वाशिम - प्रशासनाच्या हलगर्जीपणामुळे कारंजा शहरवासीयांचा जीव धोक्यात आला आहे. शहरातील प्रतिबंधित क्षेत्रातून लोकांचा मुक्त संचार सुरू आहे. वाशिम जिल्ह्यातील कारंजा शहरात कोरोना रुग्णांची संख्या 2 दिवसात 135 च्या वर गेली आहे. ज्या ठिकाणी अधिक रुग्ण आढळत आहे, त्या ठिकाणी प्रशासनाच्या वतीने शहरातील भारती पुरा, गुरुमंदिर परिसर आणि सुंदर वाटिका या 3 भागांना सील करण्यात आले आहे.
कारंज्यात प्रतिबंधित क्षेत्रातून लोकांची ये-जा कारंजा शहरात कोरोना रूग्णांची संख्या झपाट्याने वाढत असतांना प्रतिबंधित भागात खुलेआम लोकांची ये-जा सुरू आहे. या सर्व प्रतिबंधित क्षेत्रात नागरिक कसे येत आणि जात आहेत, हे व्हिडिओमध्ये स्पष्ट दिसत आहे. दूधवाले सरळ आत जाताना आणि बाहेर येताना दिसतात.या प्रतिबंधित क्षेत्रात येथील लोकांची ये-जा वाढल्यामुळे शहरातील इतर भागातील नागरिकांमध्ये भीतीचे वातावरण पसरले आहे. मात्र प्रशासनाचा एकही कर्मचारी प्रतिबंधित क्षेत्राच्या ठिकाणी तैनात नसल्यामुळे प्रशासनाप्रती नागरिकांमध्ये रोष व्यक्त होत आहे.
