वाशिम - सामाजिक कार्यात नेहमीच अग्रेसर असणार्‍या तसेच नेत्रदान चळवळीचा जिल्ह्याचा ब्रॅन्ड अ‍ॅम्बेसेडर असलेल्या दिव्यांग चेतन उचितकर याने दानशुरपणाची पुन्हा प्रचिती दाखवून दिली आहे. त्याच्या चेतन सेवांकूर आर्केस्ट्राच्यावतीने पाल ठोकून राहणाऱ्या कुटुंबातील मुलांना अभ्यास करण्यासाठी दिपावली निमित्त सौर कंदीलाचे वाटप करण्यात आले.
जन्मतः अंध असलेला चेतन उचीतकर हा बालकलाकार आहे. आपल्या 16 दिव्यांग कलावंतांच्या सहकार्यातून चेतन सेवांकुर हा संगीतमय कार्यक्रम करतो. या कार्यक्रमाच्या माध्यमातून जो पैसा त्यांना मिळतो त्यातून त्याचा उदरनिर्वाह चालतो. अशा स्थितीतही चेतन उचीतकरकडून सौर कंदील वाटपासारखे विविध सामाजिक उपक्रम नेहमी राबविण्यात येतात.
चेतन सेवांकुर हा ग्रुपच्यावतीने मागील अनेक वर्षांपासून दीपावली निमित्ताने सौर कंदीलांचे वाटप करतो. यावर्षीही त्याने सौर कंदील वाटपाची परंपरा कायम ठेवली आहे. शेलू बाजार रस्त्याच्या कडेला गायरान जागेत पाल ठोकून काही कुटुंबे राहतात. या कुटुंबातील मुलांना अभ्यास करण्यासाठी सौर कंदील देण्याचे त्याने ठरविले. या कुटुंबातील मुले शाळाबाह्य आहेत. मात्र, त्यांना शिक्षणाच्या प्रवाहात आणण्यासाठी पोलीस विभागात कार्यरत असलेली संगीता ढोले नावाची एक आधुनिक सावित्री पुढे आली. तिने या मुलांना शिक्षण देण्याचे महान कार्य सुरू केले.
हेही वाचा-आता एसटी कर्मचाऱ्यांची मंत्रालयावर धडक, मंत्रालयासमोर करणार आंदोलन - गोपीचंद पडळकर
महिला पोलीस शिपाई असलेल्या संगीता ढोले यांनी सुरू केलेल्या पालावरील शाळेत 60 विद्यार्थी शिक्षण घेत आहेत. या मुलांना रात्री अभ्यास करता यावा, म्हणून बाल संगीतकार चेतन याने दखल घेतली आहे. या पालावर जाऊन छोटासा कार्यक्रम घेऊन तेथील २० कुटुंबांत सौर कंदीलचे वाटप केले. प्रत्येक अंधाऱ्या झोपडीत दिवाळीनिमित्त उजेड पेरण्याचे खूप मोठे कार्य केले. स्वतःच्या जीवनात अंधःकार असताना झोपडीत राहणाऱ्या मुलांचे शैक्षणिक भविष्य घडविणाऱ्या उपक्रमाने तसेच आपल्या अंधाऱ्या झोपडीत दिवाळीच्या दिवशी उजेड होणार असल्याचा आनंद मुलांच्या चेहऱ्यावर झळकत होता. यामुळे आज त्यांना खरी दिवाळी साजरी होत असल्याची अनुभूती आली.
हेही वाचा-दिवाळीच्या पर्वावर भाविकांना मिळतो 'पैशांचा प्रसाद', अमरावतीच्या कालीमाता मंदिरातील प्रथा
