वर्धा - जिल्ह्यात रविवारी ग्रामपंचायत निवडणूक पार पडली. यावेळी आनंदवाडीच्या दारूबंदी महिला मंडळाने मतदारांना कोणी दारूचे आमिष देऊ नये. तसेच निवडणूक शांततेत पार पडावी, यासाठी दिवसभर गावात फिरून पहारा दिला.
जिल्ह्यात दारूबंदी असली तरी लपून छपून दारूची विक्री केली जाते. त्यामुळे पोलीस प्रशासनाने गावातील महिला मंडळाच्या मदतीने पथक स्थापन करून गावातील दारू तस्करीवर उपाय शोधला. आज आष्टी तालुक्यातील आनंदवाडी गावातील मंडळाने निवडणुकीत गावात पहारा देत ही निवडणूक शांततेत पार पाडण्यासाठी प्रशासनाला मदत केली.
ग्रामपंचायत निवडणुकीला दारूचे ग्रहण
जिल्ह्यात आज २९४ ग्रामपंचायत निवडणूक प्रक्रिया पार पडली. निवडणुक म्हटले, की मतदात्याना मटणाची पार्टी, घोटभर दारू पाजून निवडणुकीत मतदान करून घेतल्याच्या अनेक घटना घडतात. शासन दरबारी याची नोंद नसली तरी या बाबींना कोणी नाकारत नाही? त्यामुळे गावातील निवडणुकीवर याचा अनुचित परिणाम पडू नये, यासाठी हे पाऊल येथील महिला मंडळांनी उचलले. चक्क गावात फिरत, गावातील मुख्य रस्त्यावर पहारा देत गावातील महिलांनी निवडणुकी प्रक्रियेत सहभाग घेतला. तसेच यावेळी सर्व महिलांनी मतदान केल्याचे सुद्धा दारूबंदी महिला मंडळाच्या दिपाली खोडे यांनी सांगितले.
