വിപണി കീഴടക്കാൻ പ്രമുഖ കമ്പനികൾ: ഡിസംബറിൽ ഇന്ത്യൻ വിപണിയിലെത്തുന്ന സ്‌മാർട്ട്‌ഫോണുകൾ

തങ്ങളുടെ ഏറ്റവും പുതിയ സ്‌മാർട്ട്‌ഫോണുകൾ ഡിസംബറിൽ ഇന്ത്യൻ വിപണിയിൽ അവതരിപ്പിക്കാനൊരുങ്ങി പ്രമുഖ മൊബൈൽ ഫോൺ നിർമാതാക്കൾ. അടുത്ത മാസം പുറത്തിറങ്ങുന്ന സ്‌മാർട്ട്‌ഫോണുകൾ ഏതൊക്കെയെന്നും, അവയുടെ ഫീച്ചറുകൾ എന്തെല്ലാമെന്നും പരിശോധിക്കാം.

ഹൈദരാബാദ്: ചൈനീസ് വിപണിയിൽ ഈ നവംബറിൽ നിരവധി ഫോണുകൾ പുറത്തിറക്കിയിട്ടുണ്ട്. ഡിസംബറിൽ ഈ ഫോണുകൾ ഇന്ത്യൻ വിപണികളിൽ പുറത്തിറക്കുമെന്നാണ് വിവരം. വരാനിരിക്കുന്ന ചില ഫോണുകളുടെ ഫീച്ചറുകളും ലോഞ്ചിങ് തീയതിയും വെളിപ്പെടുത്തിയെങ്കിലും, ചിലതിന്‍റെ വിശദാംശങ്ങൾ ഇനിയും വരാനിരിക്കുന്നതേയുള്ളൂ. ഇന്ത്യൻ വിപണിയെ കാത്തിരിക്കുന്ന സ്‌മാർട്ട്‌ഫോണുകൾ ഏതെല്ലാമെന്ന് പരിശോധിക്കാം.

iQOO 13 : ക്വാൽകോമിൻ്റെ സ്‌നാപ്ഡ്രാഗൺ 8 എലൈറ്റ് പ്രോസസർ ഉപയോഗിച്ച് പ്രവർത്തിക്കുന്ന iQOO 13 ചൈനീസ് വിപണിയിൽ അവതരിപ്പിച്ചു. പുതിയ സ്‌മാർട്ട്‌ഫോൺ ഇന്ത്യൻ വിപണിയിൽ അവതരിപ്പിക്കാനുള്ള ഒരുക്കത്തിലാണ് കമ്പനി. ഡിസംബർ മൂന്നിന് ഇന്ത്യൻ വിപണിയിലെത്തിക്കുമെന്നാണ് വിവരം. ചൈനീസ് വേരിയൻ്റിലെ അതേ ഫീച്ചറുകളോടെ iQOO 13 ഇന്ത്യയിലെത്തുമെന്നാണ് റിപ്പോർട്ടുകൾ. ഫോണിന് 16GB റാമും 120W ചാർജിങ് പിന്തുണയ്ക്കുന്ന 6,000 mAh ബാറ്ററിയും ലഭിക്കും. കൂടാതെ 6.82 ഇഞ്ച് AMOLED ഡിസ്‌പ്ലേയും ലഭിക്കും. 32എംപി സെൽഫി ക്യാമറയും ഉണ്ടാകും.

റെഡ്‌മി നോട്ട് 14 സീരീസ്: റെഡ്‌മി നോട്ട് 14 സീരീസ് ഇന്ത്യയിൽ ഉടൻ അവതരിപ്പിക്കുമെന്നാണ് ഏറ്റവും പുതിയ റിപ്പോർട്ടുകൾ. റെഡ്‌മി നോട്ട് 14, 14 പ്രോ, 14 പ്രോ പ്ലസ് എന്നീ മോഡലുകളാണ് ഈ സീരീസിൽ പുറത്തിറക്കുക. ഈ സീരീസിലെ എല്ലാ ഫോണുകളും ഡിസംബർ 9 ന് ഇന്ത്യയിൽ അവതരിപ്പിക്കുമെന്നും റിപ്പോർട്ടുകളുണ്ട്.

