वाशिम - जिल्हा बंदी असल्यामुळे सर्वत्र मुख्य रस्त्यावर चेक पोस्ट लावण्यात आली आहेत. कारंजा ग्रामीण पोलीस स्टेशनअंतर्गत महागाव येथे चेक पोस्ट लावण्यात आले आहे. या चेक पोस्टमध्ये बुधवारी रात्री ३ वाजताच्या सुमारास स्विफ्ट डिझायर गाडी घुसल्यामुळे अपघात झाला. या अपघातात पोलिस कर्मचारी पोलीस हेड कॉन्स्टेबल किशोर दोनोडे जखमी झाले आहेत.
कारवरील नियंत्रण सुटल्याने गाडी सरळ चेक पोस्टमध्ये -
वाशिम जिल्ह्यामध्ये कोरोना आजाराचे प्रमाण वाढत आहे. त्या अनुषंगाने संपूर्ण जिल्ह्यातील पोलिस यंत्रणा या आजाराला रोखण्यासाठी दिवस-रात्र कार्यरत आहे. शासनाने जिल्हा बंदीच्या दिलेल्या आदेशावरून कारंजा ग्रामीण पोलीस स्टेशने महागाव येथे चेक पोस्ट लावण्यात आहे. जेणेकरून दुसऱ्या जिल्ह्यातील व्यक्ती आपल्या जिल्ह्यामध्ये विना परवानगी येऊ नये. या चेक पोस्टवर पोलीस हेडकॉन्स्टेबल किशोर दोनोडे ड्युटी करत होते. रात्री ३ वाजताच्या सुमारास स्विफ्ट डिझायर चालकाचे कारवरील नियंत्रण सुटल्याने गाडी सरळ चेक पोस्टमध्ये घुसली.
सुदैवाने जीवितहानी टळली -
यावेळी चेक पोस्टमध्ये कार्यरत असलेले पोलीस हेडकॉन्स्टेबल किशोर दोनोडे यांना १५ ते २० फूट दूर फेकून दिले. त्यामुळे त्यांच्या पाय फ्रॅक्चर झाला व मानेला, खांद्याला मार लागून ते जबर जखमी झाले आहेत. सुदैवाने जीवितहानी टळली. या प्रकरणी पोलीस स्टेशन कारंजा ग्रामीण येथे गाडी चालकाविरुद्ध गुन्हा दाखल करण्यात आला.
हेही वाचा - पाण्याच्या बहाण्याने महिलेला खोलीत बोलवले; अन् केला लैंगिक अत्याचार
