രക്ഷകരാകേണ്ട ആശുപത്രികള്‍ ജീവനെടുക്കുമ്പോള്‍; തുടര്‍ക്കഥയായി അപകടങ്ങള്‍, ഓരോ വര്‍ഷവും പൊലിയുന്നത് നിരവധി ജീവനുകള്‍

കഴിഞ്ഞ കുറച്ച് വര്‍ഷങ്ങള്‍ക്കിടയില്‍ ആശുപത്രികളിലുണ്ടായ തീപിടിത്തത്തില്‍ മാത്രം നഷ്‌ടമായത് നൂറുകണക്കിന് ജീവനുകള്‍

ആശുപത്രികള്‍ ജീവന്‍റെ സുരക്ഷ കേന്ദ്രങ്ങളാണ്. പ്രാര്‍ഥനകളും പ്രതീക്ഷകളുമായി മനുഷ്യര്‍ ഓടിയെത്തുന്നത് ആശുപത്രികളിലേക്കാണ്. സര്‍ക്കാരിന്‍റെയും സ്വകാര്യ വ്യക്തികളുടേതുമായി 70,000 ത്തോളം ആശുപത്രികളാണ് ഇന്ത്യയിലുളളത്.

ജീവന്‍ സംരക്ഷിക്കേണ്ട ഈ ആശുപത്രികള്‍ തന്നെ പലപ്പോഴും മനുഷ്യ ജീവനുകള്‍ കവരാറുമുണ്ട്. കഴിഞ്ഞ കുറച്ച് വര്‍ഷത്തിനുളളില്‍ തന്നെ ആയിരക്കണക്കിന് ജീവനുകളാണ് ആശുപത്രി അപകടങ്ങളില്‍ നഷ്‌ടമായത്. ഇതിന്‍റെ ഏറ്റവും ഒടുവിലത്തെ ഉദാഹരണമാണ് ഉത്തർപ്രദേശിലെ ഝാൻസി മെഡിക്കൽ കോളജിലെ നവജാത ശിശുക്കളുടെ തീവ്രപരിചരണ വിഭാഗത്തിലുണ്ടായ തീപിടിത്തം.

10 നവജാത ശിശുക്കൾക്കാണ് അപകടത്തില്‍ ജീവന്‍ നഷ്‌ടമായത്. നിരവധി കുഞ്ഞുങ്ങള്‍ ഗുരുതരാവസ്ഥയില്‍ ചികിത്സയില്‍ തുടരുകയാണ്. വൈദ്യുതി ഷോർട്ട് സർക്യൂട്ട് മൂലമാകാം തീപിടിത്തമുണ്ടായതെന്നാണ് പ്രാഥമിക നിഗമനം.

ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാം.

അപകടം നടക്കുമ്പോള്‍ മാത്രം വലിയ ചര്‍ച്ചകളും കോളിളക്കങ്ങളും ഉണ്ടാക്കുകയും പിന്നീട് സൗകര്യപൂര്‍വ്വം മറക്കുകയും ചെയ്യുന്ന ഒന്നാണ് ആശുപത്രികളിലെ ഇത്തരം അപകടങ്ങള്‍. അപകടങ്ങള്‍ ഉണ്ടാകാതിരിക്കാനുളള നടപടികള്‍ കൈക്കൊളളാന്‍ അധികൃതര്‍ തയ്യാറാകുന്നില്ല എന്നതാണ് തുടരെ തുടരെ ഉണ്ടാകുന്ന ഇത്തരം അപകടങ്ങളില്‍ നിന്ന് മനസിലാക്കേണ്ടത്.

ആശുപത്രി അപകടങ്ങളില്‍ നഷ്‌ടപ്പെട്ട ജീവനുകള്‍:

09/12/2011: കൊൽക്കത്തയിലെ എഎംആർഐ ആശുപത്രിയിലുണ്ടായ തീപിടിത്തത്തില്‍ 94 ജീവനുകള്‍ നഷ്‌ടമായി. ആശുപത്രിയുടെ പാര്‍ക്കിങ് സ്ഥലത്ത് നിന്ന് തീ കെട്ടിടത്തിലേക്ക് പടരുകയായിരുന്നു.

20/10/2016: ഭുവനേശ്വരിലെ എസ്‌യുഎം ആശുപത്രിയിലുണ്ടായ തീപിടിത്തത്തില്‍ 22 പേര്‍ മരിക്കുകയും 120 പേര്‍ക്ക് പരിക്കേല്‍ക്കുകയും ചെയ്‌തു.

