डॉक्टर आणि चिकित्सकांचा सन्मान करण्यासाठी आणि लोकांची निःस्वार्थपणे सेवा करणाऱ्या वैद्यकीय व्यावसायिकांबद्दल कृतज्ञता व्यक्त करण्यासाठी दरवर्षी 1 जुलै रोजी राष्ट्रीय डॉक्टर दिन ( National Doctors Day on July 1 ) भारतात साजरा केला जातो. हा दिवस डॉ. बिधान चंद्र रॉय यांची जयंती आणि पुण्यतिथी ( Dr. Bidhan Chandra Roy Birth and death anniversary ) देखील आहे, जे एक प्रसिद्ध चिकित्सक, स्वातंत्र्य सेनानी आणि पश्चिम बंगालचे दुसरे मुख्यमंत्री देखील होते.
डॉ. बिधान यांना 1961 मध्ये भारताचा सर्वोच्च नागरी सन्मान, भारतरत्न देखील प्रदान करण्यात आला. डॉ. बिधान यांनी समाजाच्या कल्याणासाठी मोठे योगदान दिले आणि भारतातील अनेक वैद्यकीय संस्था स्थापन करण्यात मदत केली, विशेषत: भारतीय वैद्यकीय परिषद आणि इंडियन मेडिकल असोसिएशन (आयएमए). हा दिवस त्यांनी देशासाठी दिलेल्या योगदानाचे स्मरण करतो.
भारत सरकारने 1991 मध्ये डॉक्टर्स डे'ची स्थापना ( Founder of Doctors Day in 1991 ) केली होती, जी दरवर्षी 1 जुलै रोजी ओळखली जाते आणि साजरा केला जातो. केवळ भारतातच नाही तर जगभरात डॉक्टर्स डे साजरा केला जातो, तथापि, तारखा बदलतात. यावर्षी आपल्या देशात हा दिवस 'फॅमिली डॉक्टर्स इन द फ्रंट लाईन' ही थीम घेऊन साजरा केला जात आहे. डॉक्टर हे एक 'उत्तम पेशा' म्हणून ओळखले जातात. ज्यामध्ये ते समाजाची सेवा करण्यासाठी आणि जीव वाचवण्यासाठी अनेक त्याग करतात. पण आपण त्यांना किती महत्त्व देतो? यंदाच्या थीममध्येही याच गोष्टींवर भर देण्यात आला आहे.
जर आपण वैद्यकीय क्षेत्रातील प्रगतीबद्दल बोललो, तर भारताने खूप पुढे मजल मारली आहे आणि तांत्रिकदृष्ट्याही प्रगत झाला आहे. तथापि, आपल्या देशात रोग आणि आरोग्याच्या स्थितीत अपरिहार्य वाढ झाल्यामुळे, डॉक्टरांची गरज सतत वाढत आहे. गेल्या दोन वर्षांचा विचार करता, जेव्हा जग कोविड-19 साथीच्या आजाराच्या विळख्यात सापडले होते आणि संसर्ग झालेल्या लोकांच्या संख्येत अचानक वाढ झाली होती, तेव्हा डॉक्टरांनी स्वत:ला धोका पत्करून लाखो लोकांचे प्राण वाचवण्यासाठी अथक परिश्रम घेतले. डॉक्टरांना प्राणघातक विषाणूची लागण झाली आणि अनेकांना आपला जीव गमवावा लागला. IMA शी संबंधित एका डॉक्टरने सांगितले की, “गेल्या वर्षी संपूर्ण भारतातील 748 डॉक्टरांचा कोविड-19 मुळे मृत्यू झाला होता, तर सध्याच्या दुसऱ्या लाटेत आम्ही 730 डॉक्टर गमावले आहेत.”
त्यामुळे हा दिवस आपल्याला त्यांचे आभार मानण्याची आणि त्यांच्या व्यवसायाला महत्त्व देण्याची संधी देतो. याशिवाय, या दिवशी जागरूकता वाढवण्यासाठी आणि व्यावसायिकांचा सन्मान करण्यासाठी मोफत वैद्यकीय तपासणी आणि आरोग्य शिबिरांचे आयोजन केले जाते.
हेही वाचा - Male Health Tips : पुरुषांनी महिलांच्या तुलनेत आरोग्याबाबत अधिक काळजी घ्यावी
