Railway Police Save Lives : आत्महत्या करण्यासाठी मारली रेल्वेसमोर उडी.. रेल्वे पोलिसाने वाचवले प्राण.. थरार सीसीटीव्हीत कैद..

ठाणे : रेल्वे फलाटावर उभा असलेल्या एका तरुणाने भरधाव वेगाने रेल्वे येताच रुळांवर उडी मारत आत्महत्या करण्याचा प्रयत्न ( Attempted Suicide In Front Of Train ) केला. मात्र प्रसंगावधान राखत फलाटावर तैनात असलेल्या एका रेल्वे पोलिसाने स्वतःच्या जीवाची बाजी लावून त्या तरुणाला मृत्यूच्या दाढेतून परत ( Railway Police Save Lives ) आणले. ही घटना विठ्ठलवाडी रेल्वे स्थानकात ( Viththalwadi Railway Station ) घडली असून, काळजाचा थरकाप उडविणारी घटना सीसीटीव्हीत कैद झाली आहे. कुमार पुजारी (वय १८) असे आत्महत्येचा प्रयत्न करणाऱ्या तरुणाचे नाव आहे. तर ऋषिकेश माने असे तरुणाचा जीव वाचविणाऱ्या रेल्वे पोलिसाचे नाव आहे. आत्महत्या करण्याचा प्रयत्न करणारा कुमार हा उल्हासनगर कँम्प नंबर ५ परिसरात राहतो. तो विठ्ठलवाडी रेल्वे स्थानकात आज दुपारच्या सुमारास आत्महत्या करण्यासाठी आला होता. त्यातच दुपारी अडीच वाजल्याच्या सुमारास मुंबईहुन कर्जतच्या दिशेने मदुराई एक्स्प्रेस भरधाव वेगात जात होती. त्याच सुमाराला फलाटावर उभा असलेल्या कुमार पुजारी याने रेल्वेसमोर उडी घेतली. हे पाहून काही सेंकंदात पोलीस नाईक माने यांनी स्वतःच्या जीवाची परवा न त्याला वाचविण्यासाठी रेल्वे रुळावर उडी मारून त्याला रुळावरून बाजूला ढकलले. हा थरार केवळ २ ते ३ सेकंदात घडला आहे. आता कुमार पुजारी याला कल्याण रेल्वे पोलिसांनी ताब्यात घेऊन त्याच्या घरांच्याशी संपर्क करून घटनेची माहिती दिली. मात्र, त्याने आत्महत्येचा निर्णय का घेतला याचे कारण अद्यापही समजू शकले नाही. मात्र पोलीस नाईक माने यांनी दाखवलेल्या धाडसाचे सर्वत्र कौतुक होत आहे.