ന്യൂഡൽഹി : ഇന്ത്യൻ പാർലമെന്‍റും ചെങ്കോട്ടയും ബോംബിട്ട് തകർക്കുമെന്ന്‌ ഖലിസ്ഥാൻ തീവ്രവാദികൾ. കേരളത്തിൽ നിന്നുള്ള രാജ്യസഭാംഗങ്ങളായ വി ശിവദാസിനും എ എ റഹീമിനുമാണ്‌ ഭീഷണി സന്ദേശം ലഭിച്ചത്. ഇന്ന് പാർലമെന്‍റ്‌ സമ്മേളനം ആരംഭിക്കാനിരിക്കെ ഞായറാഴ്‌ച രാത്രി പതിനൊന്നരയോടെയാണ് സന്ദേശമെത്തിയത്.
ഇന്ത്യൻ ഭരണാധികാരികളുടെ കീഴിൽ സിഖുകാർ ഭീഷണി നേരിടുകയാണെന്നും ഖലിസ്ഥാൻ ഹിത പരിശോധന സന്ദേശം ഉയർത്തി പാർലമെന്‍റ്‌ മുതൽ ചെങ്കോട്ട വരെ ബോംബിട്ട് തകർക്കുമെന്നുമായിരുന്നു സന്ദേശം. അതിന്‌ ഇരയാകേണ്ടെങ്കില്‍ എംപിമാർ വീട്ടിലിരിക്കണമെന്നും ഭീഷണി സന്ദേശത്തിൽ പറയുന്നു.
സന്ദേശം ലഭിച്ച ഉടൻ എംപിമാർ ഡൽഹി പൊലീസിന് വിവരം കൈമാറി. ഉദ്യോഗസ്ഥർ സ്ഥലത്തെത്തി എംപിമാരുടെ മൊഴി രേഖപ്പെടുത്തി. പുതിയ പാർലമെന്‍റിലെ ആദ്യ സമ്മേളനത്തിനിടെ ഏതാനും യുവാക്കൾ ലോക്‌സഭയ്ക്കുള്ളിൽ കയറിയത് വലിയ വിവാദമായിരുന്നു. പുതിയ ഭീഷണിയെത്തുടർന്ന് പാർലമെന്‍റിൽ സുരക്ഷ ശക്തമാക്കും.
ALSO READ: 'കൊല്ലുമെന്ന് ഭീഷണിപ്പെടുത്തി നിരന്തരം എസ്എംഎസും ഫോൺ കോളുകളും': ഐഎംഐഎം നേതാവ് അസദുദ്ദീൻ ഒവൈസി
