गेल्या काही वर्षांमध्ये भारतातील हृदयरोगाच्या (Heart patients) रुग्णांची संख्या वाढत चालली आहे. चुकीची लाईफस्टाईल (Lifestyle), सदोष आहारपद्धती (Diet) आणि कामाच्या उलटसुलट वेळा (Irregular timings) यामुळे अनेकांच्या हृदयाचे आरोग्य बिघडू लागल्याचे गेल्या काही वर्षात दिसून येत आहे. त्याचप्रमाणे सातत्याने वाढत चाललेले ताणतणाव आणि त्यातून निर्माण होणारी व्यसनाधीनता हीदेखील हृदयावर परिणाम करणारी कारणे आहेत. गेल्या काही दिवसांमध्ये आपल्या फिटनेससाठी ओळखल्या जाणाऱ्या अनेक सेलिब्रिटींचाही हार्ट अटॅकने मृत्यू झाल्याती दिसून आले. त्यामुळे आपल्याला अचानक हृदयरोगाचा झटका येतो आणि आपला मृत्यू होतो, असे अनेकजणांना वाटत असते.
हृदय (Heart) हे आपल्या शरीरातील सर्वांत महत्त्वाचा अवयव असून आपल्या शरीराला प्राणवायू आणि पोषक घटकांसह रक्तपुरवठा करतं. आपलं हृदय प्रत्येक सेकंदाला काम करत असते. आपल्या हृदयाचे आरोग्य बिघडत चालले आहे, हे दाखवणारी अनेक लक्षणे आपल्याला दिसत असतात. त्यावर बारीक लक्ष ठेवून वेळीच उपाययोजना सुरू करणे आवश्यक असते. जाणून घेऊया, हृदय कमकुवत होत चालल्याची कुठली लक्षणे दिसून येतात, याबाबत वाचा.
हृदयविकाराची कारणे: हृदयविकाराला कारणीभूत ठरणारे अनेक जोखमीचे घटक आहेत. जोखीम वाढवणारी जीवनशैली जसे की, मद्यपान, धूम्रपान, वर्जित पदार्थांचं सेवन यामुळे हृदयविकार बळावण्याची शक्यता कैकपटीने वाढते. शारीरिक हालचालींचा अभाव असलेली जीवनशैली आणि चुकीच्या खाण्याच्या सवयींमुळे असलेला लठ्ठपणा हा हृदयविकाराच्या झटक्यापासून ते हृदय निकामी होणे यासारख्या विकारांची जोखीम वाढवते. हृदयविकाराची जोखीम वाढण्याची अनेक कारणे असतात. ज्या गोष्टी आपल्या हातात नसतात, यामध्ये कुटुंबात त्याबाबत असलेला वैद्यकीय इतिहास (हृदयाचा झटका, मधुमेह आणि कोलेस्ट्रॉलची वाढलेली पातळी) आणि वाढते वय यांचा समावेश असतो. पण ज्या गोष्टी आपल्या हातात आहेत त्यामध्ये जीवनशैली हा एक सर्वात महत्त्वाचा घटक आहे, ज्यावर आपण नियंत्रण ठेवू शकतो.
हृदयविकाराची लक्षणे:
अचानक घाम येणे: हवामानातील उष्म्यामुळे किंवा जिममध्ये व्यायाम केल्यामुळे घाम येणे साहजिक आहे. मात्र अनेकांना एसी रूम मध्ये बसलेले असताना किंवा विनाकारण घाम येतो. असा घाम येणे, हे धोक्याचे लक्षण मानले जाते. तुम्हालाही असाच अनुभव येत असेल, तर तातडीने वैद्यकीय तपासणी करून घेण्याचा सल्ला दिला जातो.
छातीत वेदना होणे: जर तुमच्या छातीत वारंवार वेदना होत असतील आणि छाती भरून आल्यासारखे वाटत असेल, तर ही धोक्याची घंटा समजण्यात यावी, असा इशारा आरोग्यतज्ञ देतात. अशावेळी डॉक्टरांची तातडीने संवाद साधून उपाययोजना करण्याची गरज असते. तुम्हाला हृदयाशी संबंधित काही विकार जडल्याचे हे लक्षण असू शकते. त्यामुळे त्याचा वेळीच शोध घेऊन उपाययोजना सुरू केल्या, तर भविष्यातील गंभीर परिणाम टाळता येतात.
पोटात दुखणे: पोटात दुखण्याची अनेक कारणे असू शकतात. मात्र हृदयाशी संबंधित काही विकार असेल, तरीही पोटात दुखण्याची शक्यता असते. बरेचदा पोटात गॅस पकडल्यामुळे ही वेदना होतात. मात्र यातील कुठल्याही लक्षणाकडे दुर्लक्ष न करता त्याची गंभीर दखल घेणे आवश्यक असते. तुमच्या पोटदुखीचे नेमके कारण शोधून काढेपर्यंत स्वस्थ बसू नका.
उलटी होणे: काही वेळ छातीत दुखणे आणि त्यानंतर उलट्या होणे, अशी लक्षणे काही जणांना जाणवतात. हृदयरोगाशी संबंधित हे एक अतिशय गंभीर लक्षण मानले जाते. ही लक्षणे दिसू लागली, तर उशीर न करता तातडीने डॉक्टरांशी संपर्क साधणे आवश्यक असते.
जबड्यात वेदना: जर वारंवार तुमचा जबडा दुखत असेल, तर हे हृदयरोगाचे लक्षण असू शकतं. जबडा दुखण्यामागे अनेक कारणे असू शकतात. त्यामुळे तुमचा जबडा दुखण्यामागचे नेमके कारण शोधून काढणे आवश्यक असते.
Disclaimer: हृदयरोगाच्या लक्षणांची संबंधित या काही सामान्य टिप्स आहेत. तुम्हाला याबाबत काही गंभीर प्रश्न अथवा समस्या असतील, तर डॉक्टरांच्या सल्ल्याने उपचार घेणे आवश्यक आहे.
