यवतमाळ - पर्यावरणाचे संरक्षण करण्यासाठी वृक्ष लागवड मोहिमे अंतर्गत वृक्ष लागवडीचे उद्दिष्ट देण्यात आले आहे. शासकीय यंत्रणेसोबतच सामाजिक संघटना आणि नागरिकांनी भाग घेऊन झाडांचे काळजीपूर्वक संवर्धन करावे, असे प्रतिपादन अमरावती विभागाचे विभागीय आयुक्त पियुष सिंह यांनी केले. यावेळी जलयुक्त शिवार, गाळमुक्त धरण, वॉटर कप याचा आढावाही आयुक्तांनी घेतला.
जिल्ह्याला १ लाख ३७ हजार ११ वृक्ष लागवडीचे उद्दिष्ट आहे. वन विभागासोबतच इतर शासकीय यंत्रणांनी यात सहभाग नोंदविणे आवश्यक आहे. इतर विभागांना वृक्ष लागवडीचे उद्दिष्ट देण्यात आले आहे. त्यामुळे त्यांनी पुढील ७ दिवसात जागा निश्चित करून खड्डे खोदण्यास सुरवात करावी. तसेच याची माहिती नियमितपणे पोर्टलवर अपलोड करावी. या बाबींचा विभागीय स्तरावर नियमित आढावा घेतला जाणार आहे. वृक्ष लागवडीनंतर वृक्ष जगविणे हेसुध्दा आपले काम आहे. त्यामुळे याबाबत गांभीर्य ठेवा.
औद्योगिक विकास महामंडळांतर्गत असलेल्या प्रत्येक उद्योगामध्ये ३३ टक्के वृक्षांची लागवड होणे गरजेचे आहे. याबाबत जिल्हा उद्योग केंद्राने नियोजन करावे. तसेच आदिवासी विकास विभाग आणि सामाजिक न्याय विभागाच्या आश्रम शाळांमधील विद्यार्थ्यांची हरीत सेनेमध्ये नाव नोंदणी करावी. वृक्षलागवड मोहिमेकरीता लागणारी रोपे सामाजिक वनीकरण आणि वन विभागाने उपलब्ध करुन द्यावी, अशा सुचना विभागीय आयुक्त पियुष सिंह यांनी दिल्या.
१ लाख ३८ हजार ६८ रोपांची निर्मिती
यवतमाळ जिल्ह्याला एकूण १ लाख ३७ हजार ११ वृक्ष लागवडीचे उद्दिष्ट आहे. यात वनविभाग ७८ लाख ४७ हजार, जिल्ह्यातील ग्रामपंचायती ३८ लाख ४४ हजार ४०० आणि इतर विभागामिळून २० लाख २० हजार ४५० उद्दिष्ट आहे. यासाठी १०९ रोपवाटिकांमध्ये १ लाख ३८ हजार ६८ रोपांची निर्मिती करण्यात आली आहे.
जलयुक्त शिवार योजनेचा आढावा घेतांना २०१८-१९ मध्ये जलयुक्त शिवार अभियानांतर्गत एकूण ३७५ गावांची निवड करण्यात आली आहे. यात एकूण प्रस्तावित कामांची संख्या ९०५९ असून ७०५९ कामे पूर्ण झाली आहेत. १०० टक्के काम पूर्ण झालेल्या गावांची संख्या २२५ असून एक संरक्षित पाणी अंतर्गत निर्माण झालेली सिंचन क्षमता १३ हजार १९१ हेक्टर आहे.
गाळमुक्त धरण गाळयुक्त शिवार योजनेंतर्गत २८ कामे सुरू असून आतापर्यंत २ लक्ष घनमीटर गाळ काढण्यात आला आहे. तसेच सत्यमेव जयते वॉटर कप स्पर्धेमध्ये ६ तालुक्यातील २९८ गावे सहभागी झाली आहेत. कळंब तालुक्यातील तासलोट या गावात केवळ २१ कुटुंब असून ८६ लोकसंख्या आहे. या गावात आतापर्यंत ४ हजार घनमीटरचे श्रमदान करण्यात आले आहे.
यावेळी जिल्हाधिकारी अजय गुल्हाने, सहाय्यक जिल्हाधिकारी भुवनेश्वरी, उपवनसंरक्षक डॉ. भानुदास पिंगळे, प्रभारी मुख्य कार्यकारी अधिकारी राजेश कुलकर्णी, निवासी उपजिल्हाधिकारी ललितकुमार वऱहाडे आदी उपस्थित होते.