പുതിയ എഐ ഫീച്ചറുകളും ക്യാമറ ഫീച്ചറുകളും ഫോണിലുണ്ടാകുമെന്ന് ഷവോമി നേരത്തെ അറിയിച്ചിരുന്നു. കഴിഞ്ഞ സെപ്‌റ്റംബറിലാണ് നോട്ട് 14 സീരീസ് ചൈനയിൽ ലോഞ്ച് ചെയ്‌തത്. അടുത്ത മാസം പുറത്തിറങ്ങാനിരിക്കുന്ന ഇന്ത്യൻ വേരിയന്‍റുകൾ ചൈനയുടേതിന് സാമ്യമുള്ളതായാണ് റിപ്പോർട്ടുകൾ.

റിയൽമി 14x : റിയൽമിയുടെ 14x മോഡൽ ഡിസംബറിൽ ലോഞ്ച് ചെയ്യാനാണ് സാധ്യത. 6000 mAh ബാറ്ററിയും 50MP പ്രൈമറി ക്യാമറ സജ്ജീകരണവും ഫോണിലുണ്ടായിരിക്കുമെന്നാണ് റിപ്പോർട്ടുകൾ. എന്നാൽ ഇതുസംബന്ധിച്ച് കമ്പനി ഇതുവരെ വിവരങ്ങൾ നൽകിയിട്ടില്ല. റിയൽമി 14x ഫോണിനെ കുറിച്ചുള്ള കൂടുതൽ വിവരങ്ങൾ വരും ദിവസങ്ങളിൽ ലഭ്യമാകും.

വിവോ X200 സീരീസ്: ഇക്കഴിഞ്ഞ ഒക്ടോബറിൽ ചൈനയിൽ ലോഞ്ച് ചെയ്‌ത വിവോ X200 സീരീസ് ഇന്ത്യയിൽ അവതരിപ്പിക്കാൻ ഒരുങ്ങുകയാണ്. വിവോ X200, വിവോ X200 പ്രോ വേരിയൻ്റുകളാണ് കമ്പനി ഇന്ത്യൻ വിപണിയിൽ എത്തിക്കുക. രണ്ട് ഫോണുകളും പ്രവർത്തിക്കുന്നത് മീഡിയാടെക് ഡയമെൻസിറ്റി 9400 പ്രോസസറിലായിരിക്കും. പ്രോ മോഡലിൽ 90W ചാർജിങ് പിന്തുണയ്‌ക്കുന്ന 6000 mAh ബാറ്ററിയും, X200 ബേസിക് മോഡലിൽ 120W ചാർജിങിനെ പിന്തുണയ്‌ക്കുന്ന 5800 mAh ബാറ്ററിയുമാണ് നൽകിയിരിക്കുന്നത്.

റിയൽമി നാർസോ 70 കർവ്: റിയൽമി അതിൻ്റെ നാർസോ 70 സീരീസിൽ പുതിയ ഫോൺ അവതരിപ്പിക്കാനൊരുങ്ങുകയാണ്. ഡിസംബർ അവസാനത്തോടെയാണ് അവതരിപ്പിക്കുകയെന്നും റിപ്പോർട്ടുകളുണ്ട്. പേര് സൂചിപ്പിക്കുന്ന പോലെ റിയൽമി നാർസോ 70 കർവ് കർവ്‌ഡ് ഡിസ്‌പ്ലേയിലായിരിക്കും അവതരിപ്പിക്കുക. നിലവിൽ ഫോണിനെക്കുറിച്ച് കൂടുതൽ അപ്‌ഡേറ്റുകളൊന്നുമില്ലെങ്കിലും വരും ദിവസങ്ങളിൽ കൂടുതൽ വിവരങ്ങൾ പുറത്തുവരാനാണ് സാധ്യത.