മയക്കുമരുന്ന് വിറ്റ് സമ്പാദിച്ചത് 23 കോടി; എക്‌സൈസ് കോൺസ്‌റ്റബിൾമാരുടെ സ്വത്തുക്കൾ കണ്ടുകെട്ടി

മയക്കുമരുന്ന് വിറ്റ് രണ്ട് എക്‌സൈസ് കോൺസ്‌റ്റബിൾമാർ സമ്പാദിച്ചത് 23 കോടി രൂപ. സ്വത്തുക്കൾ ടിഎസ്എൻഎബി കണ്ടുകെട്ടി.

ഹൈദരാബാദ് : തെലങ്കാന സ്‌റ്റേറ്റ് ആന്‍റി നാർക്കോട്ടിക് ബ്യൂറോ (ടിഎസ്എൻഎബി) ഉദ്യോഗസ്ഥരുമായി ചേർന്ന് ഷാദ്‌നഗർ പൊലീസ് 23 കോടി രൂപയുടെ സ്വത്തുക്കൾ കണ്ടുകെട്ടി. മയക്കുമരുന്ന് കേസിൽ പ്രതികളുടെ സ്വത്തുക്കൾ ഇത്രയും വലിയ തുകയിൽ കണ്ടുകെട്ടുന്നത് ഇതാദ്യമാണെന്ന് ഇതുസംബന്ധിച്ച് ടിഎസ്എൻഎബി ഡയറക്‌ടർ സന്ദീപ് സാന്ദില്യ ബുധനാഴ്‌ച (20-03-2024) പറഞ്ഞു.

എക്‌സൈസ് വകുപ്പിൽ കോൺസ്‌റ്റബിൾമാരായി ജോലി ചെയ്യുന്ന കാമറെഡ്ഡി ജില്ലയിൽ നിന്നുള്ള രമേഷ്, രംഗറെഡ്ഡി ജില്ലയിലെ ഷബാദിലെ ഗുണ്ടുമല്ല വെങ്കടയ്യ എന്നിവരെ കഴിഞ്ഞ വർഷം ഡിസംബർ 25 ന് 2 കിലോ ആൽപ്രസോളം വിൽക്കുന്നതിനിടെ ഷാദ്‌നഗർ പൊലീസും ടിഎസ്എൻഎബി ഉദ്യോഗസ്ഥരും ചേർന്ന് പിടികൂടിയിരുന്നു. മയക്കുമരുന്ന് നിയന്ത്രണ നിയമപ്രകാരം (Narcotics Control Act) ഇവർക്കെതിരെ കേസെടുത്തിരുന്നു.

മയക്കുമരുന്ന് ഉപയോഗിച്ച് സമ്പാദിച്ച സ്വത്തുക്കൾ കണ്ടുകെട്ടാൻ നിയമത്തിൽ വ്യവസ്ഥയുണ്ട്. ഇതോടെ രണ്ട് പ്രതികളും അൽപ്രസോലം വിറ്റ് സ്വത്ത് സമ്പാദിച്ചതിന്‍റെ വിശദാംശങ്ങൾ പൊലീസ് ശേഖരിച്ചു. ഇരുവർക്കും 23 കോടിയുടെ സ്ഥിര സ്വത്തുക്കൾ ഉണ്ടെന്ന് കണ്ടെത്തിയാണ് ഇവരുടെ സ്വത്തുക്കൾ കണ്ടുകെട്ടിയത്.

വെങ്കടയ്യയ്ക്ക് ഷാദ്‌നഗറിൽ 866.66 യാർഡുള്ള നാല് ഓപ്പൺ പ്ലോട്ടുകളും, ഷാദ്‌നഗർ മണ്ഡലിൽ 21.28 ഏക്കർ കൃഷിഭൂമിയും, ഷാബാദ് മണ്ഡലിൽ 13.04 ഏക്കർ കൃഷിഭൂമിയും, ഭാര്യയുടെ പേരിൽ വാങ്ങിയ 2.22 ഏക്കർ ഭൂമിയും, ഷാദ്‌നഗറിലെ എസ്ബിഐയിൽ മൂന്ന് അക്കൗണ്ടുകളിലായി 4,24,990 രൂപയുടെയും സ്വത്തുക്കളാണ് ഉള്ളത്. രമേശിന് മാരുതി സ്വിഫ്റ്റ് കാറും, കാമറെഡിയിലെ രണ്ട് എസ്ബിഐ അക്കൗണ്ടുകളിലായി 2,21,191 രൂപ പണമുണ്ട്.

മയക്കുമരുന്നുമായി ബന്ധപ്പെട്ട വിവരങ്ങൾ ലഭിക്കുന്നവർ 8712671111 എന്ന നമ്പറിലോ tsnabho-hyd@tspolice.gov.in എന്ന നമ്പരിലോ ബന്ധപ്പെടണമെന്ന് സന്ദീപ് സാന്ദില്യ അഭ്യർത്ഥിച്ചു.

താമരശ്ശേരി ചുരത്തിൽ എംഡിഎംഎയുമായി രണ്ടുപേർ പിടിയിൽ : കോഴിക്കോട് താമരശ്ശേരി ചുരത്തിൽ വൻ ലഹരിമരുന്ന് വേട്ട. 194 ഗ്രാം എംഡിഎംഎ പിടികൂടി. ഉത്തരമേഖല എക്സൈസ് കമ്മിഷണർ സ്ക്വാഡിലെ ഇ ഐ ഷിജുമോന് ലഭിച്ച രഹസ്യവിവരത്തിൻ്റെ അടിസ്ഥാനത്തിലാണ് താമരശ്ശേരി റേഞ്ച് എക്‌സൈസ് സർക്കിൾ സംഘവും, കമ്മിഷണർ സ്‌ക്വാഡും താമരശ്ശേരി സർക്കിൾ ഇൻസ്പെക്‌ടർ ഇ ജിനീഷിൻ്റെ നേതൃത്വത്തിൽ ഉള്ള സംഘവും ഇവരെ പിടികൂടിയത്‌.

താമരശ്ശേരി ചുരം എട്ടാം വളവിൽ നടത്തിയ പരിശോധനയിലാണ് മയക്കുമരുന്ന് പിടികൂടിയത്. KL 57 X4652 നമ്പര്‍ ഇന്നോവ കാറിൽ കടത്തുകയായിരുന്ന മാരക മയക്കുമരുന്നായ 193.762 ഗ്രാം എംഡിഎംഎയാണ് പിടികൂടിയത്. എംഡിഎംഎ കടത്തിയ ഉണ്ണികുളം എസ്റ്റേറ്റ് മുക്ക് നായാട്ടുകുന്നുമ്മൽ വീട്ടിൽ ഫവാസ് (27) ബാലുശ്ശേരി കാട്ടാംവള്ളി പുള്ളാണിക്കൽ വീട്ടിൽ പി ജാസിൽ (23) എന്നിവരെ അറസ്‌റ്റ് ചെയ്‌തു.