ന്യൂഡൽഹി: രാജ്യത്തിന്‍റെ വിവിധ ഭാഗങ്ങളിൽ എൻഫോഴ്സ്മെൻ്റ് ഡയറക്‌ടറേറ്റ് (ഇഡി) റെയ്‌ഡ്. 4,037 കോടി രൂപയുടെ ബാങ്ക് തട്ടിപ്പ് കേസിൽ മഹാരാഷ്‌ട്ര, പശ്ചിമ ബംഗാൾ, ബിഹാർ, ജാർഖണ്ഡ്, ആന്ധ്രാപ്രദേശ് എന്നിവിടങ്ങളിലെ വിവിധ സ്ഥലങ്ങളിലാണ് റെയ്‌ഡ് നടത്തിയത്. റെയ്‌ഡിൽ 503.16 കോടി രൂപ വിലമതിക്കുന്ന സ്ഥാവരജംഗമ സ്വത്തുക്കൾ കണ്ടുകെട്ടിയതായി ഇഡി അറിയിച്ചു.
2002ലെ കള്ളപ്പണം വെളുപ്പിക്കൽ നിരോധന നിയമത്തിൻ്റെ (പിഎംഎൽഎ) വകുപ്പുകൾ പ്രകാരം കോർപ്പറേറ്റ് പവർ ലിമിറ്റഡിനും അവരുടെ പ്രൊമോട്ടർമാർക്കും ഡയറക്‌ടർമാരായ മനോജ് ജയസ്വാൾ, അഭിജിത് ജയസ്വാൾ, അഭിഷേക് ജയസ്വാൾ എന്നിവർക്കെതിരെയും രജിസ്‌റ്റർ ചെയ്‌ത കേസിന്‍റെ അടിസ്ഥാനത്തിലാണ് നടപടി.
കോർപ്പറേറ്റ് പവർ ലിമിറ്റഡിന്‍റെയും മനോജ് കുമാർ ജയസ്വാളിന്‍റെ കുടുംബാംഗങ്ങളുടെയും ബാങ്ക് ബാലൻസുകൾ, മ്യൂച്വൽ ഫണ്ടുകൾ, ഓഹരികൾ, വിവിധ ഷെൽ കമ്പനികളുടെ പേരിൽ സമ്പാദിച്ച വിവിധ ഭൂമി സ്വത്തുക്കൾ, കെട്ടിടങ്ങൾ എന്നിവ കണ്ടുകെട്ടിയ സ്വത്തുക്കളിൽ ഉൾപ്പെടുന്നു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
ക്രിമിനൽ ഗൂഢാലോചന, വഞ്ചന, വ്യാജരേഖ ചമയ്ക്കൽ തുടങ്ങിയ കുറ്റങ്ങൾക്ക് കോർപ്പറേറ്റ് പവർ ലിമിറ്റഡിനും അതിന്‍റെ പ്രൊമോട്ടർമാർക്കും ഡയറക്‌ടർമാർക്കും മറ്റുള്ളവർക്കുമെതിരെ സിബിഐ രജിസ്‌റ്റർ ചെയ്‌ത എഫ്ഐആറിന്‍റെ അടിസ്ഥാനത്തിലാണ് ഇഡി അന്വേഷണം ആരംഭിച്ചത്.
പരാതിക്കാരനായ യൂണിയൻ ബാങ്ക് ഓഫ് ഇന്ത്യ പറയുന്നതനുസരിച്ച്, പ്രതികൾ വായ്‌പ ലഭിക്കുന്നതിനായി പ്രോജക്‌ട് കോസ്‌റ്റ് സ്‌റ്റേറ്റ്‌മെന്‍റുകളിൽ കൃത്രിമം കാണിക്കുകയും ബാങ്ക് ഫണ്ടുകൾ വകമാറ്റി 4,037 കോടി രൂപയുടെ (പലിശയടക്കം 11,379 കോടി രൂപ) നഷ്‌ടമുണ്ടാക്കുകയും ചെയ്‌തു.
ഈ കേസിൽ നേരത്തെ നാഗ്‌പൂർ, കൊൽക്കത്ത, വിശാഖപട്ടണം എന്നിവിടങ്ങളിലെ വിവിധ സ്ഥലങ്ങളിൽ തിരച്ചിൽ നടത്തിയ ഇഡി വിവിധ രേഖകളും 223.33 കോടി രൂപയുടെ ലിസ്‌റ്റഡ് ഷെയറുകളും സെക്യൂരിറ്റികളും മ്യൂച്വൽ ഫണ്ടുകളും സ്ഥിരനിക്ഷേപങ്ങളും പിടിച്ചെടുത്തിരുന്നു. മാത്രമല്ല അവരുടെ ബാങ്ക് ബാലൻസും 55.85 ലക്ഷം രൂപയും പിടിച്ചെടുത്തു.