17/12/2018: മഹാരാഷ്‌ട്രയിലെ കംഗർ ഹോസ്‌പിറ്റലിലുണ്ടായ തീപിടിത്തത്തില്‍ എട്ട് പേര്‍ മരിക്കുകയും 145 പേര്‍ക്ക് പരിക്കേല്‍ക്കുകയും ചെയ്‌തു.

13/03/2019: പശ്ചിമ ബംഗാളിലെ മുർഷിദാബാദ് മെഡിക്കൽ കോളജിൽ തീപിടിത്തം ഉണ്ടാവുകയും 30ലേറെ പേര്‍ക്ക് പരിക്കേല്‍ക്കുകയും ചെയ്‌തു. അപകടത്തില്‍ ഒരാള്‍ക്ക് ജീവന്‍ നഷ്‌ടമായി.

06/08/2020: അഹമ്മദാബാദിലെ ആശുപത്രിയിലുണ്ടായ തീപിടിത്തത്തില്‍ എട്ട് പേരുടെ ജീവനാണ് നഷ്‌ടമായത്. കൊവിഡ് ബാധിച്ച് ചികിത്സയിലായിരുന്ന ആളുകളാണ് മരണത്തിനിരയായത്. അപകട സമയത്ത് ആശുപത്രിയില്‍ ചികിത്സയിലുണ്ടായിരുന്ന 40 പേരെ രക്ഷപ്പെടുത്തി. മരിച്ച എട്ട് പേരുടെ കുടുംബത്തിന് പ്രധാനമന്ത്രി രണ്ട് ലക്ഷം രൂപ ധനസഹായം പ്രഖ്യാപിച്ചു.

09/08/2020: രണ്ട് സ്‌ത്രീകളടക്കം 11 പേരാണ് വിജയവാഡയിലെ കൊവിഡ് കെയര്‍ സെന്‍ററിലെ തീപിടിത്തത്തില്‍ മരിച്ചത്. ആന്ധ്ര സര്‍ക്കാര്‍ ബാധിക്കപ്പെട്ട കുടുംബങ്ങള്‍ക്ക് ധനസഹായമായി 50 ലക്ഷം രൂപ നല്‍കി.

10/09/2020: അഹമ്മദാബാദിലെ ഐസിയുവിലുണ്ടായ തീപിടിത്തത്തില്‍ എട്ട് രോഗികള്‍ മരിച്ചു.

27/11/2020: രാജ്‌കോട്ടിലെ ആശുപത്രിയിലുണ്ടായ തീപിടിത്തത്തില്‍ അഞ്ച് കൊവിഡ് രോഗികളുടെ ജീവന്‍ പൊലിഞ്ഞു. ചികിത്സയില്‍ കഴിഞ്ഞിരുന്ന ആറ് പേര്‍ പരിക്കുകളോടെ രക്ഷപ്പെട്ടു.

09/01/2021: ബാന്ദ്രയില്‍ കുട്ടികളുടെ വാര്‍ഡിലുണ്ടായ തീപിടിത്തത്തില്‍ 10 നവജാതശിശുക്കളാണ് മരിച്ചത്. ഒരു ദിവസം പ്രായമുളള കുട്ടികള്‍ മുതല്‍ മൂന്ന് മാസം പ്രായമുളള കുട്ടികളുടെ വരെ ജീവന്‍ അപകടത്തില്‍ നഷ്‌ടമായി. അഞ്ച് ലക്ഷം രൂപ ധനസഹായം പ്രഖ്യാപിച്ചു.

05/10/22: ഉത്തർപ്രദേശിലെ സ്വകാര്യ ആശുപത്രിയിലുണ്ടായ തീപിടിത്തത്തിൽ ഒരു കുടുംബത്തിലെ മൂന്ന് പേരാണ് മരിച്ചത്.

28/01/23: ജാർഖണ്ഡിലെ ധൻബാദിലെ സ്വകാര്യ ആശുപത്രിയിലുണ്ടായ തീപിടിത്തത്തിൽ ഡോക്‌ടർ ദമ്പതികൾ ഉൾപ്പെടെ അഞ്ച് പേര്‍ കൊല്ലപ്പെട്ടു.

26/05/2024: ഡൽഹിയിലെ വിവേക് ​​വിഹാറിലെ ന്യൂ ബോൺ ബേബി കെയർ ആശുപത്രിയിലുണ്ടായ തീപിടിത്തത്തിൽ ഏഴ് നവജാത ശിശുക്കൾ മരിച്ചു.