ന്യൂഡല്‍ഹി: എഴുത്തുകാരിയും ആക്‌ടിവിസ്‌റ്റുമായ അരുന്ധതി റോയ്‌, സെൻട്രൽ യൂണിവേഴ്‌സിറ്റിയിലെ മുൻ ഇന്‍റർ നാഷണൽ ലോ പ്രൊഫസർ ഷെയ്‌ഖ് സൗക്കത്ത് ഹുസൈന്‍ എന്നിവരെ യുഎപിഎ പ്രകാരം പ്രോസിക്യൂട്ട് ചെയ്യാന്‍ അനുമതി നല്‍കി ഡല്‍ഹി ലഫ്റ്റനന്റ് ഗവര്‍ണര്‍ വിനയ്‌ കുമാര്‍ സക്‌സേന. 2010ല്‍ നടന്ന പരിപാടിക്കിടെ പ്രകോപനപരമായ പ്രസംഗം നടത്തിയെന്നതാണ് കേസ്. 2010 ഒക്‌ടോബർ 28ന് കശ്‌മീരിലെ സാമൂഹിക പ്രവർത്തകനായ സുശീൽ പണ്ഡിറ്റ് നൽകിയ പരാതിയിലാണ് ഇരുവര്‍ക്കുമെതിരെ എഫ്ഐആർ രജിസ്‌റ്റർ ചെയ്‌തത്. വിഷയത്തില്‍ ഇരുവരും ഇതുവരെയും പ്രതികരിച്ചിട്ടില്ല.
രാജ് നിവാസാണ് ഇരുവരെയും പ്രോസിക്യൂട്ട് ചെയ്യാന്‍ ലഫ്. അനുമതി നല്‍കിയതായി അറിയിച്ചത്. 'ഡല്‍ഹി ലഫ്റ്റനന്റ് ഗവര്‍ണര്‍ വിനയ്‌ കുമാര്‍ സക്‌സേന, എഴുത്തുകാരി അരുന്ധതി റോയ്‌, പ്രൊഫസര്‍ ഷെയ്‌ഖ് സൗക്കത്ത് ഹുസൈന്‍ എന്നിവരെ പ്രോസിക്യൂട്ട് ചെയ്യാന്‍ അനുമതി നല്‍കി'യെന്ന് രാജ് നിവാസ് വെള്ളിയാഴ്‌ച (ജൂണ്‍ 14) അറിയിച്ചു. ഇന്ത്യന്‍ ശിക്ഷാനിയമത്തിലെ സിആര്‍പിസി 190 പ്രകാരമാണ് ഇരുവരെയും പ്രോസിക്യൂട്ട് ചെയ്യാന്‍ ഗവര്‍ണര്‍ അനുമതി നല്‍കിയത്.
2010 ഒക്‌ടോബര്‍ 21കോപ്പര്‍നിക്കസ് മാര്‍ഗിലെ എല്‍ടിജി ഓഡിറ്റോറിയത്തില്‍ സംഘടിപ്പിച്ച 'ആസാദി-ദ ഒൺലി വേ' എന്ന പരിപാടിയിലാണ് ഇരുവരും പ്രകോപനപരമായ പ്രസംഗം നടത്തിയത്. കശ്‌മീരിനെ ഇന്ത്യയില്‍ നിന്നും വേര്‍പ്പെടുന്നതിനെ കുറിച്ചാണ് ഇരുവരും സംസാരിച്ചത്. കശ്‌മീര്‍ ഇന്ത്യയുടെ ഭാഗമല്ലെന്നും ഇന്ത്യയില്‍ നിന്നും സ്വാതന്ത്ര്യം നേടാന്‍ ശ്രമിക്കണമെന്നുമാണ് ഇരുവരും പ്രസംഗത്തിലൂടെ പറഞ്ഞത്. ഇതാണ് ഇരുവര്‍ക്കുമെതിരെയുള്ള പരാതിക്ക് കാരണമായത്.
