यवतमाळ - येथील मारेगावपासून दोन किमी अंतरावर ऑटो आणि दुचाकीचा भीषण अपघात झाला. यात दुचाकीस्वारासह दोन जण जागीच ठार झाले. तर ऑटोतील सहा जण जखमी झाले आहेत. जखमींची अवस्था गंभीर असल्याने त्यांना पुढील उपचारासाठी जिल्हा शासकीय रुग्णालयात हलवण्यात आले आहे.
रिक्षा क्र. (MH.२९ M. ५२८४) बोटोणीकडून मारेगावकडे प्रवासी घेऊन येत होता. मारेगाव येथील विनायक कोटेक्स जिनिंगजवळ ऑटोच्या समोर गाय आली. त्याच वेळी मारेगाव वरून दुचाकी क्र. (MH.२९ K ३४२८) बोटोणीकडे जात होती. गायीला वाचवण्याच्या प्रयत्नात ऑटोने दुचाकीला जबर धडक दिली. ही धडक इतकी भीषण होती की यात दुचाकीचालक व मागे बसलेली व्यक्ती जागीच ठार झाली. तर ऑटोमधील चालकासह सहा जण गंभीर जखमी झाले आहे.
मृतांमध्ये तुळसीराम भिमा टेकाम (वय - ४५), संतोष नारायण मडावी (वय- ३८ दोघेही रा. आवळगाव) यांचा समावेश आहे. तर जखमींमध्ये ऑटोचालक अतुल रामदास मेश्राम (३९), मारोती शिंदे (४०), सुनिल भिमा तोटे (३०), नीळकंठ टेकाम (३०), सुधाकर सूर्यभान वाघाडे (३०), सुनिल बबन वखनोर (३०) सर्व रा. बोटोणी यांचा समावेश आहे.
घटनास्थळी मारेगाव येथील शेख शरीफ हे उपस्थित होते. त्यांनी लगेच सहकाऱ्यांच्या मदतीने जखमींना उपचारासाठी मारेगाव ग्रामीण रुग्णालयात दाखल केले. तर जखमींची परिस्थिती गंभीर असल्याने त्यांना पुढील उपचारासाठी यवतमाळला हलवण्यात आले आहे.
