സിഖ് പൊലീസുകാരനെ ഖലിസ്ഥാനി എന്ന് വിളിച്ച് അധിക്ഷേപിച്ചു; സുവേന്ദു അധികാരിക്കെതിരെ നടപടി

ധമഖാലിയിൽ പ്രഖ്യാപിച്ച നിരോധനാജ്ഞ നടപ്പാക്കാൻ ചൊവ്വാഴ്‌ച രാവിലെ പൊലീസ് സേനയെ വിന്യസിച്ചപ്പോഴാണ് സംഭവമുണ്ടായത്. ഒരു പൊലീസുദ്യോഗസ്ഥനുമായുള്ള വാക്കുതര്‍ക്കത്തിനിടെ സുവേന്ദു അധികാരി ഉദ്യോഗസ്ഥനെ ഖലിസ്ഥാനി എന്ന് വിളിച്ച് അധിക്ഷേപിക്കുകയായിരുന്നു.

കൊല്‍ക്കത്ത : പശ്ചിമ ബംഗാള്‍ പ്രതിപക്ഷ നേതാവും ബിജെപി നേതാവുമായ സുവേന്ദു അധികാരി സിഖുകാരനായ പൊലീസുകാരനെ ഖലിസ്ഥാനി എന്ന് വിളിച്ച് അധിക്ഷേപിച്ചതായി പരാതി (BJP leader Suvendu Adhikari Khalistani remark on Police officer). പശ്ചിമ ബംഗാള്‍ പൊലീസ് തന്നെയാണ് ഇക്കാര്യം എക്‌സ് പോസ്റ്റിലൂടെ അറിയിച്ചത്. സുവേന്ദു അധികാരിയുടെ പരാമർശം വംശീയവും വർഗീയവും ക്രിമിനൽ കുറ്റകൃത്യവുമാണെന്ന് പൊലീസ് എക്‌സില്‍ കുറിച്ചു. മതപരമായ സ്വത്വത്തിന് മേലുള്ള അധിക്ഷേപത്തെ അപലപിച്ച പൊലീസ് നിയമ നടപടികൾ ആരംഭിച്ചതായും അറിയിച്ചു.

'ഞങ്ങൾ, പശ്ചിമ ബംഗാൾ പൊലീസ് പ്രതിഷേധം അറിയിക്കുന്നു. ഞങ്ങളുടെ ഓഫിസർമാരിലൊരാളെ സംസ്ഥാന പ്രതിപക്ഷ നേതാവ് 'ഖലിസ്ഥാനി' എന്ന് വിളിച്ച് അധിക്ഷേപിച്ചു. അദ്ദേഹം അഭിമാനിയായ ഒരു സിഖുകാരനും നിയമം നടപ്പാക്കാൻ ശ്രമിക്കുന്ന പൊലീസുകാരനായതുമാണ് കുറ്റം. അധിക്ഷേപം വർഗീയവും വംശീയവുമാണ്. ഇതൊരു ക്രിമിനൽ കുറ്റകൃത്യം കൂടിയാണ്. ഒരു വ്യക്തിയുടെ മതപരമായ സ്വത്വത്തിനും വിശ്വാസങ്ങൾക്കും നേരെയുള്ള ആക്രമണത്തെ ഞങ്ങൾ അസന്നിഗ്ദ്ധമായി അപലപിക്കുന്നു. ഇതിനെതിരെ കർശനമായ നിയമ നടപടികൾ ഉണ്ടാകും' -പൊലീസ് എക്‌സ് പോസ്റ്റില്‍ കുറിച്ചു.

ബിജെപിയുടെ വിഭജന രാഷ്‌ട്രീയം ഭരണഘടനയുടെ അതിര്‍വരമ്പുകള്‍ ലംഘിച്ചുവെന്ന് പശ്ചിമ ബംഗാള്‍ മുഖ്യമന്ത്രി മമത ബാനര്‍ജി വിമര്‍ശിച്ചു. 'ഇന്ന്, ബിജെപിയുടെ വിഭജന രാഷ്ട്രീയം ഭരണഘടനയുടെ അതിർവരമ്പുകൾ ലംഘിച്ചിരിക്കുകയാണ്. ടര്‍ബന്‍ ധരിക്കുന്ന എല്ലാവരും ഖലിസ്ഥാനികളാണ് എന്നാണ് ബിജെപിയുടെ അഭിപ്രായം. നമ്മുടെ സിഖ് സഹോദരന്മാരുടെയും സഹോദരിമാരുടെയും അഭിമാനം തകർക്കാനുള്ള ഈ ശ്രമത്തെ ഞാൻ ശക്തമായി അപലപിക്കുന്നു. ബംഗാളിന്‍റെ സാമൂഹിക ഐക്യം സംരക്ഷിക്കുന്നതിൽ ഞങ്ങൾ പ്രതിജ്ഞാബദ്ധരാണ്. സാമൂഹിക ഐക്യം തകർക്കാനുള്ള ശ്രമങ്ങൾക്കെിതിരെ കർശനമായ നിയമ നടപടികൾ സ്വീകരിക്കും' -മമത ബാനര്‍ജി എക്‌സില്‍ കുറിച്ചു.

