ന്യൂഡൽഹി : പശ്ചിമ ബംഗാളില്‍ ക്രമസമാധാന നില പൂര്‍ണമായും തകര്‍ന്നെന്ന് ബിജെപി നേതാവും മധ്യപ്രദേശ് മന്ത്രിയുമായ കൈലാഷ് വിജയവർഗിയ. സന്ദേശ്ഖാലി വിഷയത്തിന്‍റെ പശ്ചാത്തലത്തിലായിരുന്നു പ്രതികരണം(Kailash Vijayvargiya On Sandeshkhali Violence).
'പശ്ചിമ ബംഗാളിൽ ക്രമസമാധാനം പാടേ തകർന്നു. സംസ്ഥാനത്ത്‌ സ്‌ത്രീകള്‍ക്ക് നേരെ അതിക്രമം വ്യാപകമാകുന്നു. സ്‌ത്രീകൾ പീഡിപ്പിക്കപ്പെടുമ്പോൾ പൊലീസ് അത് റിപ്പോർട്ട് ചെയ്യുന്നില്ല. മെഴുകുതിരിയുമായി പുറത്തിറങ്ങാറുള്ളവരുടെ മെഴുകുതിരികൾ ഇന്ന് എവിടെയാണെന്ന് മനസിലാകുന്നില്ല' - വിജയവർഗിയ പറഞ്ഞു (Law And Order West Bengal).
അടുത്തിടെ, ലൈംഗികാതിക്രമവും അക്രമവും ആരോപിക്കപ്പെടുന്ന സംഭവങ്ങൾ അന്വേഷിക്കാൻ ചുമതലപ്പെടുത്തിയ ബിജെപി പ്രതിനിധി സംഘത്തെ സന്ദേശ്ഖാലി പ്രദേശത്ത് പൊലീസ് തടഞ്ഞിരുന്നു. ബിജെപി നേതാക്കളായ അന്നപൂർണാദേവി, പ്രതിമ ഭൗമിക്, സുനിത ദുഗൽ, കവിത പടിദാർ, സംഗീത യാദവ്, ബ്രിജ് ലാൽ എന്നിവരുൾപ്പടെയുള്ള സംഘം തുടര്‍ന്ന് ഗവർണർ സിവി ആനന്ദ ബോസിനെ കണ്ടിരുന്നു.
കൂടിക്കാഴ്‌ചയ്ക്ക് ശേഷം സന്ദേശ്ഖാലിയിൽ സ്‌ത്രീ പ്രതിഷേധക്കാരുമായി സംവദിക്കാൻ അനുവദിക്കണമെന്ന് ആവശ്യപ്പെട്ട് സുപ്രീം കോടതിയിൽ ഹർജി സമർപ്പിക്കുമെന്നും പ്രതിനിധി സംഘം അറിയിച്ചിരുന്നു. 'സന്ദേശ്ഖാലിയിലേക്കുള്ള ഞങ്ങളുടെ യാത്ര പാതിവഴിയിൽ തടഞ്ഞതിനെത്തുടർന്ന് മടങ്ങേണ്ടിവന്നു. അവിടേക്ക് പോകാന്‍ അനുവദിക്കണമെന്ന് ആവശ്യപ്പെട്ട് ഞങ്ങൾ സുപ്രീം കോടതിയിൽ ഹർജി നൽകും.
അവിടെ പോവുക തന്നെ ചെയ്യും. സന്ദേശ്ഖാലിയിൽ തൃണമൂൽ ഗുണ്ടകളാലും പൊലീസിനാലും സ്‌ത്രീകളും കുട്ടികളും നവദമ്പതികളും പീഡിപ്പിക്കപ്പെടുന്നത്‌ ഉയർത്തിക്കാട്ടപ്പെടും. അവർക്ക് നീതി ലഭ്യമാക്കും, ബിജെപി പ്രതിനിധി സംഘത്തിലെ അന്നപൂർണ ദേവി ഗവർണറെ സന്ദർശിച്ച ശേഷം മാധ്യമങ്ങളോട്‌ പറഞ്ഞു.
ടിഎംസി നേതാവ് ഷാജഹാൻ ഷെയ്ഖും സഹായികളും തങ്ങൾക്കെതിരെ നടത്തിയ അതിക്രമങ്ങൾക്കെതിരെ സന്ദേശ്ഖാലിയിലെ സ്‌ത്രീകൾ കഴിഞ്ഞ കുറച്ച് ദിവസങ്ങളായി പ്രക്ഷോഭത്തിലാണ്. കേന്ദ്രമന്ത്രിമാരുടെയും എംപിമാരുടെയും ആറംഗ സമിതിക്കാണ് ബിജെപി രൂപം നൽകിയിരുന്നത്.
