ബംഗളൂരു: സംസ്ഥാന അതിർത്തിയിലെ വന്യമൃഗ ശല്യം പരിഹരിക്കാൻ കേരളവും, കര്‍ണാടകവും, തമിഴ്‌നാടും തമ്മില്‍ അന്തര്‍ സംസ്ഥാന സഹകരണ കരാർ. ബന്ദിപ്പൂരിൽ ചേർന്ന മന്ത്രിതല കോർഡിനേഷൻ യോഗത്തിലാണ് തീരുമാനം. യോഗത്തിൽ കേരളം വനം മന്ത്രി എ കെ ശശീന്ദ്രനും കർണാടക വനം മന്ത്രി ഈശ്വര്‍ ഖണ്‍ഡ്രെയും കരാറിൽ ഒപ്പിട്ടു. തമിഴ്‌നാട്ടില്‍നിന്നുള്ള വനം മന്ത്രി എം മതിവേന്ദൻ യോഗത്തില്‍ എത്താത്തതിനാല്‍ ഒപ്പിട്ടിട്ടില്ല. ഒപ്പുവെച്ചില്ലെങ്കിലും തമിഴ്‌നാട് കരാറിന്‍റെ ഭാഗമായിരിക്കും.
എട്ട് ലക്ഷ്യങ്ങള്‍ ഉള്‍പ്പെടുത്തിയ ചാര്‍ട്ടറിലാണ് സംസ്ഥാനങ്ങൾ ഒപ്പിട്ടത്. 1972 ലെ വന്യജീവി സംരക്ഷണ നിയമത്തില്‍ കാലോചിതമായ മാറ്റം വേണമെന്ന് കേരളം യോഗത്തില്‍ ആവശ്യപ്പെട്ടു. നിയമഭേദഗതി എന്ന ആവശ്യത്തിന് തമിഴ്‌നാടും കര്‍ണാടകയും പിന്തുണ നല്‍കി. വന്യമൃഗ സംഘർഷമുള്ള മേഖലകളിൽ അതിവേഗത്തിൽ സംയുക്ത ദൗത്യങ്ങൾ നടപ്പിലാക്കാനും യോഗത്തിൽ ധാരണയായി. നോഡൽ ഓഫീസർമാരെ നിയമിച്ചാണ് മൂന്ന് സംസ്ഥാനങ്ങളും സഹകരണം ഉറപ്പാക്കുക.
വന്യജീവി നിയമത്തില്‍ കാര്യമായ മാറ്റം ആവശ്യമാണെന്ന് വനം മന്ത്രി എ കെ ശശീന്ദ്രന്‍ യോഗത്തിൽ പറഞ്ഞു. വര്‍ഷങ്ങള്‍ മുമ്പുള്ള സാഹചര്യമല്ല ഇപ്പോഴുള്ളത്. ചീഫ് വൈല്‍ഡ് ലൈഫ് വാര്‍ഡന് എല്ലാ അധികാരങ്ങളും നല്‍കിയെന്നാണ് പ്രചാരണം. എന്നാല്‍ പല മാനദണ്ഡങ്ങളും അവര്‍ പാലിക്കേണ്ടതുണ്ടെന്ന് മന്ത്രി ചൂണ്ടിക്കാട്ടി.
ജനങ്ങളെ സഹായിക്കുന്നതിന് കേന്ദ്രമാണ് നിയമത്തില്‍ ഭേദഗതികള്‍ കൊണ്ടുവരേണ്ടത്. സംസ്ഥാനങ്ങള്‍ക്ക് ആവശ്യത്തിന് ഫണ്ട് ഉണ്ടെന്ന് ഉറപ്പുവരുത്തേണ്ട ഉത്തരവാദിത്തവും കേന്ദ്ര സര്‍ക്കാരിനുണ്ട്. ഫണ്ടില്ല എന്നത് കേരളത്തിന്‍റെ മാത്രം പ്രതിസന്ധിയല്ല. കര്‍ണാടകവും തമിഴ്‌നാടും ഇതേ പ്രശ്‌നം അനുഭവിക്കുകയാണെന്നും ശശീന്ദ്രന്‍ കൂട്ടിച്ചേർത്തു.
Also Read: വന്യമൃഗ ശല്യം തടയാൻ ശാസ്‌ത്രീയമായ പ്രതിവിധികൾ സ്വീകരിച്ച് പെരിയാർ ടൈഗർ റിസർവിലെ ജീവനക്കാർ
അതേസമയം വന്യമൃഗശല്യം പ്രതിരോധിക്കാന്‍ കേന്ദ്ര സഹായം കിട്ടുന്നില്ലെന്ന് കര്‍ണാടക വനം മന്ത്രി ഈശ്വര്‍ ഖണ്‍ഡ്രെ ആരോപിച്ചു. റെയില്‍ ഫെന്‍സിങിനാണ് സഹായം ആവശ്യം, അത് ലഭിക്കുന്നില്ല. പിന്നെ എങ്ങനെയാണ് കാട്ടാനകള്‍ നാട്ടിലിറങ്ങുന്നത് തടയാന്‍ സാധിക്കുകയെന്നും അദ്ദേഹം ചോദിച്ചു.
ബന്ദിപ്പൂർ ഫോറസ്‌റ്റ് ഹെഡ് ക്വാർട്ടേഴ്‌സിലാണ് യോഗം ചേർന്നത്. യോഗത്തിൽ മന്ത്രിമാർക്കൊപ്പം മൂന്നു സംസ്ഥാനങ്ങളിലെയും ഉന്നതതല വനംവകുപ്പ് ഉദ്യോഗസ്ഥരും പങ്കെടുത്തു.