കോണ്‍ഗ്രസ് നേതാവ് രാഹുല്‍ ഗാന്ധിയും സംഭവത്തെ അപലപിച്ചു. ബിജെപിയുടെ വെറുപ്പിന്‍റെ വിഷം അവരെ അന്ധരാക്കി എന്നും അവര്‍ക്ക് കര്‍ഷകരെയോ സൈനികരെയോ കണ്ണില്‍ കാണുന്നില്ലെന്നും കാക്കിയിലുള്ള ഓഫിസറെ ബഹുമാനിക്കാനാകുന്നില്ലെന്നും രാഹുല്‍ ഗാന്ധി വിമര്‍ശിച്ചു.

ധമഖാലിയിൽ ചൊവ്വാഴ്‌ച (20.02.2024) രാവിലെ സെക്ഷൻ 144 നടപ്പാക്കാൻ പൊലീസ് സേനയെ വിന്യസിച്ചപ്പോഴാണ് സംഭവമുണ്ടായതെന്ന് ദക്ഷിണ ബംഗാൾ എഡിജി സുപ്രതിം സർക്കാർ പറയുന്നു. ഇന്‍റലിജൻസ് ബ്രാഞ്ച് എസ്എസ്‌പി, ഐപിഎസ് ജസ്‌പീത് സിങ്ങിന്‍റെ നേതൃത്വത്തിലായിരുന്നു സേന. സുവേന്ദു അധികാരി ഉൾപ്പെടെ നിരവധി എംഎൽഎമാർ സന്ദേശ്ഖാലിയിലേക്കുള്ള യാത്രയ്ക്കായി ധമഖാലിയിൽ എത്തിയിരുന്നു. ഒരു പൊലീസ് ഉദ്യോഗസ്ഥനുമായുള്ള വാക്കേറ്റത്തിനിടെ സുവേന്ദു അധികാരി ഉദ്യോഗസ്ഥനെ ഖലിസ്ഥാനി എന്ന് വിളിച്ചുവെന്നും അദ്ദേഹം പറഞ്ഞു.

തൃണമൂൽ കോൺഗ്രസ് നേതാവ് ഷെയ്ഖ് ഷാജഹാനും സംഘവും നടത്തിയ അതിക്രമങ്ങൾക്കെതിരെ വനിതകള്‍ 10 ദിവസത്തിലധികമായി സന്ദേശ്ഖാലിയില്‍ പ്രതിഷേധിക്കുകയാണ്. തൃണമൂൽ കോൺഗ്രസ് നേതാവ് ഷാജഹാൻ ഷെയ്ഖും സംഘവും ബലമായി ഭൂമി തട്ടിയെടുക്കുകയും ലൈംഗികമായി പീഡിപ്പിക്കുകയും ചെയ്‌തു എന്നാണ് സന്ദേശ്ഖാലിയിലെ സ്‌ത്രീകളുടെ ആരോപണം.

പ്രതിഷേധത്തിനിടെ, തിങ്കളാഴ്‌ച (19.02.2024) റിപ്പബ്ലിക് ടിവിയുടെ ഒരു മാധ്യമപ്രവർത്തകനെ പശ്ചിമ ബംഗാൾ പൊലീസ് സന്ദേശ്ഖാലിയിൽ നിന്ന് അറസ്റ്റ് ചെയ്‌തിരുന്നു. സംഭവത്തില്‍ വിശദീകരണം തേടി ദേശീയ മനുഷ്യാവകാശ കമ്മിഷൻ പശ്ചിമ ബംഗാൾ പൊലീസ് ഡയറക്‌ടർ ജനറലിന് നോട്ടിസ് അയച്ചിട്ടുണ്ട്. ജനുവരി 5 ന്, റേഷൻ തട്ടിപ്പുമായി ബന്ധപ്പെട്ട് ഷാജഹാന്‍റെ സ്ഥാപനങ്ങൾ പരിശോധിക്കാനെത്തിയ എൻഫോഴ്‌സ്‌മെന്‍റ് ഡയറക്‌ടറേറ്റ് ഉദ്യോഗസ്ഥരെ ഇയാളുടെ കൂട്ടാളികള്‍ ആക്രമിച്ചിരുന്നു. ഇതേ തുടർന്ന് ഷാജഹാൻ ഒളിവിലാണ്.