
ALSO READ : മഹാരാഷ്‌ട്ര മുൻ മുഖ്യമന്ത്രി മനോഹർ ജോഷി അന്തരിച്ചു
അന്തരിച്ച ബിആര്‍എസ് നേതാവ് സായന്നയുടെ മകളാണ് ലാസ്യ നന്ദിത. ആരോഗ്യപ്രശ്‌നങ്ങളെ തുടർന്ന് കഴിഞ്ഞ ഫെബ്രുവരി 19നാണ് സായന്ന മരിച്ചത്. 2023ലെ തെലങ്കാന നിയമസഭ തെരഞ്ഞെടുപ്പിൽ സെക്കന്ദരാബാദ് കന്‍റോൺമെന്‍റ് മണ്ഡ‍ലത്തിൽ നിന്നാണ് ലാസ്യ എംഎൽഎയായി തെരഞ്ഞെടുക്കപ്പെട്ടത്. ലാസ്യ നന്ദിതയുടെ അപ്രതീക്ഷിത വിയോഗത്തിൽ പാര്‍ട്ടി നേതാക്കൾ അനുശോചനം അറിയിച്ചു.
