വിരുദുനഗര്‍ ക്വാറിയില്‍ സ്ഫോടനം, നാല് മരണം
വിരുദുനഗര്‍ : തമിഴ്‌നാട്ടിലെ വിരുദുനഗറില്‍ ക്വാറിയിലുണ്ടായ പൊട്ടിത്തെറിയില്‍ നാല് മരണം. വിരുദുനഗര്‍ ജില്ലയിലെ കരിയപാട്ടിയിലാണ് ദുരന്തമുണ്ടായത്. അവിയൂര്‍ -കീലൗപാലികുണ്ട് റോഡില്‍ പ്രവര്‍ത്തിക്കുന്ന സ്വകാര്യ ക്വാറിയിലാണ് അപകടമുണ്ടായത്. പാറയില്‍ നിന്ന് ഗ്രാവലും എം സാന്‍ഡും മറ്റും ഉത്പാദിപ്പിക്കുന്ന കേന്ദ്രമാണിത്.
പാറ തകര്‍ക്കുന്നതിനായി ഉപയോഗിക്കുന്ന സ്ഫോടക വസ്‌തുക്കള്‍ പൊട്ടിത്തെറിച്ചാണ് അപകടമുണ്ടായത്. സ്ഫോടക വസ്‌തുക്കള്‍ വാഹനത്തില്‍ നിന്ന് ഇറക്കുന്നതിനിടെയാണ് അപകടം ഉണ്ടായതെന്നാണ് പ്രാഥമിക വിവരം.
സ്ഫോടകവസ്‌തുക്കള്‍ എത്തിച്ച രണ്ട് വാഹനങ്ങള്‍ പൂര്‍ണമായും തകര്‍ന്നു. സമീപപ്രദേശത്തെ 20 കിലോമീറ്റര്‍ ചുറ്റളവില്‍ ആഘാതമുണ്ടായിട്ടുണ്ട്. വീടുകള്‍ക്ക് കേടുപാടുകള്‍ സംഭവിച്ചതായും റിപ്പോര്‍ട്ടുണ്ട്.
