यवतमाळ - जिल्ह्यात परतीच्या पावसामुळे सोयाबीन, कापूस या पिकांचे मोठे नुकसान झाले. मात्र, या पिकांच्या भरपाईपासून शेतकरी वंचित आहे. त्यामुळे शेतकऱ्यांना दिवाळी तरी कशी साजरी करायची, असा प्रश्न भेडसावत आहे. या गंभीर समस्येची राज्य शासनाने दखल घ्यावी, म्हणून नेर येथे युवा शेतकरी संघर्ष समितीनेच्यावतीने नेर तहसील कार्यालयासमोर ठिय्या आंदोलन करण्यात आले.
शेतकरी तीन वर्षांपासून अस्मानी सुलतानी संकटात -
मागील तीन वर्षापासून शेतकरी अस्मानी व सुलतानी संकटांचा सामना करीत आहे. यातून तो अजूनही सावरलेला नाही. कर्जमाफीसारख्या योजनेतून अनेक शेतकरी वंचित आहे. तर यंदा परतीच्या पावसामुळे शेतकरी पूर्णतः उद्ध्वस्त झाला आहे. सोयाबीन पीक पूर्णत: नष्ट झाले तर कापसावर बोंडअळीचा प्रादुर्भाव झाल्यामुळे कापूस पीक सुद्धा हातातून गेले आहे. या विचित्र परिस्थितीत दिवाळीसारखा सण समोर येऊन ठेवलेला आहे. कोरोनासारख्या संकटात अनेक शेतकरी, शेतमजुरांच्या हाताला काम न मिळाल्याने उपासमारीची पाळी आली होती. त्यातच परतीच्या पावसाने शेतकऱ्यांचे पुरते पिक नष्ट झाले आहे.
हेही वाचा -बळीराजा हवालदिल : कापूस उत्पादक शेतकऱ्यांवर आता 'गुलाबी' संकट
काय आहेत शेतकऱ्यांच्या मागण्या -
शासनाने घोषित केलेल्या निधीतून तात्काळ हेक्टरी 10 हजार रुपये याप्रमाणे शेतकऱ्यांना मदत देण्यात यावी, बीजी-2 या कपाशीवर सातत्याने बोंड अळी येत असल्यामुळे प्रगत तंत्रज्ञान असलेले बीटी बियाणे लागवड करण्याची परवानगी शेतकऱ्यांना देण्यात यावी, सन 2017-2018मध्ये नेर तालुका दुष्काळग्रस्त घोषित होता. दुष्काळ मदत निधी म्हणून हेक्टरी ६ हजार ८०० रुपये जाहीर केले होते तो अजूनही मिळालेली नाही. ती मदत तत्काळ देण्यात यावी, दोन्ही सरकारच्या कर्जमाफी योजनेपासून वंचित राहिलेल्या शेतकऱ्यांना कर्जमाफीचा लाभ देण्यात यावा, कृषीकेंद्र व बियाणे कंपन्या बोगस बियाणांचा व्यापार करतात या कंपन्यांवर कारवाई करण्यात यावी. या मागण्यांचे निवेदन तहसीलदार अमोल पवार यांना देण्यात आले.
हेही वाचा - नुकसानग्रस्त शेतकऱ्यांना वेळेत मदत करा; बाळासाहेब थोरात
