ഹൈദരാബാദ്: ഒരു വര്‍ഷത്തിനുള്ളില്‍ ഇന്ത്യൻ ഭരണഘടന മാറ്റാൻ പദ്ധതിയിടുകയാണ് ബിജെപിയെന്ന് തെലങ്കാന മുഖ്യമന്ത്രി രേവന്ത് റെഡ്ഡി. പ്രധാനമന്ത്രി നരേന്ദ്ര മോദിയും ബിജെപിയിലെ മറ്റ് ഉന്നത നേതാക്കൾ പിന്നാക്ക വിഭാഗങ്ങൾക്കെതിരെ സർജിക്കൽ സ്ട്രൈക്ക് നടത്തുകയാണെന്നും അദ്ദേഹം ആരോപിച്ചു. 2025-ഓടെ ആർഎസ്എസ് അനുശാസിക്കുന്ന രീതിയിലേക്ക് ഭരണഘടന മാറ്റാനാണ് ബിജെപി ആഗ്രഹിക്കുന്നത്.
അത് നടപ്പാക്കുന്നതിനായി ബിജെപിയ്ക്ക് മൂന്നിൽ രണ്ട് ഭൂരിപക്ഷം വേണ്ടതായുണ്ട്. '400 പാർ' എന്ന മുദ്രാവാക്യം ഇതിന് വേണ്ടിയാണ്. എസ്‌സി /എസ്എടി / ബിസി / ഒബിസി എന്നീ വിഭാഗങ്ങൾക്കെതിരെ നരേന്ദ്ര മോദിയും അമിത് ഷായും ബിജെപിയും സർജിക്കൽ സ്ട്രൈക്ക് നടത്തുകയാണെന്നും രേവന്ത് റെഡ്ഡി പറഞ്ഞു.
അവരുടെ ഈ നീക്കങ്ങളെ ചെറുക്കൻ ശ്രമിക്കുമ്പോൾ രാഹുൽ ഗാന്ധിക്കെതിരെ ആരോപണങ്ങൾ ഉന്നയിക്കുകയാണ് മോദിയും അമിത് ഷായും. 1978 ലാണ്, പിന്നാക്ക വിഭാഗങ്ങൾക്കും ഒബിസികൾക്കും സംവരണം നൽകുന്നതിനായി മണ്ഡല്‍ കമ്മിഷൻ സ്ഥാപിതമായത്. കമ്മിഷൻ വിവിധ സംവരണങ്ങൾ നേടിയെടുക്കുകയും പ്രധാനമന്ത്രി വിപി സിങ് സംവരണം നടപ്പിലാക്കുകയായിരുന്നെന്നും തെലങ്കാന മുഖ്യമന്ത്രി പറഞ്ഞു.
അന്ന് ആർഎസ്എസ് അനുബന്ധ ഗ്രൂപ്പുകൾ മണ്ഡല്‍ കമ്മിഷനെയും സംവരണത്തെയും എതിർത്തിരുന്നു. സുപ്രീം കോടതിയും ബിസി സംവരണം അനുവദിക്കുകയും അത് 50 ശതമാനത്തിലധികമാകാൻ പാടില്ലെന്ന വ്യവസ്ഥയും നൽകുകയായിരുന്നു.
എന്നാൽ, ഇപ്പോൾ 50 ശതമാനം പരിധി നീക്കണമെന്ന ആവശ്യം നിരവധി ബിസി, ഒബിസി നേതാക്കൾ രാഹുൽ ഗാന്ധിയോട് ഉന്നയിച്ചിട്ടുണ്ട്. ഞങ്ങൾ അധികാരത്തിൽ വന്നയുടൻ പിന്നാക്ക വിഭാഗ സെൻസസ് നടത്തുമെന്നും അതിനനുസരിച്ച് സംവരണം നൽകുമെന്നും രാഹുൽ ഗാന്ധി പറഞ്ഞിരുന്നുന്നതായും മുഖ്യമന്ത്രി റെഡ്ഡി കൂട്ടിച്ചേർത്തു.
ഇന്ത്യയെ സംവരണ രഹിത രാജ്യമാക്കുക എന്ന ആർഎസ്എസ് ആശയമാണ് ബിജെപി ഇപ്പോൾ നടപ്പാക്കികൊണ്ടിരിക്കുന്നത്. കൂടാതെ രാജ്യത്തെ മുഴുവൻ ഒരൊറ്റ ഹിന്ദു രാഷ്ട്രമായി മാറ്റാനുമുള്ള ഗൂഢാലോചനയാണ് ആർഎസ്എസ് നടത്തുന്നത്. ആർട്ടിക്കിൾ 370, മുത്തലാഖ്, പൗരത്വ ഭേദഗതി നിയമം തുടങ്ങിയ ആർഎസ്എസ് ആശയങ്ങൾ ബിജെപി ഇതിനോടകം നടപ്പാക്കി കഴിഞ്ഞു.
പ്രധാനമന്ത്രി മോദിക്ക് തോൽക്കുമെന്ന് ഭയമുണ്ടെന്നും വിവിധ ഭാഷകളിലും മതങ്ങളിലും മറ്റുമുള്ള ആളുകൾക്കിടയിൽ ഭിന്നിപ്പും സംഘർഷവും സൃഷ്‌ടിക്കാനാണ് അദ്ദേഹം ആഗ്രഹിക്കുന്നതെന്നും മുഖ്യമന്ത്രി ആരോപിച്ചു.
