वाशिममधील अंध बांधवांची डोळस कामगिरी... कोल्हापूर-सांगली पूरग्रस्तांसाठी राखी विक्री करून केली मदत

केकतउमरा येथील चेतन उचितकर हा जन्मता अंध आहे. चेतनच्या वडिलांनी अकोला, वाशिम, यवतमाळ जिल्ह्यातील अंध मुलांना एकत्र करून 'चेतन अंकुर' ही संस्था उभी केली आहे. या अंध मुलांनी राख्या बनवून कोल्हापूर व सांगली येथील पूरग्रस्तांना मदत केली आहे.

वाशिम - सध्या माणसा-माणसांतील जिव्हाळा संपत चालल्याचे चित्र आहे. मात्र राज्यातील जलप्रलयामुळे उघड्यावर आलेल्या कुटूंबांना राखी विक्रीतून आलेली रक्कम मदत म्हणून देण्याचा निर्णय, वाशिम जिल्ह्यातील काही अंध व्यक्तींनी घेतला आहे. केकतउमरा येथील अंध बांधवांनी समाजाच्या डोळ्यात झणझणीत अंजन घालणारी कामगिरी केली आहे. त्यांच्या या निर्णयाचे सर्वच स्तरांतून कौतुक होत आहे.

वाशिम जिल्ह्यातील केकतउमरा येथे 'चेतन अंकुर' नावाचा पंधरा अंध व्यक्तींचा ग्रुप राहत आहे. प्रत्येक मोसमात वेगवेगळ्या प्रकारचे काम करून ते आपला उदरनिर्वाह स्वतःच करतात. सध्या त्यांनी राख्या बनवल्या आहेत. राखी विक्रीतुन मिळालेली रक्कम (दहा हजार रुपये) कोल्हापूर व सांगली येथील पूरग्रस्तांना जिल्हाधिकाऱ्यांच्या मार्फत देणार आहेत. चेतन अंकुर या ग्रुपने वाशिम येथील राणी लक्ष्मीबाई शाळेतील विद्यार्थी व शिक्षकांना राख्या विकून हजारो रुपये जमा केले. विद्यार्थ्यांनी देखील यामार्फत पूरग्रस्तांना आपली मदत होईल म्हणून उत्स्फूर्तपणे राखी खरेदी केली.