Chandrayaan-3 : चांद्रयान-३ चंद्राच्या अगदी जवळ; 23 ऑगस्टला करणार लँडिंग

पुणे : इस्रोने चांद्रयान 3 चे अवकाशात प्रक्षेपण केल्यानंतर 14 ऑगस्टला चांद्रयानाने चंद्राच्या कक्षेत प्रवेश केला. यापूर्वी हे यान चंद्राभोवती लंबवर्तुळाकार कक्षेत फिरत होते. लँडिंग मॉड्यूल त्याच्या प्रोपल्शन मॉड्यूलपासून नुकतेच वेगळे करण्यात आले आहे. चांद्रयान 3 आता 23 ऑगस्टला चंद्रावर सॉफ्ट लँडिंग करण्याचा प्रयत्न करेल, अशी माहिती अवकाश शास्त्रज्ञ लीना बोकील यांनी दिली आहे. चांद्रयान-3 ने आतापर्यंत चंद्राभोवती 153 किमी X 163 किमीची परिक्रमा केली आहे. आता चांद्रयान-३ आपल्या मिशनच्या अंतिम टप्प्यात आले आहे. चांद्रयान-3 चंद्रापासून केवळ 150 किमी अंतरावर आहे. आज सकाळी इस्रोने चंद्राच्या पृष्ठभागापासूनचे अंतर कमी करण्यासाठी पुन्हा एकदा आपली कक्षा कमी केली. चांद्रयान-3 153 किमी x 163 किमीच्या पाचव्या कक्षेत आहे. या प्रक्रियेला मॅन्युव्हरिंग म्हणतात. या अंतर्गत, अंतराळ यानाच्या इंजिनांचा वापर करून, ते एका विशिष्ट मार्गाने आतल्या कक्षेत जाते. ज्यामुळे यानाचे सॉफ्ट लँडिंग करणे शक्य होते.