ന്യൂഡൽഹി: ബംഗ്ലാദേശിലെ എട്ട് ജില്ലകളിൽ വെളളപ്പൊക്കമുണ്ടായതിന് കാരണം ഇന്ത്യയിലെ ഗോമതി നദിയിൽ നിന്നും വെളളം തുറന്ന് വിട്ടതിനാലെന്നുളള ആരോപണം തളളി വിദേശകാര്യ മന്ത്രാലയം. ഗോമതി നദിയ്ക്ക് മുകളിലുളള ഡംബൂർ അണക്കെട്ടിൽ നിന്ന് വെളളം ഒഴുകിപ്പോകുന്ന വൃഷ്‌ടി പ്രദേശങ്ങളിൽ കനത്ത മഴ പെയ്‌തതിനാലാണ് ബംഗ്ലാദേശിലെ എട്ട് ജില്ലകളിൽ വെളളപ്പൊക്കമുണ്ടായതെന്ന് വിദേശകാര്യ മന്ത്രാലയം പ്രസ്‌താവനയിലൂടെ പറഞ്ഞു.
ബംഗ്ലാദേശിലെ നിലവിലെ സാഹചര്യങ്ങൾക്കിടയിൽ ജഗന്നാഥ് സർവകലാശാലയിലെ വിദ്യാർഥികൾ വെള്ളപ്പൊക്കത്തിന് കാരണം ഇന്ത്യയെയാണെന്ന് ചൂണ്ടിക്കാട്ടി പ്രതിഷേധ മാർച്ച് നടത്തി. ധാക്കയെ അറിയിക്കാതെ ഇന്ത്യ, ഡംബൂർ, ഗസൽദോബ അണക്കെട്ടുകളുടെ സ്ലൂയിസ് ഗേറ്റുകൾ തുറന്നതാണ് വെള്ളപ്പൊക്കത്തിന് കാരണമെന്ന് വിദ്യാർഥികൾ ആരോപിച്ചു.
എന്നാൽ ഡംബൂർ അണക്കെട്ടിന് താഴെയുള്ള വലിയ വൃഷ്‌ടിപ്രദേശങ്ങളിൽ കനത്ത മഴ പെയ്‌തതാണ് ബംഗ്ലാദേശിലെ വെള്ളപ്പൊക്കത്തിന് പ്രധാന കാരണമെന്ന് വിദേശകാര്യ മന്ത്രാലയം വ്യക്തമാക്കുകയായിരുന്നു. ബംഗ്ലാദേശിന് 120 കിലോമീറ്റർ മുകളിലായി അതിർത്തിയിൽ നിന്ന് വളരെ അകലെയാണ് ഡംബൂർ അണക്കെട്ട്. ചെറിയ ഉയരമുള്ള (ഏകദേശം 30 മീറ്റർ) അണക്കെട്ടാണിത്. ഓഗസ്റ്റ് 21 മുതൽ ത്രിപുരയിലും ബംഗ്ലാദേശിൻ്റെ സമീപ ജില്ലകളിലും കനത്ത മഴ തുടരുകയാണ്.
Also Read: ജമ്മു കശ്‌മീരില്‍ മേഘവിസ്‌ഫോടനം; വെള്ളപ്പൊക്കം രൂക്ഷം
