यवतमाळ - सततच्या पावसामुळे इसापूर धरणाच्या पाणी पातळीत वाढ झाली आहे. धरणाचे पाणी सोडल्याने पैनगंगा नदीला पूर आला आहे. त्यामुळे गेल्या 36 तासांपासून नागपूर-बोरी-तुळजापूर राष्ट्रीय महामार्ग ठप्प झाला आहे. त्यामुळे विदर्भ मराठवाड्याचा संपर्क तुटला आहे. इसापूर धरणाचे 13 दरवाजे उघडल्याने पैनगंगा नदी चांगलीच उफाळली आहे. बुधवारी (काल) सकाळी चार वाजतापासून नागपूर बोरी-तुळजापूर राष्ट्रीय महामार्ग ठप्प आहेत. पुलावरून तब्बल तीन फुट पाणी वाहत असल्याने सुरक्षेसाठी पोलीस तैनात करण्यात आले आहेत.
इसापूर धरणाचे सर्व दरवाजे खुले
पैनगंगा नदीवरील जयपूर बॅरेज (जिल्हा वाशिम) येथिल 10 दरवाजे 2.40 मीटरने पूर्णपणे उघडले असून 667.70 क्यूमेक्स पाण्याचा विसर्ग सुरू आहे. तर इसापूर धरण सांडव्याचे तीन दरवाजे 1 मीटरने व दहा दरवाजे 0.50 मीटरने उघडली असून त्यामधून 768.021 क्यूमेक्स इतक्या विसर्गाने पाणी पैनगंगा नदीपात्रात सोडण्यात येत असल्याने पैनगंगा नदीला पूर आला आहे.
जिल्हाधिकाऱ्यांनी केली पाहणी
जिल्हाधिकारी अमोल येडगे यांनी घटनास्थळी जाऊन पाहणी केली आहे. यावेळी उमरखेडचे उपविभागीय अधिकारी राठोड, तहसीलदार आनंद देऊळगावकर, पोलीस निरीक्षक अमोल माळवी यांच्यासह इसापूर प्रकल्पाचे अधिकारी उपस्थित होते. पुलावरील पाणी ओसरल्याशिवाय वाहतूक सुरू करू नये, अशा सूचना देण्यात आले आहे. तसेच पोलिसांचा बंदोबस्त लावण्यात आला आहे.
चार किलोमीटरपर्यंत वाहनांच्या रांगा
हा महामार्ग मागील दोन दिवसांपासून बंद असल्याने विदर्भ आणि मराठवाडा या दोन्हीही बाजूला चार ते पाच किलोमीटर वाहनांच्या रांगा लागलेल्या आहे. या ठिकाणी उमरखेडमधील सामाजिक संस्था, विविध पक्षाकडून अडकलेल्या बाहेर गावातील प्रवासी व वाहन चालकांना जेवणाची व पाण्याची सोय करत आहे. प्रत्येक नागरिकांच्या घरातून एक जेवणाचा डब्बा आणण्याचे आवाहन करण्यात आले होते, याला नागरिकांकडून चांगला प्रतिसाद मिळत आहे.
हेही वाचा - शेतकरी तरुणाचा भन्नाट जुगाड, चक्क मोटारसायकलने नांगरल शेत; पाहा VIDEO
