ന്യൂഡൽഹി : പൗരത്വ ഭേദഗതി നിയമത്തെ നിയമപരമായും രാഷ്‌ട്രീയമായും നേരിടുമെന്ന് രാജ്യസഭാ എംപിയും സിപിഐ സംസ്ഥാന സെക്രട്ടറിയുമായ ബിനോയ് വിശ്വം. സിഎഎ നടപ്പാക്കുന്നത് ചോദ്യം ചെയ്ത് കൊണ്ട് ബിനോയ് വിശ്വം ഇന്ന് സുപ്രീം കോടതിയെ സമീപിച്ചു. സിഎഎ വ്യവസ്ഥകൾ നമ്മുടെ ഭരണഘടനയുടെ മതേതര തത്വങ്ങൾക്ക് വിരുദ്ധമാണ്. ഇന്ത്യൻ സമൂഹത്തിന്‍റെ ബഹുസ്വരതയ്ക്ക് എതിരായ നിയമം നടപ്പാക്കുന്നത് നിർത്തലാക്കണമെന്ന് ആവശ്യപ്പെട്ട് സുപ്രീം കോടതിയെ സമീപിച്ചിട്ടുണ്ടെന്നും അദ്ദേഹം വ്യക്തമാക്കി.
സിപിഐ ആദ്യ കാലഘട്ടം മുതൽ തന്നെ സിഎഎയെ ശക്തമായി എതിർക്കുന്നുവെന്ന് ബിനോയ് വിശ്വം പറഞ്ഞു. പൗരത്വ ഭേദഗതി ബില്ല്- 2019 രാജ്യത്തെ മുസ്‌ലിംകളെ രണ്ടാം തരം പൗരന്മാരായി കണക്കാക്കുക എന്ന ഗുരു ഗോൾവാൾക്കറുടെ ഫാസിസ്റ്റ് ഉദ്ദേശം നിറവേറ്റാനാണ് ഉദ്ദേശിക്കുന്നതെന്ന് പാർലമെന്‍റിൽ നടന്ന ചർച്ചയിൽ വിമര്‍ശിച്ചിരുന്നു. ഇന്ത്യയിലെ മതേതരത്വത്തിന്‍റെയും സമത്വത്തിന്‍റെയും മരണമണി എന്നാണ് സിഎഎയെ ഞാന്‍ വിശേഷിപ്പിച്ചതെന്നും ബിനോയ് വിശ്വം പറഞ്ഞു.
2019-ൽ സിഎഎയ്‌ക്കെതിരെ പ്രതിഷേധിച്ചതിന് മംഗലാപുരത്ത് വെച്ച് അദ്ദേഹത്തെയും മറ്റ് സിപിഐ പ്രവർത്തകരെയും അന്നത്തെ കർണാടക ബിജെപി സർക്കാർ തടഞ്ഞുവച്ചിരുന്നു.
'തെരഞ്ഞെടുപ്പിന് തൊട്ട് മുമ്പ് ഈ നിയമം നടപ്പിലാക്കുന്നത് ഇന്ത്യയിലെ വിവിധ സമുദായങ്ങൾക്കിടയിൽ വിള്ളലും സംഘർഷവും ഉണ്ടാക്കാനുള്ള ബിജെപിയുടെ അജണ്ടയുടെ ഭാഗമാണ്.വിവേചനപരമായ ഈ നിയമം ഭരണഘടന അനുശാസിക്കുന്ന മൂല്യങ്ങൾക്ക് എതിരാണ്. സമൂഹത്തിലെ എല്ലാ വിഭാഗങ്ങളും ഇത് എതിർക്കേണ്ടതുണ്ട്. പൗരത്വം നൽകുന്നതിന് മതത്തെ അടിസ്ഥാനമാക്കുന്നത് ഭരണഘടനയുടെ പൂർണമായ നിഷേധമാണ്'-"ബിനോയ് വിശ്വം പ്രസ്‌താവനയിൽ പറഞ്ഞു. ഭരണഘടനയുടെ ആമുഖത്തില്‍ നിന്ന് 'സെക്കുലര്‍' 'സോഷ്യലിസ്റ്റ്' പദങ്ങൾ നീക്കം ചെയ്യണമെന്ന സുബ്രഹ്മണ്യൻ സ്വാമിയുടെ ഹർജിക്കെതിരെയും ബിനോയ് വിശ്വം സുപ്രീം കോടതിയില്‍ ഹർജി നല്‍കിയിട്ടുണ്ട്.
Also Read : അസമില്‍ സിഎഎ അപ്രസക്തം; തുറന്ന് പറഞ്ഞ് മുഖ്യമന്ത്രി ഹിമന്ത ബിശ്വ ശർമ
