वर्धा - वर्ध्यातील जिल्हा सामान्य रुग्णालयाच्या आयसोलेशन वॉर्डमधील 16 जणांना गुरुवारी उपाशी राहावे लागले. जिल्हा सामान्य रुग्णालयात पिपरी मेघे परिसरातील कोरोनाबाधित व्यक्तीच्या कुटुंबाच्या संपर्कातील 16 लोकांना विलगीकरणासाठी आणण्यात आले. त्यांची नोंदणी करून घेण्याच्या प्रक्रियेत लागलेल्या कालावधीमुळे त्यांना दिवसभर उपाशीच राहावे लागले.
वर्ध्याच्या पिपरी येथील एका कुटुंबात कोरोना पॉझिटिव्ह आढळून आले. विवाह सोहळ्यातून ही बाधा झाली आहे. यामुळे या कुटुंबाच्या निकट संपर्कातील 16 जणांना सामान्य रुग्णालयाच्या आयसोलेशन कक्षात आणण्यात आले. त्यानंतर त्यांचे स्वॅब घेऊन त्यांची नोंद करून घेण्यासाठी जवळपास 1 वाजले. त्यांनतर त्यांना आयसोलेशनमध्ये नेण्यात आले. पण रुग्णालय प्रशासनाच्या वेळेनुसार त्यांना उशीर झाला असल्याने त्यांना जेवण मिळू शकले नाही.
