यवतमाळ - ऐन दिवाळीत वादळी पावसाने कहर केला असून महाराष्ट्रात अंदाजे २० लाख हेक्टर क्षेत्रातील सोयाबीन, धान, कापूस व इतर पिकांचे नुकसान झाले असल्याचे शिवसेनेचे कृषी सल्लागार किशोर तिवारी म्हणाले आहेत. सरकार आणि विमा कंपन्यांनी नुकसान भरपाई द्यावी. अन्यथा, शिवसेना आंदोलन करणार असल्याचा इशारा तिवारी यांनी दिला.
हेही वाचा - परभणीतही परतीच्या पावसाचा तडाखा; होती ती पीकं गेलीच, रब्बीची पेरणीही खोळंबली
यवतमाळ आणि परिसरात प्रचंड पावसामुळे भाजीपाला व फळ बागायतीचे प्रचंड नुकसान झाले आहे. तिवारी म्हणाले, आठवड्याभरापासून शेतकऱ्यांचा एकही फोन विमा कंपन्या, कृषी व महसूल विभाग उचलत नाही. याउलट ४८ तासात नुकसानीची सूचना न देणाऱ्यास विमा मिळणार नाही, असा फतवा काढला आहे. कृषी व महसूल विभागाचे कर्मचारी व अधिकारी आचारसंहिता व दिवाळीच्या सुट्टीचे कारण देत आहे. तर विमा कंपनीचा एकही कर्मचारी व अधिकारी उपलब्ध नसल्याने शेतकऱ्यांना फक्त चकरा माराव्या लागत आहेत. अशा परिस्थितीमध्ये शिवसैनिकांनी मदतकेंद्र उघडुन नुकसान झालेल्या शेतकऱ्यांची तालुकानिहाय यादी तयार करावी व विमा कंपन्यांना सरसकट नुकसान भरपाईसाठी शिवसेनेचे बदडा आंदोलन करण्यासाठी सज्ज व्हावे असे आवाहन तिवारी यांनी केली.
आठवडाभर परतीच्या दमदार पावसाने विदर्भ आणि मराठवाड्यातील जिल्ह्यातील अनेक गावांना झोडपून काढले आहे. २५ ऑक्टोबरला सकाळी साडेआठ वाजेपर्यंत या विभागातील ११६ महसुली मंडळांमध्ये अतिवृष्टीची नोंद झाली. या पावसानंतर मराठवाड्यापाठोपाठ आता विदर्भातील अनेक जिल्ह्यांनी पावसाची वार्षिक सरासरी ओलांडली आहे. या अवकाळी पावसाने केलेल्या प्रचंड नुकसानीमुळे शेतकरी हवालदिल झाला आहे. मात्र, नवनिर्वाचित आमदार त्यांच्याच कामात गुंतले आहेत. त्यातच विमा कंपन्यांची दलाली करणारे सनदी अधिकारी विदेशात दिवाळी साजरी करीत असल्याच्या बातम्या खबरी देत असल्याचा आरोप किशोर तिवारी यांनी केला आहे.
मागील आठ दिवसांपासून ओला झालेला सोयाबीन धान कापुस व तुरीचेसह भाजीपाला व फळ बागायतीतील मालाच्या पंचनाम्याची वाट पाहून थकलेल्या शेतकऱ्यांनी कोंब निघत असल्यामुळे मूळ जागेवरून घरी ऊन दाखविण्यासाठी आणला. आता विमा कंपनीचा कर्मचारी व अधिकारी कृषी विभागांच्या सहकार्याने शेतकऱ्यांचे चुकीचे पंचनामे करणार आहेत. त्यामुळे अवकाळी पावसाने झाडपलेल्या सर्व जिल्ह्यात विमा कंपन्यांनी सरसकट समसमान नुकसान भरपाई द्यावी. यासाठी शिवसेनेने आंदोलन करण्यासाठी सज्ज व्हावे, असे आवाहन शेतकरी नेते व शिवसेना प्रमुखांचे कृषी सल्लागार किशोर तिवारी यांनी केले आहे.
हेही वाचा - लातूरच्या माकणीत वीज कोसळून महिलेचा मृत्यू
