वाशिम - येथील एक नराधम बाप स्वत:च्या मुलीच्या हत्येप्रकरणी 7 वर्षाचा कारावास भोगून 2 महिन्यांपूर्वी कारागृहातून बाहेर आला होता. त्यानंतर याच नराधम बापाने स्वतःच्या अल्पवयीन मुलीवर सातत्याने शारीरिक अत्याचार केल्याची धक्कादायक घटना समोर आली आहे. या घटनेची तक्रार पीडित मुलीने वाशिम ग्रामीण पोलिसांत दिली आहे.
वाशिम तालुक्यात आरोपी पिता राहातो. त्याला काही वर्षांपूर्वी एक बेवारस मुलगी सापडली होती. या मुलीचा त्याने 2 वर्षे सांभाळही केला. त्यानंतर एके दिवशी दारुच्या नशेत त्याने या मुलीची हत्या केली. या चिमुकलीच्या हत्येप्रकरणी लक्ष्मणला 7 वर्षांच्या कारावासाची शिक्षा झाली. त्यानंतर 2 महिन्यांपूर्वीच लक्ष्मण तुरुंगातून बाहेर आला होता. बाहेर आल्यानंतर त्याने स्वत:च्याच अल्पवयीन मुलीवर अत्याचार केल्याची धक्कदायक घटना समोर आली आहे.
लहान असतानाच पीडीतेच्या आईचा मृत्यू -
लहान मुलीच्या हत्येच्या गुन्ह्याची लक्ष्मण शिक्षा भोगत असताना तिच्या आजोबाने मुलीचा सांभाळ केला. मात्र, तुरुंगातून बाहेर येताच नराधम बापाने हे घृणास्पद कृत्य केले. त्यानंतर मुलीच्या तक्रारीवरून या बापाला अटक करण्यात आली असल्याचे ठाणेदार योगिता भारद्वाज यांनी सांगितले.
'असा' आला उजेडात प्रकार -
नराधम पित्याने सुरुवातीला एक महिना मुलीवर अत्याचार केला. त्यानंतर तो काही महिने कामासाठी पुण्याला गेला होता. त्यानंतर त्या नराधमाने परत मुलीवर अत्याचार करण्यास सुरूवात केली. सोमवारी रात्रीच्या वेळी नराधम पिता मुलीला बाहेर घेऊन जात होता. त्यावेळी मुलगी जोरात रडत असल्याचे पाहून मुलीचे चुलत आजोबा आणि चुलत्याने मुलीला आजचा दिवस आमच्याकडे राहू दे, असे सांगून मुलीला घरी ठेवून घेतले. त्यावेळी त्या रात्री मुलीने तिच्यासोबत घडलेली घटना सांगितली. तसेच मुलीने त्यांना पोलिसांत तक्रार देण्यासाठी सोबत येण्याची विनंती केली. त्यानंतर मुलीने नराधम पित्याविरोधात तक्रार दाखल केली.
