अँटिलिया प्रकरणात सचिन वाझेंकडून एनआयएने करून घेतले नाट्य रूपांतर

मुंबई - उद्योगपती मुकेश अंबानी यांच्या मुंबईतील कार मायकल रोडवर असलेल्या अँटिलिया या इमारतीच्या बाहेर 25 फेब्रुवारी स्फोटकांसह एक स्कॉर्पिओ गाडी पार्क करण्यात आली होती. या घटनेच्या तपास प्रकरणी एनआयएने निलंबित पोलीस अधिकारी सचिन वाझे यांना अटक केली आहे. घटनेच्या दिवशी एक पीपीई कीट घातलेली व्यक्ती त्या रोडवरून फिरत असल्याचे सीसीटीव्ही फुटेज तपास यंत्रेणांच्या हाती लागले होते. ती व्यक्ती सचिन वाझेंच असल्याचा संशय एनआयएला आहे. त्यासाठी शुक्रवारी राष्ट्रीय तपास यंत्रणेच्या अधिकाऱ्यांनी सचिन वाझे यास ताब्यात घेऊन त्यांना तशाच प्रकारचे कपडे पुन्हा घालण्यात आले आणि वाझे यांना त्या रोडवरून चालण्यास सांगितले. सीसीटीव्ही फुटेजमधील व्यक्तीचे नाट्य रुपांतर करून एनआयए पीपीई कीटमधील ती व्यक्ती सचिन वाझेच आहे का याचा तपास करणार आहे.