एक लाखांची लूटमार..ऑफर स्विकारणे पडले होते महागात; आरोपी अटकेत

एक लाखांच्या बदल्यात तीन लाखांचे आमिष दाखवत लूटमार केल्या प्रकरणी मारेगाव पोलिसांनी पाच आरोपींना अटक केली आहे. राजू बुजाडे, अरविंद चौगुले, लीलाधर मूरस्कर, अविनाश जांभुळकर, मारोती पवार (सर्व रा. मारेगाव) असे अटक करण्यात आलेल्या आरोपींचे नावे आहेत.

यवतमाळ - एक लाखांच्या बदल्यात तीन लाखांचे आमिष दाखवत लूटमार केल्या प्रकरणी मारेगाव पोलिसांनी पाच आरोपींना अटक केली आहे. राजू बुजाडे, अरविंद चौगुले, लीलाधर मूरस्कर, अविनाश जांभुळकर, मारोती पवार (सर्व रा. मारेगाव) असे अटक करण्यात आलेल्या आरोपींचे नावे आहेत. फिर्यादी महेंद्र ईश्वरलाल तिवारी (39 रा. भद्रावती) यांनी या प्रकरणी तक्रार दिली होती.

प्राप्त माहितीनुसार, फिर्यादी महेंद्र ईश्वरलाल तिवारी यांना तीन आठवड्यापूर्वी आरोपी राजू बुजाडे यांनी, मला तुम्ही एक लाख रुपये द्या. मी तुम्हाला तीन लाख रुपये देतो, असे आमिष दाखवले होते. त्यानुसार फिर्यादी हे कर्जबाजारी असल्याने कर्ज फिटेल या आशेने तीन लाखाच्या प्रलोभनाला भुलून पैसे द्यायला तयार झाले. दि. 11 जुलै रोजी 11 वाजता आरोपी राजु बुजाडे यांनी फिर्यादीला फोन करून अरविंद चौगुले नामक माझा माणूस दुचाकीने भद्रावती येथे आला आहे. त्यांच्या सोबत तुम्ही एक लाख रुपये घेऊन वणीला या, असे सांगितल्यावरून फिर्यादीने सोबत मामेभाऊ मनोज मुरलीधर शर्मा (रा. चंद्रपूर) याला घेऊन दुचाकीने भद्रावती येथे आले. तिथे अरविंद चौगुले सोबत वणी येथे गेले. येथून त्यांना मारेगाव येण्यास सांगितले. रात्री साडेआठ वाजता दरम्यान अरविंद चौगुलेसोबत अविनाश जांभुळकर, लीलाधर मुरस्कार, मारोती पवार हे व्यक्ती आल्याने फिर्यादीने अरविंद चौगुले याला हे लोक कोण आहे, असे विचारणा केली असता. हे सर्व आमचे सहकारी आहे, घाबरायचे कारण नाही, असे सांगितले.

हेही वाचा - पश्चिम बंगालमधील भाजप आमदार देबेंद्र राय यांचा मृतदेह लटकलेल्या अवस्थेत आढळला

दरम्यान, राजू भुजाडे यांनी फिर्यादीला ठरल्याप्रमाणे दोन हजार रुपयाचे बंडल दाखवून एक लाख रुपये मागितले. त्यावेळी दोन हजार रुपयाचे बंडल असलेले तीन लाखाचे नोटा बनावट असल्याचे फिर्यादीच्या निदर्शनास आले. आपली फसवणूक होत असल्याचे समजताच फिर्यादी आपले एक लाख रुपये घेऊन घटना स्थळावरून निघताच मारोती पवार, लिलाधर मुरस्कार यांनी हातात काठी घेऊन अविनाश जांभुळकर, राजू भुजाडे, अरविंद चौगुले यांनी घेराव घेऊन फिर्यादीला पैसे नाही दिले तर तुम्हाला मारून टाकणार, अशी धमकी दिली.

त्यानंतर बळजबरीने फिर्यादी जवळचे एक लाख रुपये हिसकावून घेतले आणि घटना स्थळावरून पळून गेले. दरम्यान आरोपीने दुचाकी (एमएच 29 एइ 8542) नंबर लक्षात ठेऊन मारेगाव पोलीस स्टेशन गाठले. या तक्रारीवरून पाच आरोपींना मारेगाव पोलिसांनी काही तासातच अटक केली. ही कारवाई उपविभागीय पोलीस अधिकारी सुशीलकुमार नायक यांचे मार्गदर्शनात पोलीस निरीक्षक जगदीश मंडलवार, उपनिरीक्षक अमोल चौधरी यांनी केली.