यवतमाळ - सामाजिक बांधिलकी जपणाऱ्या नुटा सारख्या संघटना जेव्हा पुढाकार घेऊन कोविड-१९ सारख्या राष्ट्रीय आपत्तीला सामोरे जाण्यासाठी स्वेच्छेने मदत करतात. तेव्हा त्या शासन, वैद्यकीय अधिकारी डॉक्टर्स, परिचारिका, आरोग्य कर्मचारी यांना या आपत्ती विरुद्ध लढण्याचे बळ मिळवून देत असल्याचे प्रतिपादन जिल्हा परिषदेचे मुख्य कार्यकरी अधिकारी डॉ. श्रीकृष्ण पांचाळ यांनी केले. ते नुटा या प्राध्यापकांच्या संघटनेने संकलित केलेल्या कोविड आपत्ती मदतनिधीतून खरेदी केलेल्या वैद्यकीय उपकरणांच्या वितरण कार्यक्रमात बोलत होते.
पाच लाखांचे वैद्यकीय उपकरणे भेट -
अकरा जिल्ह्यांमध्ये शिक्षणासोबतच सामाजिक क्षेत्रात कार्यरत असणाऱ्या नुटा या प्राध्यापक संघटनेने मदत निधी उभारला आहे. मदतनिधीतून एकूण २०६ नेब्युलायझर आणि ८० बीपी मॉनिटर ही वैद्यकीय उपकरणे खरेदी करण्यात आली आहेत. त्यापैकी २१६ उपकरणे जिल्ह्यातील ३० कोविड केंद्रांना आणि ६६ प्राथमिक आरोग्य केंद्रांना भेट दिल्या. नुटा या प्राध्यापक संघटनेने संकलित केलेल्या कोविड आपत्ती मदत निधीतून नियोजनपूर्वक वैद्यकीय उपकरणे खरेदी केली. ही शहरी तसेच ग्रामीण भागातील कोविड केंद्रांना आणि प्राथमिक आरोग्य केंद्रांना अतिशय उपयुक्त ठरणार आहेत.
नुटाच्या आवाहनाला प्राध्यापकांचा प्रचंड प्रतिसाद -
यवतमाळ जिल्ह्यातील प्राध्यापकांचा नुटाच्या आवाहनाला प्रचंड प्रतिसाद मिळाला. उभारल्या गेलेल्या पाच लाख मदतनिधीतून तीन टप्प्यात विविध उपकरणांचे वितरण करण्यात येणार आहेत. मदतनिधीचा योग्य विनियोग व्हावा याकरिता जिल्हा नुटा कार्यकारिणीने मुख्य कार्यकरी अधिकारी, आरोग्य विभाग तसेच जिल्हा शासकीय रुग्णालयाशी संपर्क करून जिल्हाभरात कोणत्या वैद्यकीय उपकरणांची नितांत आवश्यकता आहे, याची माहिती घेतेली. त्यानुसार उपकरणांच्या खरेदीचे नियोजन केले असल्याचेही प्रा. डॉ. विवेक देशमुख यांनी यावेळी सांगितले.
हेही वाचा - यवतमाळ : नागरिकांवर लिकेज पाईपलाईनमधून पाणी भरण्याची वेळ
