यवतमाळ - लॉकडाऊनचा गैरफायदा घेत अवैध गुटखा तस्करी करताना 20 लाखांचा गुटखा जप्त करण्यात आला आहे. उमरखेड पोलिसांनी रात्रीच्या वेळी संबंधित कारवाई केली आहे. गुटख्याचा काळाबाजार करून हे व्यावसायिक आपले उखळ पांढरे करून घेत आहेत. मात्र, उमरखेड तालुक्यातील लिम्बगव्हाण येथे ग्रामसुरक्षा दलाने अशा व्यावसायिकांच्या मनसुब्यांवर पाणी फेरलंय रात्रीच्या गस्तीदरम्यान गुटख्याने भरलेली चारचाकी पकडून त्यांना पोलिसांच्या स्वाधीन केले आहे. पोलिसांनी सय्यद जावेद या वाहनचालकाला अटक केली आहे. तसेच चारचाकीसह २० लाखांचा मुद्देमाल जप्त केला आहे. उमरखेड पोलीस पुढील तपास करत आहेत.
सद्या लॉकडाऊनमुळे फक्त अत्यावश्यक सेवा सुरू आहेत. यामुळे व्यसने करणाऱ्यांच्या अडचणीत भर पडलीय. ठिकठिकाणी तंबाखू, गुटखा, सिगारेट, दारू अवैधरित्या विकण्यात येत आहे. यामुळे पोलिसांनी संबंधित गुन्हेगारांवर कारवाई केल्याने तस्करांचे धाबे दणाणले आहेत.
